Кинезите ќе ни го купат солунското пристаниште

Најголемите македонски компании не губат надеж дека ќе купат акции, тврдејќи дека и во кошарка бевме сметани за аутсајдери, но стигнавме далеку
За пристаништето се заинтересирани десетте најголеми македонски компании што со децении работат со него Кој ќе ја купи најважната порта за македонската економија - солунското пристаниште? Најголемите македонски компании веќе покажаа интерес за учество во приватизација на пристаништето, но сериозни намери за купување на пристаништето имаат и Кинезите, кои веќе стопанисуваат со најголемото грчко пристаниште - Пиреја. Дознаваме дека големи кинески компании се заинтересирани да го откупат солунското пристаниште во пакет со грчката железница, која е заглавена во долгови. Кинезите се интересирале и за купување на српската и на македонската железница и на тој начин да создадат цела мрежа од кинески капитал на контролирани пристаништа, логистички центар и железнички пруги, за регионот да стане дистрибутивен центар за кинескиот извоз во Европа, велат нашите извори. Солунското пристаниште е дел од пакетот за брза приватизација, која Грција мора да ја направи како обврска кон ЕУ, до крајот на годинава. Домашните компании сепак не губат надеж. - Зависи од понудениот модел за приватизација. Нашите компании се заинтересирани директно да купат акции таму. Колку ќе успееме да исчепкаме нешто останува да се види, но секогаш треба да се има надеж. И во кошарка бевме сметани за аутсајдери, па видовте до каде стигнавме - велат бизнисмените. Од Стопанската комора на Македонија потврдуваат дека постои интерес кај најголемите 10 македонски компании („Фершпед“, „Фени“, „Цементарница“, „Макстил“ и други) што со децении работат и се клиенти на солунското пристаниште. - На претстојниот саем за „Транспорт и логистика“ во Скопје ќе се сретнеме и со менаџментот на пристаништето и ќе разговараме на оваа тема. За нас секоја информација за приватизацијата на пристаништето е значајна и се надеваме дека ќе имаме помош во тој правец и од нивната комора - вели Бранко Азески, претседател на Стопанската комора на Македонија. Тој смета дека Македонија нема сериозна алтернатива за солунското пристаниште, бидејќи сите други пристаништа значат дополнителни трошоци, има лоша инфраструктурата до нив, а не се добри ниту влезот ниту можностите за прием на поголеми бродови. Според Димитриос Бакацелос, претседател на Трговско-индустриската комора на Солун, приватизацијата на пристаништето е обврска што грчката влада је презела пред Европската Унија. - Тоа е задача што мора да се заврши брзо, иако сé уште не е утврдено што ќе се приватизира, дали дел од терминалите или ќе се оди на варијантата на учество на надворешни инвеститори во сопственоста на целото пристаниште. Во секој случај, тендерот што ќе го распише државата ќе биде достапен до сите - вели Бакацелос. Заменик-генералниот директор на пристаништето Емануел Михалидис, пак, директно ги повика македонските компании да учествуваат во приватизацијата. - Сметајте го солунското пристаниште како свое, зашто е најдобро решение за компаниите од вашата земја - вели Михалидис. Во меѓувреме инвеститорите од Кина кај нашиот јужен сосед веќе имаат третман на нов сојузник и спасител на земјата. Додека изминатиот период голем број странски инвеститори се повлекоа од Грција, Пекинг ја искористи можноста и купи клучни инфраструктурни објекти по ниски цени. Извршниот директор на „Чајна оушн шипинг компани“, Веј Џафу, инвестицијата во пристаништето Пиреја ја објаснува вака: - Во Кина имаме една поговорка“направи орловско гнездо и орлите сами ќе долетаат“. Во Грција градиме такво гнездо за да ги привлечеме кинеските орли - вели Џафу. Компанијата што управува со солунското пристаниште, според податоците од атинската берза, располага со 10.080.000 акции со право на глас, при што цената по акција годинава варирала од 10 до 17 евра.

http://www.novamakedonija.com.mk/NewsDetal.asp?vest=92711833572&id=10&prilog=0&setIzdanie=22391

Шел сака да го купи Макпетрол?!

