ВО КАПИШТЕЦ СЕ ГРАДИ НА СЕКОЈ СЛОБОДЕН ПРОСТОР

Инвеститорот има градежна дозвола за деловен објект, а жителите на Капиштец бараат да се промени урбанистичкиот план и на тоа место да се гради училиште

Фирмата „Тинекс“ деновиве почна да гради деловен објект со катна гаража спроти управната зграда на „Жито лукс“ во населбата Капиштец, а жителите од околните згради викендов протестираа против изградбата, со образложение дека на тој простор им било ветено училиште или градинка. Од Општина Центар велат дека според детаљниот урбанистички план за Капиштец на локацијата е предвиден деловен објект. Според надлежните, инвеститорот има градежна дозвола и ги уплатил парите за комуналии, со што може непречено да гради.

Сопственикот на маркетите „Тинекс“, Владимир Тодоровиќ, вели дека на просторот ќе гради комплекс од деловни простории, маркет и катна гаража со 500 места.

- За намената на деловните простории дополнително ќе размислуваме. Локацијата ја купив на лицитација пред три години. Целиот проект е во согласност со детаљниот план, се' е како што налагаат законите - вели Тодоровиќ.

Авторот на проектот, архитектот Драги Зафиров, објаснува дека катната гаража ќе биде скриена во објектот и нема да се гледа однадвор.

- Ќе се гради на површина од 18 илјади квадратни метри, а објектот ќе биде висок 13,5 метри. Катната гаража ќе има еден кат под земја и два над и ќе биде поделена на неколку полунивоа. Објектот ќе биде готов за една година - вели Зафиров.

Инвестицијата ќе чини околу 12 милиони евра. Тодоровиќ вели дека предност за користење на гаражата ќе имаат вработените во објектот, посетителите и жителите од соседните згради, кои ќе имаат можност и да ги откупуваат местата за паркирање за подолг период. Тој додаде дека паркингот нема да биде бесплатен, но ќе може да го користат сите граѓани.

Жителите се против изградбата на објектот, бидејќи како што велат, тој ќе им го одземе слободниот простор пред зградите и децата ќе нема каде да играат.

- И лани сакаа да градат на оваа локација, но ние собравме 500 потписи и ја спречивме градбата. Кога ги купувавме становите пред две децении ни кажаа дека на тоа место ќе се гради училиште или градинка. Градоначалничката на Центар, Виолета Аларова се однесува како Капиштец да е нејзин двор. Ние не сме против инвеститорот, туку сме против Општина Центар, која носи несоодветни урбанистички решенија, кои се спротивни на Генералниот урбанистички план - вели Илија Димитриев од Капиштец.

Жителите ќе испратат писма до сите надлежни институции со барање да се промени урбанистичкиот план, а со допис ќе се јават и до Антикорупциската комисија. Тие повторно ќе собираат потписи во надеж дека тоа ќе има ефект кај надлежните.

- Ќе се задушиме овде. Имаме маркети колку сакаме, не ни треба уште еден. За да биде функционална катната гаража, треба да има приод од најмалку две главни улици. Оваа се гради на споредни улички и ќе предизвика метеж. Градоначалничката Аларова со месеци не сака да не' прими и да го чуе нашето мислење. Таа како воопшто да не е со своите сограѓани - се жалат жителите на Капиштец.

