Камен темелникот на Музејот на вода кај локалитетот Градиште, ќе биде поставен денеска. На свеченоста со која официјално ќе започне реконструкцијата на наколната населба од бронзеното време , ќе присуствува премиерот Никола Груевски.

Според најавите наколната населба ќе биде реконструирана автентично на остатоците од праисториската населба во подводниот археолошки локалитет „Миќов град“. Целокупните работи треба да завршат до крајот на годината. Покрај екстериерот ќе се реконструира и ентериерот, а во дрвените куќички што ќе бидат изградени над вода ќе бидат изложени сите предмети пронајдени за време на 8-годишните археолошки истражувања на подводниот локалитет.

http://ohridnews.com/v2_index.php?mod=1&id=5024&s=1 - ohridnews

Охридскиот музеј на вода ќе биде отворен на 8 декември

Римската тврдина со патека е поврзана со наколната населба во Заливот на коските, така што туристите и гостите ќе имаат несекојдневна можност да патуваат низ времето, од античкото до праисториското и обратно. На истата локација ќе биде изградена и нуркачка база, со две простории, наменети пред се за сместување на опрема за нуркање. За полесна пристапност до целиот музејски комплекс ќе биде изградена и посебна патека од римски плочи, што ќе се спојува со магистралниот пат Охрид - Свети Наум.

- Станува збор за напредна цивилизација во тоа време, споредена со другите земји и континенти, што зборува дека Македонија е древна земја која има што да покаже пред светот, рече Груевски.

Директорот на Управата за заштита на културното наследство, охридскиот археолог Паско Кузман, за овој проект изјави дека ќе биде атрактивна туристичка дестинација.

Новиот музејски комплекс свечено ќе биде отворен задутре, во 13 часот, на христијанскиот празник Св. Климент Охридски

Музејот на вода е составен од неколку објекти, а во него ќе бидат споени неолитот, римското време и сегашноста

Во осум куќи поставени на дрвена платформа, изградена на дрвени колци кои излегуваат од Охридското Езеро, ќе биде претставен животот на нашите предци кои живееле на овие подрачја во праисторијата, од 1.200 до 800 година пред новата ера. „Заливот на коските“ се вика праисторискиот град на вода, сместен зад полуостровчето Градиште кај Пештани. По две години, откако почна реализацијата на проектот, новиот музејски комплекс свечено ќе биде отворен во понеделник, во 13 часот, на христијанскиот празник Св. Климент Охридски. Изградбата на населбата чинеше 2 милиона евра, информира Паско Кузман, директор на Управата за заштита на културното наследство. Ја финансираше Владата како дел од капиталните проекти во културата.

Комплексот е составен од неколку објекти, а во него ќе бидат споени неолитот, римското време и сегашноста. Во него се влегува низ локалитетот Градиште (сместен на блиското ритче) каде што има населба од римско време. Таму во изминатата година се вршеа забрзани археолошки истражувања, конзервација и реставрација. Преку т.н. римска патека се слегува до брегот, каде што од камен е изграден пристапниот објект, предвиден за музејска презентација.

ЖИВОТОТ ВО ПРАИСТОРИЈАТА

Во објектите на наколната населба ќе има шанкче, сувенири, книги, интересни материјали за купување.  Посетителите што ќе влезат ќе го гледаат само езерото и наколната населба. Тоа ќе биде место за уживање - вели Кузман. Оттаму се влегува на платформата поставена на колци долги 6 метри. На неа се изградени осум куќи со четвртасти, правоаголни и кружни основи.

- Куќите се такви бидејќи претпоставуваме дека така биле употребувани во праисторијата. На едно место има огниште, на друго се послани кожи и сламарици за спиење, на трето има фурни за печење леб. Поставени се и оригинални керамички котлиња и грниња, што ги пронаоѓавме на дното на езерото за време на долгогодишните подводни археолошки истражувања на наколната населба. Се надевам дека посетителите ќе го доловат животот на праисторискиот човек во тоа време - објаснува Кузман, кој ја водеше акцијата.Музејскиот комплекс ќе работи во рамките на охридскиот Завод и музеј. „Заливот на коските“ ќе биде отворен во текот на целата година. Гостите ќе ги пречекува стручњак што на посетителите ќе им ја раскажува приказната за праисторискиот град. Постојано ќе биде отворена кафетерија.