Катерина Попоска

Една од најголемите нафтени компании во светот, Ројал дач шел, повторно го пикира македонскиот нафтен дистрибутер Макпетрол, преку кој би влегол на македонскиот пазар, неофицијално дознава “Капитал“. Ова е втор обид на Шел да влезе во Макпетрол, а до каде ќе отиде засега никој не знае да каже. Генералниот директор на Макпетрол, Андреја Јосифовски, не открива детали. Пазарната капитализација на Макпетрол за 2010 година е 43,7 милиони евра

---

Англиско-холандскиот енергетски гигант Ројал дач шел (Royal Dutch Shell plc.) повторно го скенира Макпетрол, дознава “Капитал” од извори во компанијата. Дека претставници на Шел овој месец биле во Макпетрол, со намера да преговараат за купување на најголемата дистрибутивна компанија во земјава, како што беа и пред четири години, за “Капитал” потврдуваат повеќе вработени во нафтената компанија.

За можното преземање од една од најголемите нафтени компании во светот молчат во Макпетрол. Првиот човек на компанијата, Андреја Јосифовски, не сака ниту да ја потврди, ниту да ја демантира оваа информација. Ниту службата за односи со јавност во Макпетрол јавно објаснува зошто претставници на Шел дошле во нивната компанија, како и тоа до каде се преговорите за можната купопродажба. Пазарната капитализација на Макпетрол во 2010 година изнесуваше 43,7 милиони евра. Основната главнина, пак, изнесуваше 62,6 милиони евра.

“Не е прв пат претставници на Шел да дојдат во Макпетрол. Често пати досега доаѓале и емисари од овој нафтен гигант да го испитаат теренот. Но, дали Макпетрол и Шел преговараат и дали од сето тоа ќе има епилог знае само претседателот на Управниот одбор. Конечната одлука, сепак, ќе биде негова”, вели за “Капитал” вработен во Макпетрол.

Скорешната посета на Шел не е новина за Макпетрол. Високи претставници на овој нафтен гигант првпат беа во Македонија во 2007 година, кога намерата за инвестирање му ја презентираа на вицепремиерот Зоран Ставрески.

“Сакаме да видиме каква е состојбата во Македонија, да ги видиме можностите. Македонија се наоѓа на добро место во Европа и ќе ги видиме можностите дали може да инвестираме”, изјави пред четири години Симон Крегер, од Ројал дач шел.

Ројал дач шел е една од најголемите петрохемиски компании во светот, која годинава прослави 100 години постоење. Овој нафтен гигант е веќе присутен во 90 земји и речиси во сите земји од регионот. Оваа година Шел слави 20 години постоење во Бугарија. Според официјалните податоци, минатогодишните приходи на Шел групацијата се 368 милијарди долари, а реализирани се капитални инвестиции вредни 30,6 милијарди долари. За истражувања и развој Шел лани вложила една милијарда долари. Моментално, Шел прави бушотини и вади нафта од Северното Море.

Макпетрол, пак, лани беше во загуба од речиси четири милиони евра

Макпетрол повеќе од 60 години дистрибуира бензин во Македонија, бидејќи ја поседува инфраструктурата за дистрибуција и продажба на нафтени производи. Компанијата е содружник и во гасоводот во земјава, преку кој на македонскиот пазар се дистрибуира природниот гас. Има вкупен расположлив капацитет од 150.000 метри кубни во складишта за нафта и нафтени деривати, распоредени во различни региони на територијата на Македонија. Има и две наменски инсталации за керозин, лоцирани на аеродромите во Скопје и во Охрид.

Од 2002 година, акциите на Макпетрол котираат на официјалниот пазар на Македонската берза. Макпетрол е рангирана меѓу првите 10 најликвидни фирми кои котираат.

Оваа нафтена компанија првите шест месеци од годинава ги заврши со добивка од 520.770 евра, за разлика од првите шест месеци во 2010 година, кога пријави загува од дури 5,5 милиони евра. За оваа година, Макпетрол планира да оствари добивка пред оданочување од 197,5 милиони евра. Со загуба од 3,9 милиони евра и раст на трошоците за амортизација за 9% (327.000 евра) најголемиот дистрибутер на нафта и нафтени деривати во земјава ја заврши 2010 година. Компанијата во 2010 година ја намали годишната загуба за 14%, бидејќи во 2009 година таа изнесуваше 4,6 милиони евра.

Неревидираниот финансиски извештај на оваа компанија покажува дека лани Макпетрол остварил 346 милиони евра вкупни приходи од продажба, кои се за 23% поголеми споредено со приходите од продажба на бензините во 2009 година.

