Зградата-убиец отвори нова мистерија

Истрагата за најдените човечки остатоци во зградата на поранешна Југобанка сé уште трае. Резултатите од обдукцијата ќе бидат познати за неколку дена. Полицајци вчера го обезбедуваа просторот околу зградата и не им дозволуваа на минувачите да се задржуваат на местото на злосторството

Зградата-убиец во центарот на Скопје отвори уште една мистерија. Во вторникот на еден од катовите градежни работници најдоа череп и коски од човек. Случајот засега е енигма и за полицијата, истражниот судија и за лекарите од Институтот за судска медицина и криминалистика. Никој во моментов не кажува за што станува збор. Истрагата за најдените човечки остатоци во зградата на поранешна Југобанка сé уште трае. Резултатите од обдукцијата ќе бидат познати за неколку дена.

Полицајци вчера го обезбедуваа просторот околу зградата и не им дозволуваа на минувачите да се задржуваат на местото на злосторството. Истражители ја пребаруваа зградата и го сликаа местото каде што работниците ги најдоа остатоците од човек.

Десеткатната грдосија во Градски ѕид, која цели дваесет години стоеше запуштена, ќе остане запаметена како зграда на смртта. Исправена среде градот, со години им беше засолниште на скопските питачи, скитници, и проститутки и свратилиште на разни сомнителни типови и наркомани. За скопјани оваа зграда ќе остане запаметена како место на хоророт и стравот. Таа уште долго ќе останеше зграда на злото доколку Министерството за финансии не одлучеше да ја догради за сопствени потреби. Фасадата во неокласичен стил треба да ги затвори лошите спомени за оваа зграда-убиец.

Во неа досега неколку пати паѓаа и умираа луѓето. Пред десетина години овде татко пропадна во подрумските простории, враќајќи се со ќерка си од вечерната претстава на киното од соседната улица Македонија. Последниот случај беше во јануари годинава, кога беше пронајден скитник што барал топло засолниште од сибирските студови. Овде беа најдени и безживотните тела на двајца мажи. Во 2009 година бездомник беше најден мртов. На неговото тело не беа најдени траги на насилство. Истрагата подоцна утврди оти починал од природна смрт.

Бездомници и наркозависници секојдневно го окупираа објектот и го користеа како преноќиште и собиралиште. Се караа, се тепаа. Соседите неколкупати реагирале на собирањето сомнителни типови. Полицијата доаѓаше и ги растеруваше, но попусто, тие пак доаѓаа. Влезот на приземјето неколку пати беше заѕидан, повторно правеа дупка, се провираа низ неа и влегуваа внатре. Околината беше загадена, а станарите на околните згради немаа мирен сон.

Зградата, која се наоѓа на десеттина метри од најпрометната улица во државата, улицата Македонија, позната со многубројните споменици, до неодамна беше депонија од картони и од пластични амбалажи.

Душеци, детски колички, чевли и шут беа расфрлени во околниот простор. Жителите на Скопје го одбегнуваа ова место, кое беше запуштено од градските комунални претпријатија и администрација. Дали новата неокласична зграда на Министерство за финансии ќе ја прекине црната серија на зградата на Југобанка?