Марија Тасев

Жителите од Капиштец не сакаат во нивната населба да се гради катна гаража, која ќе се гради спроти дирекцијата на "Жито лукс" на аголот меѓу улиците Народен фронт и Васил Ѓорѓов. Тие вчера се собраа во Општина Центар со барање Општината или да го смени Деталниот урбанистички план Капиштец, каде уште во 2001 година било предвидено да се гради катна гаража, или пак инвеститорот да ја намали катноста на објектот, кој ќе биде висок 17 метри.
"Ќе немаме зеленило. Меѓу зградите ќе ни изградат уште еден кинески sид. Од една страна се душиме со бензинската кај Автомото сојузот, а од другата страна сега и со катната гаража. Знаеме дека инвеститорот е чист и дека ги има сите потребни документи за градба, но ако може да ја намали висината на објектот, бидејќи ќе го задуши целиот простор", велат жителите од Капиштец.
Тие побараа инвеститорот Владимир Тодоровиќ, сопственик на синџирот маркети "Тинекс" и на фирмата "Антера", која во 2003 година го купила земјиштето на јавно наддавање, во проектот за изградба на гаражата да го смени влезот во неа.
"Ако може влезот да биде на улицата Васил Ѓорѓов, а не тој да е од страната на зградите, бидејќи нема да можеме да дишеме ниту пак дете да пуштиме надвор", велат жителите на Капиштец.
Земјиштето кое газдата на "Тинекс" го купил за да гради катна гаража зафаќа површина од 7.200 квадратни метри, а гаражата ќе се гради на површина од 3.200 квадратни метри. Таа ќе има приземје и три ката, и треба да има околу 500 паркинг места. На приземниот дел ќе има дуќани, додека во подрумскиот дел, јадрото на објектот и на катовите места за паркирање. Тодоровиќ објасни дека детското игралиште што сега се наоѓа на неговата парцела нема да го урива, бидејќи и по ДУП таму е предвидено игралиште и дека околниот простор ќе го уреди со зеленило.
"Мене не ми пречи да го сменам влезот во објектот, но според правилата влез во катна гаража од главна улица не е дозволен", рече Тодоровиќ.
Тој објасни дека во тек се подготовките за отпочнување на градежните активности и дека за една година треба да ја изградат катната гаража.
Револтираните жители и сопственикот на земјиштето ги прими градоначалничката на Општина Центар Виолета Аларова. Таа им објасни дека катната гаража со висина од 17 метри е предвидена во планот од 2001 година и дека сега е доцна за какви било интервенции.
(Е.А.)

Премиерот Никола Груевски и Владимир Тодоровиќ, сопственикот на маркетите „Тинекс“, вчера го поставија камен-темелникот на новата катна гаража, која ќе се гради спроти дирекцијата на „Жито лукс“ во населбата Капиштец. Темелите ги освети г.г. Стефан, поглаварот на Македонската православна црква, а на свеченото почнување на изградбата присуствуваа и Михајло Маневски и Миле Јанакиевски, министрите за правда и транспорт и врски. - Катната гаража сама по себе претставува груба градба. Затоа, во проектот е предвиден деловно-комерцијален објект. Гаражата ќе биде сместена во средишниот дел и ќе собира 500 возила, ќе има супермаркет и дваесет деловни локации, кои се надевам дека ќе ги задоволат потребите на граѓаните. Објектот ќе се гради на површина од 3.500 квадратни метри - рече инвеститорот Тодоровиќ. Тој нагласи дека земјиштето е купено на јавно наддавање и дека е предвидено со Деталниот урбанистички план на општината Центар. Тодоровиќ вети дека градбата според димензиите и намената нема да отстапи од предвиденото. Според најавите, дел деловни канцеларии може да се пренаменат во хотел. - Тоа е опција што е оставена како варијанта доколку не се најде закупувач за локациите што ќе се понудат. Во секој случај се работи за мал дел од вкупната квадратура - дополни Тодоровиќ. Фирма-изведувач е „Гранит“, а проектант „Ма дизајн“. Пред околу две недели жителите со возила ја блокираа улицата Васил Ѓоргов, зашто беа против изградбата на таков објект пред нивните згради. Тие тврдеа дека општинарите и другите надлежни институции не смееле да одобрат изградба на каков било објект, без претходно да ги информираат нив. Жителите се против изградбата зашто, според нив, оваа населба била двојно погусто населена од другите населби. Тие се жалат дека градителите им го одземаат единствениот празен простор и паркинг во овој дел и стравуваат дека на тоа место ќе никне објект со поголем габарит од предвиденото. Откако просторот се огради и се претвори во градилиште, сообраќајниот метеж во оваа населба се зголеми зашто станарите се принудени да ги паркираат своите возила каде што ќе стигнат. Инвеститорот Тодоровиќ е сопственик на парцелата веќе три години, а земјиштето го добил на јавно наддавање. Тој пред извесно време рече дека тој бил единствениот инвеститор што се сретнал со жителите и им ја приложил целата документација потребна за градба. Општинарите во Центар пред околу еден месец им објаснија на жителите дека ваков деловно-комерцијален објект е предвиден во Деталниот урбанистички план за овој дел.