Нејасно е дали минатогодишните загуби се резултат на истите проблеми на компанијата, поради кои и во 2009 година Макпетрол работеше со милионска загуба. Од компанијата информираа дека “значајно намалена општа деловна активност, особено во секторите транспорт, производство и преработка на метали, земјоделство и текстилна индустрија, како и намалената куповна сила на населението“ биле главната причина за негативното работење на Макпетрол во 2009 година. Како проблем ја посочуваат и отежнатата наплата на побарувањата по сите основи, поради кои морале дополнително да се задолжуваат, со што растеле трошоците за камати и за курсни разлики.

Последните официјални податоци покажуваат дека во структурата на акционерскиот капитал на Макпетрол вработените учествуваат со 31,6%, менаџерите со 12,9%, Оилко командитното друштво со речиси 20%, надворешните акционери со 27,9% и пензионерите со 7,5%.

ФАКТИ ЗА МАКПЕТРОЛ

дистрибутер на нафтени деривати и природен гас;

располага со 150.000 метри кубни складишта за нафта и нафтени деривати;

добивка од 520.770 евра во првите шест месеци годинава;

загуба од 3,9 милиони евра во 2010 година и од 4,6 милиони евра во 2009 година;

приходи од 346 милиони евра во 2010 година;

во акционерската структура вработените учествуваат со 31,6%, менаџерите со 12,9%, Оилко командитно друштво со 20%, надворешните акционери со 27,9% и пензионерите со 7,5%.

ФАКТИ ЗА ШЕЛ

Една од најголемите петрохемиски компании во светот, која годинава прослави 100 години постоење;

присутен во 90 земји и во сите земји од регионот;

приходи од 368 милијарди долари во 2010 година;

капитални инвестиции вредни 30,6 милијарди долари во 2010 година;

за истражувања и развој една милијарда долари во 2010 година;

моментално, прави бушотини и вади нафта од Северното Море.

МАКПЕТРОЛ ФОРМИРАШЕ ФИРМА ЗА СНАБДУВАЊЕ СО ГАС

Макпетрол пром гас е новата фирма основана од Макпетрол, со влог од 163.000 евра. Фирмата доби лиценца да биде снабдувач со гас и во краен случај. Целта е снабдувањето со природен гас да се издвои од Макпетрол и да и се даде на новата фирма-ќерка, Макпетрол пром гас.

Директор на новата фирма е Милан Сотировски, кој во март годинава си поднесе оставка од Управниот одбор на Макпетрол.

Макпетрол во моментов е снабдувач на тарифните потрошувачи кои се приклучени на системот за пренос на природен гас. Но, според Законот за енергетика, треба да има и компанија која ќе ја добие лиценцата за снабдувач со гас во краен случај. Најверојатно новоформираната Макпетрол пром гас е заинтересирана и за оваа дејност.

Согласно со Законот, веќе од 2013 година сите индустрии кои користат природен гас, од тарифни ќе станат квалификувани потрошувачи. Квалификуваните потрошувачи ќе мора директно да склучат договори со фирмата-снабдувач со гас во краен случај.

http://www.kapital.com.mk/mk/dneven_vesnik.aspx/73680/shel_saka_da_go_kupi_makpetrol_!.aspx?iId=2356

uste pozitivni vesti.belezime mnogu investicii od nasive celicari i metalski kompanii,silmak feni skopski leguri makstil eve sega i arcelor mital sto e mnogu pozitivno

Арчерол Митал“ ќе извoзува повеќе челик

В година најавува нова инвестиција во проширување на постројките со што планира да го зголеми капацитетот за 50 отсто

Маја Томиќ



Скопската компанија „Арчелор Митал“ најавува за в година нова инвестиција во проширување на постројките со што планира да го зголеми капацитетот за 50 отсто и месечно да преработува по околу 16 илјади тони челични калеми. Овој челичен гигант во светски рамки во земјава е присутен од 2004 година и по кризата застанува цврсто на нозе.

Тоа го потврдуваат податоците за остварената добивка во вториот квартал од годинава на компанијата од 1,54 милијарди долари на светско ниво, а продажбата им се зголемила за 25 отсто, односно на 25,13 милијарди долари.