ПОДВОДЕН АРХЕОЛОШКИ ТУРИЗАМ

Горе, на патот од Охрид кон манастирот „Св. Наум“ се планира да биде изграден национален ресторан. Така домашните, особено странските туристи ќе може да ги пробаат нашите специјалитети. Очекувам музејскиот комплекс да направи голема афирмација и промоција на Охрид и на Република Македонија - вели Кузман.

Во комплексот ќе има и нуркачка база, која ќе се користи и во туристички цели. Секој посетител ќе може да си плати, да изнајми опрема и во придружба на професионален нуркач да влезе во тајните на подводниот туризам. Секој љубител на дамнешните мистериозни времиња ќе може да ја разгледа населбата под вода и на дното да ги види старите колци, керамика и другите археолошки предмети.Изградбата на музејот на вода го реализираа Министерството за култура, Управата за заштита на културното наследство и Заводот и музеј од Охрид, во кој во последните шест месеци интензивно се правеше конзервација и реставрација на предметите што се изложени. Се подготвува каталошка обработка на материјалот, а ќе има и страница на интернет.

ИНФО-Комплексот чини 2 милиона евра

Изградбата на музејскиот комплекс траеше две години, а чинеше 2 милиона евра.Куќарките се градени од дрва и од прачки, а копнениот објект од камен, за да биде во амбиент со природата.За да биде поатрактивно за туристите, комплексот е наречен „Заливот на коските“. Музејот на вода е прва реконструирана наколна наслеба на Балканот. Слична има само во Костур, но денес таа е на суво откако се исушило мочуриштето во кое била изградена.

http://dnevnik.com.mk/?ItemID=5286261841B68C4C9ADEC9DC10167B05

Првиот Музеј на вода денеска свечено ќе биде отворен во Охрид, на кампот Градиште, плажа прва. Свое обраќање по повод отворањето на музејот ќе има премиерот Никола Груевски.

Инаку музејот се состои од осум куќарки на дрвени платформи, во кои ќе биде претставен животот на праисториските луѓе. Музејот е наречен “Залив на коските“.

http://www.netpress.com.mk/vest.asp?id=45741&kategorija=1

ЌЕ СЕ ПРОШИРУВА НАКОЛНАТА НАСЕЛБА КАЈ ГРАДИШТЕ, ОХРИД

Уште 16 куќарки на Музејот на вода

Уште 16 нови куќарки ќе бидат изградени на Музејот на вода, изграден на брегот на Охридското Езеро кај Градиште. Владата ќе го финансира проширувањето на реконструираната населба, која беше отворена пред два месеца, информира Паско Кузман, директор на Управата за заштита на културното наследство.

Наколната населба има 8 објекти во кои е претставен животот на нашите предци што живееле на овие подрачја во праисторијата, од 1.200 до 800 година пред новата ера. Со проширувањето, треба да бидат вкупно 24 куќарки.

- Годинава ќе изградиме уште 16 куќи. Со тоа целосно ќе биде реконструирана таа населба. Кога го отворавме Музејот на вода, сите се одушевија од тоа што го сторивме. Го презентиравме животот на луѓето во праисторијата во еден исечок од населбата. Сега има иницијатива да се реконструира целата населба - објаснува Кузман.
Платформата на која се изградени куќарките ќе биде проширена кон исток. Според остатоците под вода, таму во минатото природно се ширела населбата. Во "Македонски шуми" веќе биле порачани 1.000 кубици дрво и објавен е првиот тендер.

- Сега имаме искуство. Нема да биде како лани, се' да правиме со триста стравови и маки. В лето ќе почнеме со работа и до крајот на годинава ќе завршиме - објаснува Кузман.Музејот беше отворен на почетокот на декември. Комплексот засега е многу посетен. За викенди го разгледуваат најмалку по 150 луѓе. Билетите чинат по 100 денари за домашни и за странски туристи, а по 30 денари плаќаат студенти и војници.

Праисторискиот град на вода сместен зад полуостровчето Градиште кај Пештани се вика "Заливот на коските". Изградбата на населбата чинеше 2 милиона евра.

Комплексот е составен од неколку објекти, а во него се споени неолитот, римското време и сегашноста. Во него се влегува низ локалитетот Градиште (сместен на блиското ритче), каде има населба од римско време. Преку т.н. римска патека се слегува до брегот, каде што од камен е изграден пристапниот објект предвиден за музејска презентација. Оттука се излегува на брегот.