Р. П.

Жители од Капиштец бараат да се запре изградбата на катната гаража

За случајот веќе е поведена судска постапка

Жителите на Капиштец, во чија близина на улицата „Васил Ѓорѓов“ се гради катна гаража со деловен објект, чиј инвеститор е АНТЕРА-ДООЕЛ, фирма - ќерка на „Тинекс“, бараат надлежните да му ја одземат парцелата на инвеститорот и да ги стопираат градежните активности на објектот. Како основа на барањето тие го наведуваат купопродажниот договор за земјиштето, кој според нив не е испочитуван од страна на инвеститорот. Имено, АНТЕРА одамна ги пробила роковите наведени во договорот, една година од денот на неговото потпишување да се обезбеди дозволата за градба, а шест месеци потоа да почнат активностите на терен. Како потврда за нивните наводи, жителите го приложуваат договорот кој е потпишан на 28 јануари 2004 година. Надлежните вчера не беа достапни за коментар, а одговор не добивме ниту од „Тинекс“, бидејќи правната застапничка беше службено отсутна.

Граѓаните имаат поведено судска постапка. Својот револт жителите го искажаа пред почетокот на изградбата, кога ја блокираа улицата „Васил Ѓоргов“ во близина на дирекцијата на „Жито лукс“. Но, општинарите од Центар тогаш одржаа средба со жителите и со газдата на „Тинекс“ Владимир Тодоровиќ, приложувајќи притоа документи со кои тврдеа дека изградбата е легална. (Дс.Т.)

Aктивности околу катната гаража на „Тинекс“ ги револтираа граѓаните

Општината тврди дека инвеститорот поседува уредна документација и гради согласно со ДУП

Жителите на Капиштец повторно реагираат на изградбата на катната гаража на „Тинекс“, иако уште кога стартуваа градежните активности, инвеститорот и општинарите укажаа дека објектот се гради согласно со ДУП и за него инвеститорот ја поседува потребната документација. Жителите реагираат на најавите за уништување на детското игралиште и сечата на неколку дрва во паркот за потребите на новиот објект, кои сега се наоѓаат во непосредна близина на градилиштето. Вчера таму се поставуваа бетонски огради со кои според надлежните од Општината се заградува просторот на кој ќе се врши партерно и хортикултурно уредување.

Владимир Тодоровиќ, инвеститор на објектот, кој од завчера и официјално стана градоначалник на Општина Центар, вчера беше зафатен да ги искоментира реакциите на жителите, па за случајот не' упати кај градежниот инспектор Милан Пижула. Како и пред неколку месеци, и вчера инспекторот објасни дека инвеститорот гради според одобрениот проект и според ДУП и дека поседува уредна документација.

„Тоа што денеска се заградува е за изградба на пешачки пристапни патеки и целосно ново хортикултурно уредување на просторот. Сервисната улица, пак, е предвидена со планот и таа, најверојатно, во скоро време ќе почне да се реализира од страна на Општината. Таа ќе ги поврзува улиците ‘Народен фронт‘ и ‘Васил Ѓорѓов‘“, дообјасни Пижула. (Дс.Т.)

