Автопат Демир Капија - Смоквица

Веќе пет месеци се одлучува кој и кога ќе почне да ја гради делницата Демир Капија-Смоквица, откако 15 конзорциуми веќе доставија понуди за изградба на автопатот од Коридорот 10

Пет месеци откако 15 конзорциуми доставија понуди за изградба на автопатот Демир Капија-Смоквица сè уште не се знае кој ќе ја гради последната делница од Коридорот 10 и кога ќе започнат градежните активности.

Иако Министерството за финансии уште на крајот на март на Европската комисија ѝ достави листа со компании кои имаат најповолни понуди за тендерот, сè уште никој не кажува која компанија ќе ја гради делницата Демир Капија-Смоквица.

Домашните градежни компании, кои со душа чекаат да почне да се гради еден од најголемите инфраструктурни проекти во земјава за и тие да земат дел од колачот вреден 270 милиони евра како подизведувачи, негодуваат што тендерот се пролонгира. Автопатот веќе требаше да почне да се гради, велат домашните градежници. Се жалат дека одложувањето на изборот на компанијата која ќе ја гради делницата, дел од Коридорот 10, лошо ќе се одрзи врз целата градежна индустрија, која поради кризата, сè помалку работи на големи градежни зафати.

Од делегацијата на Европската комисија во Македонија не добивме информација кој е крајниот рок за избор на изведувач на градежните работи за автопатот, ниту пак, кога најрано може да се очекува почеток на градежните работи.

Од Министерството за финансии пак, надлежно за водење на тендерската постапка, потврдија дека чекаат одоговор од Комисијата и дека тие доставиле свои предлози, за коишто финансиерот на проектот го има крајниот збор.

„Министерството за финансии ја разгледа тендерската докуменатција и направи избор на компании. Истата документација е доставена до финансиерот на проектот, Европската комисија, од каде што се чека повратен одговор“, велат од Министерството.

Актор, Тодини и Мапа во тесен избор за Коридорот 10

Иако од Министерството за финансии тврдат дека процесот за избор на конзорциум не е забавен, домашните градежни компании оценуваат дека изградбата на Демир Капија-Смоквица, сепак, се одложува.

„Се забави проектот за изградба на автопатот Демир Капија-Смоквица. Годинава беше најавен, а сè уште не е започната неговата реализација. Сето тоа лошо влијае на прогресот на градежништвото, кое требаше и годинава да биде двигател“, вели Драган Манаилов, управител на градежната компанија Синтек.

Според него, уште од почетокот на годината се забавува градежната активност и се намалуваат инвестициите во капитални проекти.

Ниту Здружението за градежна индустрија при Стопанската комора нема никакви информации до каде е тендерската постапка за Коридорот 10.

„Се пријавија 15 конзорциуми и Владата требаше да избере која има најдобра понуда. Ова е најважен инфраструктурен проект во државата. Зошто се пролонгира постапката не знаеме, досега требаше да биде избрана компанија“, вели Никола Велков од Здружението.

Тој потенцира дека овој проект е важен за македонската градежна оператива и кој и да го добие тендерот, ќе ги ангажира македонските градежни компании како подизведувачи.

Како што пред еден месец пишуваше „Капитал“, грчката компанија Актор, италијанскиот конзорциум Тодини и турската Мапа се во тесниот избор на компании кои доставиле најдобри понуди на тендерот за изградба на автопатот Демир Капија-Смоквица, последната делница од Коридорот 10.

На јавниот повик за избор на градежна компанија, којшто заврши на почетокот на јануари, понуди доставија 14 европски и еден конзорциум од Кина, а најголем интерес покажаа градежни компании од Италија. Автопатската делница Демир Капија–Смоквица е долга 28,2 километри, а проектот е проценет на 270 милиони евра, пари обезбедени од ЕИБ, ЕБОР и ИПА претпристапните фондови на Европската комисија.

http://www.kapital.com.mk/mk/dneven_vesnik.aspx/83595/zoshto_se_odolzhuva_izgradbata_na_demir_kapija-smokvica_!.aspx?iId=2717