Аеродроми

Од ТАВ велат дека нема да се откажат од инвестицијата во Македонија, но ќе почекаат да се реши експропријацијата на земјиштето пред да се впуштат во милионскиот бизнис

Турската компанија ТАВ не се откажува од инвестицијата во земјава и ќе ги модернизира аеродромите откако државата ќе им предаде во владение чисто земјиште, без имотно-правни проблеми. Согласно концесискиот договор што Владата го потпиша со ТАВ пред три месеци, денеска требаше да се изврши свеченото примопредавање на аеродромите, но постапката се пролонгира, како што дознаваме, за еден до два месеци.

Дали влезот на ТАВ ќе се официјализира по два месеци, одговор побаравме од централата на ТАВ во Турција. Оттаму не информираа дека никој во ТАВ не размислува за откажување од инвестицијата во Македонија. Истакнуваат дека им е подготвена целокупната техничка документација и само чекаат да се отстрани недостатокот што ја кочи сигурноста да се впуштат во ваков милионски бизнис.

Дека се одложува примопредавањето поради проблеми на терен, потврдуваат и од Министерството за транспорт и врски од каде информираат дека во моментов се врши експропријација на земјиште на аеродромите во Скопје и Охрид поради планираното продолжување на полетно-слетните патеки, како и на локацијата каде е предвидена изградба на карго аеродром крај Штип.

- По предавањето на земјиштето од страна на државата, почнуваат да течат роковите за реализирање на предвидените инвестиции - 20 месеци за завршување на градежните работи на аеродромот Александар Велики во Скопје, 12 месеци за аеродромот Св. Апостол Павле во Охрид и 36 месеци за изградба на карго аеродром во Штип - истакнуваат од ресорното министерство.
Сопствениците на имоти околу охридскиот аеродром не се задоволни што државата им нуди девет пати пониска цена од онаа што тие ја бараат. Слично е со земјиштето на кое треба да се гради карго аеродромот кај Штип. Таму сопствениците на земјиштето бараат по пет евра за квадратен метар, наместо 200 денари за квадрат, колку што им понуди државата. Од Министерството не кажуваат детали дали е најден компромис околу цената по која ќе биде откупено земјиштето.
И покрај овој проблем, како што дознаваме, тимови на ТАВ Македонија, компанијата која ќе стопанисува со аеродромите, се постојано на терен бидејќи пролонгирањето на роковите не е по нивна вина. Инженери веќе прават анализи на состојбите и се подготвуваат како секој момент да треба да почнат со работа.

Земјоделците од Мустафино бараат друга локација за карго аеродромот

Виолета Кожинкова	Коментари (0)

Земјоделците од село Мустафино бараат да се помести локацијата за изградба на карго аеродромот, што треба да се гради во непосредна близина на селото. Тие се жалат дека аеродромот ќе им ги земе најплодните ниви што се под систем за наводнување.

„Ова поле ги рани Скопје и Куманово", вели Илчо Давитков, земјоделец од село Мустафино.

„Тука на сред поле се наоѓа и бунар со кој селото се снабдува со вода за пиење", вели Ташко Николов од истото село.

„ Би било добро ако може да се помести за 1 километар подолу, оти и вревата ќе им смета на жителите", предлага нивниот соселанец Драгомир Божиловски.

Земјоделците денеска со протест и блокада на патот Мустафино- Ерџелија, го изразија своето незадоволство, бидејќи и стотина земјоделци ќе останат без земјата што ја добија на плодоуживање.

„Сега сме во недоумица. Дали да се подготвуваме за предпролетна сеидба или не, дали да ораме, дали да фрламе ѓубре или не", вели еден земјоделец.

Од Министерството за транспорт и врски велат дека карго аеродромот ќе се гради. Локацијата е избрана и во тек е експропријацијата на земјиштето, иако дел од земјоделците реагираат и на ниската цена за откуп на земјиштето од 200 денари по метар квадратен.