ЕВН Македонија е најголем увозник и прв муштерија на трговците со струја 

За првите 10 месеци целиот обем на истргувана електрична енергија на нашиот пазар вреди околу 120 милиони евра.

ЕВН Македонија е најголем увозник на електрична енергија во земјава во првите десет месеци годинава, покажуваат официјалните податоци на Операторот на пазар на електрична енергија. За првите десет месеци ЕВН Македонија увезла над 557.000 мегаватчасови електрична енергија и годинава го презеде приматот од рударско-преработувачкиот комбинат ФЕНИ Индустри кој долги години наназад важеше за најголем потрошувач на електрична енергија во земјава. Од споредбата на официјалните податоци се гледа дека ЕВН Македонија само за првите десет месеци годинава увезла 200.000 мегаватчасови повеќе електрична енергија отколку за цела година лани.

ЕВН Македонија годинава го замени ЕЛЕМ кој до лани увезуваше електрична енергија и за потребите на тарифните потрошувачи кои ги снабдува ЕВН Македонија. Според познавачите, поскапувањето во август и укинувањето на евтината тарифа во дневните часови е последица на тоа што ЕВН Македонија го презеде увозот за сопствените потреби.

ЕВН Македонија ќе биде најголем муштерија на продавачите на струја

Минатата година ЕВН Македонија за цела година по пазарни цени купила повеќе од 341.000 мегаватчасови електрична енергија за задоволување на потребите на тарифните потрошувачи. Со тоа купено количество оваа компанија лани била на 4 место на листата на најголеми потрошувачи на струја и во целиот обем на тргувана електрична енергија учествувала со 12,4 отсто.

За првите десет месеци годинава таа компанија е најголем купувач на електрична енергија на пазарот и држи 27,2 отсто од целата трговија со електрична енергија. На второ место годинава падна ФЕНИ Индустри со мал заостаток зад ЕВН Македонија и со пазарно учество од 26,6 отсто. Државниот производител на електрична енергија ЕЛЕМ е на трето место со пазарно учество од 12,2 отсто, односно со купени над 250.000 мегаватчасови електрична енергија. На четврто место на листата на најголеми потрошувачи на струја е комбинатот „Југохром Фероалојс“ од Јегуновце со пазарно учество од 12,1 отсто, а на петтото место годинава е МЕПСО со пазарно учество од 6,3 отсто.

Трговијата со струја во Македонија досега вреди околу 120 милиони евра

И покрај тоа што нема организиран пазар за тргување со електрична енергија односно берза, во Македонија годишно се купува и продава електрична енергија во вредност од барем 100 милиони евра. Сега на македонскиот пазар електричната енергија се тргува на два начини. Прво, со билатерални договори меѓу трговците и големите компании: ФЕНИ Индустри, Југохром Фероалојс, ОКТА, Бучим, Макстил, УСЈЕ, Скопски легури и Митал Стил. И второ на тендери – практика што ја применуваат ЕЛЕМ, ЕВН Македонија и МЕПСО. Заради тоа што нема организирано тргување и нема берза за струја во земјава нема транспарентна пазарна цена која ќе се постигнува на дневно ниво за тргување по моделот „ден претходно“ или по моделот „во тек на денот“ како што е практика на регионалните берзи за тргување со електрична енергија и капацитети.

http://www.mkd.mk/78903/ekonomija/evn-makedonija-e-najgolem-uvoznik-i-prv-musterija-na-trgovcite-so-struja/

Македонскиот пазар на струја свртел над 17 милиони евра во април и мај

Најголем купувач на струја во земјава останува „Фени индустри“, а најголем продавач на електрична енергија е ЕФТ МК.

Учесниците на македонскиот пазар на електрична енергија во април и мај свртеле околу 17,5 милиони евра за купопродажби на електрична енергија, покажува анализа на МКД.МК на официјални податоци на Операторот на пазар на електрична енергија. Како референтна цена е земена 50 евра за мегават-час електрична енергија, која е најблиска до цената за овој период постигната на романската берза за електрична енергија ОПЦОМ.

„Фени индустри“, кавадаречкиот комбинат за производство на никел е најголемиот купувач на струја во земјава, кој за април и за мај презел околу 146.000 мегават-часа електрична енергија, за што платил околу 5,3 милиони евра.

Трговската компанија ЕФТ МК и во периодот април и мај останува најголем продавач на струја на македонскиот пазар. Според референтната цена од 50 евра за мегават-час, таа компанија инкасирала приходи од продажба од околу 5,3 милиони евра за кои снабдила свои клиенти со повеќе од 140.000 мегават-часа електрична енергија.

Втора на листата е словенечката трговска компанија ГЕН И преку нејзината македонска фирма ГЕН М која остварила приходи од продажба во вредност од речиси 6 милиони евра за овој период. Во споредба со лани оваа компанија значајно го зголемила своето пазарно учество. Трет на листата на најголеми продавачи на струја за овој период е трговската компанија ЕЛЕМ-Трејд, фирма ќерка на државните електрани ЕЛЕМ. Нејзиното учество на пазарот е 3,6 милиони евра за истргувани околу 72.000 мегават-часа електрична енергија.

На листата на купувачи во овој период на второ место е дистрибутивната компанија ЕВН Македонија која купила повеќе од 72.000 мегават-часа електрична енергија. Според референтната цена од 50 евра за мегават-час, оваа компанија за покривање на комерцијалните загуби на својата дистрибутивна мрежа платила околу 3,6 милиони евра за двата месеци.

Треторангиран на листата е големиот полошки комбинат на феро-силициум Југохром Фероалојс. Оваа компанија во купувањата на пазарот учествува со околу 3,4 милиони евра за набавени околу 91.000 мегават-часа електрична енергија.

http://www.mkd.mk/38508/makedonija/pazar-struja-april-maj-feni-eft/