Аеродроми

Штипскиот аеродром - конкуренција на скопскиот

Јанакиески најавува дека аеродромот во Штип ќе прерасне во централен аеродром во државава

Сања Наумовска

Штипскиот карго-аеродром во иднина ќе биде централен аеродром за цивилни летови во државата, најави министерот за транспорт и врски, Миле Јанакиески. Местоположбата, климатските услови, ветровите и топографијата, кај аеродромот кој допрва треба да се гради, се многу поповолни од скопскиот „Александар Велики“.

Претставниците на турскиот концесионер „ТАВ Македонија“ вчера не сакаа да ги коментираат идеите на Владата. „Документацијата за аеродромите се' уште не е преземена и додека тоа не биде завршено концесионерот нема никаков коментар“, велат во „ТАВ Македонија“. Тие не сакаат да одговорат дали штипскиот аеродром ќе му биде конкуренција на скопскиот, во кој ТАВ треба да вложи најмногу и се надева на привлекување најголем број патници.

Во Министерството нагласуваат дека во проектот за изградбата на карго- аеродромот во Штип е предвидена и терминална зграда, со големина од минимум 1.500 квадратни метри, со можност за доградба, со што ќе биде овозможено тој веднаш да се користи и во цивилниот воздушен сообраќај, како алтернатива на скопскиот. Планирана е изградба на писта долга 2.400 метри со можност за продолжување до 3.000 метри, изградба на два хангара за увоз и извоз, заедно со потребните придружни шпедитерски објекти, како и изградба на административни објекти со површина од 1.000 квадратни метри.

Сепак, во план е, нагласуваат во Министерството за транспорт и врски, во период од 20 или 30 години, тој да стане и централен аеродром во државата. „Со идејата веќе е запознат и ТАВ“, велат во Министерството.

Рокот од три месеци, по потпишувањето на договорот за концесионирање, за завршување на подготвителните работи пред почетокот на реконструкцијата на аеродромите, завршува в среда. Сепак, незавршените постапки за експропријација на земјиште, кои ги води Министерството за транспорт, веројатно ќе го одложат почетокот на градежните работи.

„На скопскиот и на охридскиот аеродром има помалку постапки и се очекува набрзо да се завршат. Попроблематичен е штипскиот каде што се соочуваме со сопственици на земјиште кои се починати и непознати и тие веројатно ќе ги решаваме во од“, информираат во Министерството за транспорт и врски.