И првите луѓе на фабриката во Скопје, генерално, се задоволни од работењето во изминатиот период од годинава затоа што се остварил добар просек на производство и на пласман во странство. Деновиве очекуваат пратка со 18.000 метрички тони челични калеми, која е тргната од Индијана, САД, кон Македонија. Како што веќе објавија странски медиуми, преку солунското пристаниште таа треба да пристигне во оваа фабрика за обработка на челик во почетокот на октомври. Од компанијата велат дека не станува збор за значајни количества челични калеми за обработка, туку дека е тоа набавка за тековна активност на фирмата, односно дека се набавува суровина за редовниот процес на производство. „Количествата што се набавуваат за редовниот процес на производство зависат од моменталните состојби на цените на светските берзи. Кога се тие пониски, се обезбедуваат поголеми количини за обработка за подолг период, и обратно. Сега се берзанските цени поволни, а материјалот што треба да пристигне во Солун е квалитетен и е од наша сестринска фирма. Инаку, според расположливите капацитети, количината од 18.000 тони челични калеми е доволна за еден и пол месец непречено работење“, вели Жарко Ивановски, менаџер за односи со купувачи во „Арчелор Митал“. Тој додава дека се' уште не е прецизирано кога ќе почне обработката на новата пратка, што точно ќе се произведува и каде ќе се пласира. Тоа ќе се оценува според стратегискиот пристап на компанијата, а потоа останува на продажните агенции да решат каде ќе се извозува. Во секој случај, производите нема да бидат наменети за еден купец.

Според статистичките податоци за трговската размена на земјава за периодот јануари-јули 2001 година, како што е вообичаено, производите од железо и од челик (валани производи) се во групата најмногу извозувани стоки. Ставката во кои тие спаѓаат: производи класифицирани според материјалот, во вкупниот остварен извоз на земјава од 2,4 милијарди долари, учествува со 699 милиони долари или со околу 30 проценти. Ова споредено со истиот период минатата година претставува пораст од 32,3 проценти.

Од Стопанската комора велат дека кај компаниите од црната и од обоената металургија не се регистрирани поголеми нарушувања и проблеми во производството и во пласманот во изминатиот период од годинава.

Тие годинава имаат зголемено производство и продажба на своите производи на странските пазари, за разлика од претходните две години кога беа тешко погодени од финансиската криза поради падот кај градежниот и кај автомобилскиот сектор.

http://www.utrinski.com.mk/?ItemID=03279DB13A232C458581D9FC7482CD2C

Стигнуваат 18 илјади метрички тони челик за „Арчелормитал“ во Скопје

Две нови странски инвестиции вредни 8,5 милиони евра

Свето Николовски

Две нови инвестиции во еден ден. Малтешко-британската „6ПМ“ влегува во доменот на информатичките технологии, додека македонско-холандската „Стил Кон“ во секторот за преработка на арматурно железо. И двете инвестиции се надвор од технолошко индустриските развојни зони и не користат државна помош.

Македонија е избрана како најдобра дестинација за инвестирање во Источна Европа од страна на групацијата „6ПМ“, специјализирана во областа на информатичко компјутерските технологии, која што оперира на пазарите во Велика Британија и во Малта. Во македонскиот огранок на компанијата „6ПМ Ниар шор” ДООЕЛ веќе се вработени 12 ИТ специјалисти, чиј број ќе се зголеми на 50, а динамичниот план најавува проширување до 250 вработени. Вкупната инвестиција ќе изнесува 5 милиони евра. Главни предности на Македонија се: квалитетната работна сила, ниските трошоци на работење, вистинскиот претприемачки дух и солидното познавање на англискиот јазик.

„Во однос на Малта вкупните оперативни трошоци во Македонија се помали за 60%, а во однос на Британија за дури 150%“ - изјави Иван Бартоло главен извршен директор на „6ПМ”.

За директорот на Агенцијата за странски инвестиции Виктор Мизо оваа инвестиција е предизвик и за другите компании од информатичката технологија да инвестираат во земјава.

Малтешко-британската компанија е високо специјализирана за обезбедување софтверски решенија во здравствениот сектор кои веќе се применуваат во јавното здравство на Велика Британија, а новиот проект за следење на здравјето на пациентите на далечина е наменет за Малта и доколку е успешен ќе биде раширен и во другите земји.

Втората инвестиција ја реализира македонско – холандската компанија Стил Кон. Во новиот погон за конфекционирање на арматурно железо се вложени 3,5 милиони евра, а ќе бидат вработени 100 лица. Ќе се извезуваат производи со сертификат за квалитет и со ознака македонски производ, што треба да го олесни експортот на соседните пазари. Се најавува изградба на два нови погона со што ќе се оформи мини индустриска зона на површина од 6 хектари. Стил Кон извезува челични конструкции  во: Германија, Србија, Африканските земји, а новата фабрика ќе има годишен капацитет за преработка на 10 до 15000 тони арматурно железо.


http://www.time.mk/read/18d22ea09f/4279efb0e3/index.html

„Џонсон контролс“ објави оглас за вработување во новата фабрика
Бизнис | 3. септември 2011 - 13:44
Компанијата „Џонсон контролс“, која вчера ја ја најави изградбата на втората фабрика во Македонија, денеска објави оглас за вработување на лица кои ќе бидат ангажирани во неа.




