Градежната компанија „Бетон“ од Скопје објави дека склучила договор вреден 299 милиони денари (4,9 милиони евра) со Министерството за транспорт и врски. Во сумата од договорот е вклучен и данокот за додадена вредност (ДДВ).

Според овој договор, „Бетон“ треба да изврши активности на реконструкција на административната зграда на Министерството во Скопје, се вели во дописот испратен до Македонската берза за хартии од вредност.

Инаку оваа зделка е шеста по ред од 23 мај годинава.

Вкупните зделки склучени меѓу државата и компанијата досега изнесуваа 28,49 милиони евра за потребите на проектот „Скопје 2014,“ а покрај ова „Бетон“ склучи и договор вреден 2,1 милион евра за изградба на училиште во населбата Аеродром, со што вкупниот цех на државата кај оваа градежна фирма изнесуваше 30,59 милиони евра од 23 мај до вчера.

Со оваа најнова зделка вредна 4,9 милиони евра, вкупната вредност на договорите што „Бетон,“ во период од 5 месеци ги потпиша со власта, се искачија на 35,49 милиони евра.

http://www.time.mk/read/NONE/6159e15bc2/index.html

вторник, 23 август 2011, 17:17

Нова фасада на Транспорт, нов плоштад пред него

Никола Крстиќ

Вака, најверојатно, ќе изгледа новата проширена и надградена зграда на Министерството за транспорт и врски. Ќе се доградат два ката, ќе се реновира внатрешноста, но ќе се смени и надворешноста. Сепак, надлежните не откриваат дали оваа неокласична фасада е конечната варијанта за која се одлучиле од понудените на конкурсот за идејно решение. Веќе е распишан и тендер за избор на изведувач на градежните работи.

Во меѓувреме, со полна пареа се работи на просторот пред Министерстовото – се оформува Плоштадот Карпошово востание. Крајно време беше влезот во Старата чаршија да добие нов лик, велат граѓаните.

-Мислам дека треба да се заокружи, не може да остане така, влез во Чаршија е.
-Сè што се гради, сè е убаво, останува за век и веков.
-Многу убаво е, прекрасно е - велат граѓаните.

На местото на правливата калдрма и неуредното паркиралиште, ќе се надвиши нов комплекс со споменици и водоскоци. Идејното решение е на Валентина Стевановска, скулпторката која го изработи Воинот на коњ. Централно место ќе зазема фонтаната-постамент во облик на солза висока 15 метри на која ќе биде поставен 13-метарски споменик, официјално именуван само како Воин, за кој во јавноста се шпкулира дека ќе го претставува Филип II Македонски. Лево и десно од веќе поставените паметници на просветителите, ќе има два водоскока со скулптури на коњи, а на четвртиот ќе бидат поставени скулптури на мајки со деца. Ова е глинениот модел во конечната големина на една од нив.

„Ова е една од фигурите  што ќе биде поставена од другата страна на мостот, односно на плоштадот Карпошово Востание. Таму ќе биде поставен воинот, ќе има повеќе придружни фигури, ќе има фонтана со уште три други помали, кои ќе претставуваат една целина. Има повеќе придружни фигури, има повеќе релјефи, има војници, коњи, лавови” вели Валентина Каранфилова – Стевановска, академски скулптор (02 07 2011).

Изградбата на комплексот му е доверена на “Бетон” кој победи на меѓународниот тендер на Општина Центар.

-Што ќе се гради овде?
-Спменик.
-До кога треба да биде готов?
-Не знам.
-А чиј споменик?
-На Филип Македонски - вели еден од вработените на градилиштето.

Поставувањето на спомениците веројатно ќе почека до наредното лето бидејќи сè уште се прават во италијанската леарница „Фон­де­ри­ја ар­ти­сти­ка Гу­а­сти­ни”. Механизмот на фонтаните го изработува „Делта”, истата италијанска фирма задолжена и за фонтаната на Плоштадот Македонија.