Телеком арена (арена Филип II Македонски)

Се урива западната трибина на стадионот

Новоизградената трибина ќе има 7.000 седишта распоредени во 31 ред

Миодраг Мицковиќ


На градскиот стадион во тек се градежни активности околу уривање на западната трибина, лоцирана до игралиштето на „Работнички“. На нејзино место ќе никне нова трибина на две нивоа со 7.000 седишта во 31 ред, додека долниот дел ќе биде деловен простор за спортски активности. Трибината ќе има шест влеза, а до неа навивачите ќе доаѓаат преку двата моста, од северната и од јужната трибина. Со оглед на тоа дека голем дел од западната трибина навлегува во игралиштето на „Работнички“, тоа ќе биде поместено, па наместо сегашната положба запад-исток, ќе биде насочено во правец север-југ и ќе биде покусо во должина од 90 метри, но доволно да се играат првенствени натпревари.

Арената „Филип Втори“ до крајот на 2013 година, кога ќе биде целосно завршена, со изградбата на западна и источна трибина и со реновирање на постојната јужна, ќе биде вистинска фудбалска убавица. Ќе може да прими точно 35.487 гледачи, секој со свое седиште. Стадионот ќе биде опремен со модерни рефлектори, осум атлетски патеки, голем семафор со видеобим, продавници, ресторани, мини-хотел, санитарни јазли на секое ниво од трибините.

Рефлекторите под покривот на северната и новите што ќе бидат монтирани на јужната трибина, со јачина од 1.600 лукса, ќе бидат доволни за ноќните фудбалски натпревари, па рефлекторите што ќе се постават на западната и на источната трибина ќе ја осветлуваат атлетската патека, која ќе биде реновирана. Се предвидува на стадионот да има осум атлетски патеки за да може да се одржуваат меѓународни натпревари, а целосно ќе се реновираат и местата за скок во далечина и трискок, за трката на 3.000 метри стипл-чез. Исто така, по завршувањето на двете трибини, во план е да се реновира и теренот на стадионот, бидејќи последен пат е обновен во 1991 година.

За комплетен нов изглед на арената, ќе се реновира и јужната трибина, на која ќе се постават нови столчиња, ќе се обноват бетонските подлоги на кои се монтирани, комплетно ќе се смени металната ограда меѓу редовите, а ќе се изградат и санитарни јазли, кои беа во проектот, но никогаш не се изградија. Наедно, ќе се смени и покривачот на железниот покрив на трибината и ќе се освежат со боја сите железни делови на столбовите што го држат покривот. Ќе останат шест влеза и излези на трибините, како и досега, бидејќи не постојат можности да се изградат нови, приодот до јужната трибина ќе биде како и досега, од двата моста што ја поврзуваат, на почетокот и на крајот од бедемот во Градски парк.

Инаку, уривањето и изградбата на северната трибина чинеше околу 14,5 милиони евра, но засега никој не ја спомнува сумата потребна за изградба на западната и на источната трибина, за реновирање на јужната, за изградба на осумте атлетски патеки... Според некои непотврдени информации, таа се движи од 40 до 45 милиони евра. Арената „Филип Втори“ е во сопственост на Владата и со неа стопанисува ЈП за станбен и деловен простор, но голем дел од јужната трибина, освен соблекувалните, просториите за судии, делегати и за тренери, се во сопственост на „Силекс“. Многу се шпекулираше околу цената по која „Силекс“ го купи овој поттрибински простор на стадионот во јули 1988 година за 2,5 милијарди динари, или тогашни 1,7 милиони марки. Но, иако просторијата наменета за прес-центар, која ја има купено „Силекс“, според договорот купувачот мора да ја отстапува на користење на стадионот за време на натпревари, таа сега е затворена, а се користи само за потребите на ТВ Сител.