Платформата е поставена на колци долги 6 метри. На неа се изградени осум куќи со четвртести, правоаголни и кружни основи. Секоја од нив е сочинета од една просторија. Куќите се такви бидејќи археолозите претпоставуваат дека така се живеело во праисторијата. На едно место има огниште, на друго се постелени кожи и сламарици за спиење, на трето има фурни за печење леб. Поставени се и оригинални керамички котлиња и грниња, пронајдени на дното на езерото за време на долгодишните подводни археолошки истражувања на наколната населба.

Музејскиот комплекс работи во рамките на охридскиот Завод и музеј. "Заливот на коските" ќе биде отворен во текот на целата година. Горе, на патот од Охрид кон "Св. Наум" се планира да биде изграден национален ресторан. Во комплексот ќе има и нуркачка база, која ќе се користи и во туристички цели. Секој посетител ќе може да си плати, да изнајми опрема и во придружба на професионален нуркач да ја разгледа населбата под вода и на дното да ги види старите колци, керамика и други археолошки предмети.

Не­ма па­то­ка­зи до Му­зе­јот на во­да

Пра­ис­то­рис­ка­та на­сел­ба е от­во­ре­на ла­ни во де­кем­ври, а, спо­ред гру­ба про­цен­ка на ар­хе­о­ло­зи­те кои ра­бо­теа на неј­зи­на­та ре­конс­трук­ци­ја, днев­но ја по­се­ту­ва­ат око­лу 500 лу­ѓе. Влез­ни­ца­та чи­ни 100 де­на­ри

Заливот на коските крај Охрид е магнет за туристите

Глетката од врвот на Римскиот каструм кон езерото е неверојатно доживување за посетителите

Симеон Илиевски

ОХРИД - Реконструираната неолитска наколна населба Заливот на коските - Миќовград, што се наоѓа во близина на автокампот „Градиште“ крај Охрид, за летово се најавува како ретка туристичка атракција, единствена од ваков вид на Балканот. Од Заводот на музејот на спомениците очекуваат да се зголеми посетеноста, особено на странски гости и да почне да се зголемуваат приходите од влезниците (една е 100 денари) со што проектот би почнал економски да биде одржлив.

За разлика од нив, градоначалникот на Охрид, Александар Петрески, во неколку наврати коментираше дека проектот во кој Владата вложи околу два милиона евра не мораше да се реализира во овие тешки економски времиња и дека парите можеле порационално да се искористат. Во стручната јавност може да се слушне дека истражувањата на локацијата се почеток на подводната археологија во Македонија и тој факт треба да и' биде презентиран на пошироката јавност.

Музејот на вода или реконструираната неолитска наколна населба свечено беше пуштена на 8 декември минатата година. Се состои од осум реконструирани наколни живеалишта во кои се сместени артефакти пронајдени при подводните истражувања, како и макети кои покажуваат како луѓето некогаш живееле и со каква покуќнина се служеле. Во рамките на комплексот има музејски простор, како и место за нуркачите кои повеќе од една деценија работеле на истражувањата. Со пешачка патека Музејот на вода се поврзува со реконструираниот римски каструм, дел од римската тврдина што се наоѓа на овој простор.

„Станува збор за редок археолошки локалитет кој станува и вредна туристичка атракција. Засега објектот кој е ограден од страната на автокампот Градиште и има постојана чуварска служба. За посетителите е отворен од 9 до 15 часот, а во текот на годинашнава главна туристичка сезона ќе биде отворен од 9 до 22 часот“, вели Тања Паскали-Бунташевска, директор на Охридскиот завод и музеј. Според неа, со стручно објаснување на квалификувани водичи, посетителите можат да видат редок музеј на вода, но и да ја почувствуваат неверојатната глетка од врвот на Римскиот каструм кон езерото.

Туристичката работници тврдат дека за ова лето Музејот на вода го ставиле во своите понуди, но очекуваат во иднина да се засили пропагандата за ретката туристичка атракција.

„Потребно е во општите промотивни материјали, но и во специјализираните да го има Музејот на вода за да ни биде полесно да го ставиме и во аранжманите со странските туроператори, објаснуваат од туристичките агенции. Тие велат дека уште подобро е локалитетот да биде дел од видеоспотовите што ги финансира Владата, а се емитуваат на најпознатите светски телевизиски мрежи.