Роза Петкова


Триста паркинг-места ќе има новата катна гаража со деловни канцеларии која се гради во населбата Капиштец, најавува инвеститорот „Антера“. Од компанијата која е ќерка-фирма на маркетите „Тинекс“, чијшто сопственик е градоначалникот на Центар, Владимир Тодоровиќ, очекуваат објектот да биде готов до септември. Освен по катовите и на поткровјето, паркирање е обезбедено, како што тврдат, и во подрумот и на надворешниот паркинг. Од фирмата велат дека во наредните два месеци ќе се работи на партерното уредување и на приклучоците за струја, вода и за греење. - Внатре во објектот има 300 места за паркирање распоредени на четирите ката и на поткровјето, како и 80 места во подрумот и сто на надворешниот паркинг. Во подрумот ќе има и пералница за коли, а на приземјето супермаркет и дуќани. По катовите, по должина на фасадата, се сместени деловните канцеларии “ велат во „Антера“. Оттаму објаснуваат дека граѓаните од околните згради ќе може да си откупат или резервираат место за паркирање во објектот, но не сакаа да откријат по која цена. - Веќе испративме понуди до станарите, оставени се на огласните табли во зградите и таму стои цената за откуп на место за паркирање. Засега нема ограничување на бројот на места кој го нудиме зашто првенствено треба да видиме колку се заинтересирани “ велат од „Антера“, кои не сакаа да кажат колку места досега се закупени, туку одговорија дека се помалку од сто. Сепак, во влезовите на зградите околу катната гаража немаше ниту едно соопштение за продажбата на паркинг-места, а при обиколка на објектот, не можевме да го забележиме ниту влезот за возила. Од Општина Центар не сакаа да дадат информации за катната гаража, туку само потврдија дека според ДУП е предвидено меѓу белите кули и новиот објект да се пробие сервисна улица, која ќе биде врска на улицата Васил Ѓорѓов со Народен фронт. Од „Антера“ велат дека голем интерес има и за закупот на простор за дуќани, а некои фирми преку фискалните сметки веќе ги известуваат граѓаните дека ќе имаат свој продажен простор во комерцијалниот центар во Капиштец. Изградбата на објектот уште од почетокот предизвика реакции во јавноста поради стравот дека и оваа градба, како и многу други кои се водат во деталните урбанистички планови како катни гаражи, ќе се претвори во уште еден нов трговски центар. На поставувањето на камен-темелникот пред две години, Тодоровиќ изјави дека во проектот е предвиден деловно-комерцијален објект, а гаражата ќе биде сместена во средишниот дел и ќе собира 500 возила, ќе има супермаркет и дваесет деловни локации. Тој тогаш најави дека дел од деловните канцеларии може да се пренаменат во хотел, ако не се најде закупувач за локациите што ќе се понудат. Жители од населбата во почетокот на изградбата протестираа и со возила ја блокираа улицата Васил Ѓоргов зашто, како што тврдеа, објектот ќе им го затвори просторот, а возилата кои ќе се паркираат на катови, ќе ја загадат нивната околина.

Катната гаража на "Тинекс" готова до септември

Катната гаража ќе има седум платформи, секоја од по 1.000 квадратни метри и ќе има капацитет за 300 возила

ИНВЕСТИЦИЈА ВРЕДНА 8 МИЛИОНИ ЕВРА

Зебра - прва катна гаража во Скопје

Осум милиони евра тежи инвестирањето во првата катна гаража "Зебра" која по две години изградба од завчеравечер е отворена во Капиштец, на улицата Васил Ѓоргов. Освен паркинг простор во зградата има и деловни простории, хипер-маркет, аптека, пицерија, кафуле, банка, продавница за детски играчки и облека, парфимерија, хемиско чистење и продавница за мобилни телефони. Исто така ќе работи и мал хотел со 30 соби.

Зебра нуди катно паркирање на седум платформи со вкупна површина од 7.000 метри квадратни, со капацитет за 300 возила, и уште дополнителни 150 места во подрумскиот дел и на отворениот паркинг. Некои од паркинзите се понудени и на продажба, по цена од околу 6 ипол илјади евра. Жителите од околните згради ќе добијат попуст.

Еден час за паркинг ќе се наплаќа 20 денари, а за посетителите кои пазарувале во објектот првите два часа ќе бидат бесплатни. Ќе се продаваат месечни и годишни карти со бенефиции.
Менаџерскиот тим на Зебра најави дека со новиот објект се отворени 350 нови работни места. Објектот има три контролирани автоматски врати за влез и излез.
Земјиштето за катната гаража беше откупено во 2003 година, а изградбата започна пред 2 години.