„Во подводните истражувања на наколната неолитска населба, покрај археологот Паско Кузман, повеќе од една деценија учествуваа и нуркачите од Клубот за подводни активности ’Анфора‘ од Охрид. Тие при нуркањето на овој терен случајно наишле на археолошките остатоци по што го информирале Кузман. Наоѓалиштето е наречено Миќовград според нуркачот Милутин Секуловски, а потоа ставена и додавката Заливот на Коските.

„Од почетокот сме тука и тука остануваме. По добивање соодветна дозвола од надлежните институции, подготвени сме да ги подучуваме посетителите на нуркање и заедно под вода да ги видиме местата од каде што ги вадевме археолошките предмети. Тоа е неповторливо доживување“, вели нуркачот Милутин Секуловски.

За охридскиот Музеј на вода и натаму има препукувања меѓу централната власт на ВМРО-ДПМНЕ што го финансираше проектот и локалната самоуправа на чие чело е градоначалникот Александар Петрески од СДСМ. Реновираните осум неолитски куќи Петрески ги нарече „најскапи сламени колиби“ изградени за предизборни цели. Министерството за култура најави за годинава или за следната година дека ќе реконструира уште неколку куќи со што ќе се комплетира наколното живеалиште. Дали оптимизмот на централната власт дека населбата ќе биде археолошки и туристички одржлива атракција или, пак, скап проект за ова време како што тврдат од локалната власт, ќе покаже токму оваа туристичка сезона.

Се гради потпорен ѕид и се проширува паркингот кај Музејот на вода кај Градиште, на брегот на Охридското Езеро. Работите треба да завршат до почетокот на летната сезона. Постојниот паркинг простор е импровизиран и премал за репрезентативниот комплекс кој се покажа како вистински магнет за посетители. Но се уште не се реализира минатогодишната најава дека ќе се прошири наколната населба со дополнителни 16 куќарки.

Музејскиот комплекс се градеше од мај до декември 2008 година и работи во рамките на охридскиот Завод и музеј. Конципиран е околу обновата на наколна населба од бронзеното време која датира од 1200 до 600 година пред новата ера, за која според истражувањата се претпоставува дека своевремено се простирала на површина од околу 8.500 квадратни метри. Платформата е поставена на колци долги 6 метри и е поврзана со копнениот дел на комплексот со мост долг 15 метри. Изградбата чинеше 2 милиона евра. Паралелно со реализацијата на проектот Музеј на вода, реконструирано е и воено утврдување од римско време, таканаречен каструм, кој се наоѓа на ридот над Заливот на коските. Предвидено е да се направи и нуркачка база за туристички цели. Секој посетител ќе може да изнајми опрема и во придружба на професионален нуркач под вода да ги разгледува артефактите и другите остатоци од старата населба.

Охрид, 21. август 2010 (ИНПРЕС)

Денеска започна изградбата на уште 16 нови куќички во Наколната населба во Градиште, со што овој локалитет ќе го добие ликот на некогашната населба која тука постоела во периодот од бакарното до железното доба.

До крајот на октомври  ќе се заврши целата реконструкција на проектот Музеј на вода каде на површина од околу 2500 метри квадратни   ќе има распослано 24 праисториски куќарки.

- Овој туристички објект ќе биде од големо значење за културната моќ на нашата држава. Импозантни се бројките и фактите на посетеност. Минатата година имавме бројка од над 30 илјади посетители во летниот период сега веќе на неделна основа има продажба на карти од 2.500 посетители, изјави министерката за култура Елизабета Канческа - Милеска.

Наколната праисториска населба, платформата а и самите куќички се прават од дабово дрво кое потекнува од планинските предели кај Кичево. За импрегнација, на дрвото биле потрошени 10 милиони денари.

- Импрегнирањето на дабовите дрва се одвива во фабрика во  Бугарија. Очекуваме уште 20 шлепери  да пристигнат по што излупени и исшилени се поставиваат на овој локалитет, вели Паско Кзуман, директор на Управата за заштита на културното наследство.

Наколната населба доби уште десет нови куќички

До крајот на овој месец ќе биде завршена изградбата на наколната населба во Градиште. На постоечките осум куќички, доизградени се уште десет. Остануваат уште неколку за нивната бројка да биде 24, колку што броела населбата, според подводните истражувања