Компанијата бара стручни лица во процесот, како инженери за шиење, за кроење, инжинери за компјутерски потпомогнато дизајнирање, тим лидери на производна линија, електромеханичари, ревизори за квалитет, проект асистен, како и искусни оператори за шиење.

Во фабриката во Технолошко индустриската зона кај Штип, според најавите треба да се вработат околу 1.400 лица. Фабриката е наменета за тапацир за автомобилски седишта. Почетокот на изградбата на се очекува на средината на наредниот месец, а со работа да почне за една година. Производите ќе бидат наменети за нивни европски клиенти.

Инвестицијата се проценува на околу 20 милиони евра.
http://press24.mk/story/biznis/„dzonson-kontrols“-objavi-oglas-za-vrabotuvanje-vo-novata-fabri

На четврто место се гасните масла, чиј извоз во првите шест месеци од годинава изнесува 37 милиони евра

Трет најувезуван производ се гасните масла, чија вредност на увозот достигна 80 милиони евра

Гасни масла ?!?




Edited by Cloverstack - 29-Aug-2011 at 11:51

Индустриското производство во јули порасна за 5,5%

За 5,5% порасна индустриското производство во јули годионава споредено со истиот период лани. Во првите седум месеци од годинава пак, индустриското производство порасна за 8,6% во споредба со периодот јануари-јули 2010 година.

Податоците од Државниот завод за статистика покажуваат дека во јули годинава текстилната индустрија паднала за фрапантни 41% во споредба со истиот период лани, градежништвото порасна за 12%, рударството за само 2,2% на годишно ниво, металната индустрија за само 0,9% во споредба со јули минатата година, додека пак, прехранбената индустрија пораснала за 7%.

Снабдувањето со електрична енергија, гас и пареа, според Заводот за статистика, во јули годинава падна за дури 18,7% во споредба со истиот период лани.

http://www.kapital.com.mk/mk/dneven_vesnik.aspx/72877/industriskoto_proizvodstvo_vo_juli_porasna_za_5,5.aspx?iId=2326

Во градот на текстилот нема текстилни работници

сабота, 27 август 2011, 19:01

Индиската текстилна групација Бен оверсис до крајот на годината сака да вработи 250 работници во Штип кои ќе шијат кошули за европскиот пазар. Но, во градот на текстилот-текстилни работници нема. Сопственикот на новата текстилна конфекција Бенг и Скот вели дека се соочиле со ваков проблем уште на самиот почеток од создавањето на конфекцијата која во моментот вработува околу стотина.

Имаме големи надежи и покрај тоа што се соочуваме со големи проблеми.Најголемиот проблем за нас во моментот е недостигот на работна сила. Но, сакам да истакнам дека ние даваме добри опции, како што е сигурна работна средина.

Поради близината до европскиот пазар, ниските трошоци за транспорт, но и искусните работници, индискиот инвеститор го избрал Штип, наместо Србија или Словачка кои им биле едни од опциите за отпочнување на бизнис. Исчен верува дека има начин да го отстранат проблемот со кој во моментот се соочуваат.

Мораме да бараме решение на долготрајни патеки. Ако компанијата произведува квалитетни производи нивниот пазар ке се прошири, а за да произведувате квалитетни кошули ви требат искусни работници. Ако тоа го постигнете добивката за сите ке се зголеми.

Проблемот со кој во моментот се соочува странскиот инвеститор од пред неколку години создава главоболки и на штипските конфекционери, кои тврдат дека младите повеке сакаат да работат во државните институции, отколку за просечна плата од 12.000 денари да шијат на машини. Во моментот во Штип има 6130 невработени, од кои 880 се жени на возраст од 19 до 34 години.

http://www.time.mk/read/9397e96876/dd6b2f209a/index.html

Кои се најголемите 100 увозници во Македонија?

Биљана Здравковска-Стојчевска

Анализата на увозот ги покажува слабите точки на економијата. Македонија е речиси целосно увозно зависна земја и е принудена да увезува најголем дел од производите кои и се потребни бидејќи не ги произведува. Но, во Македонија се увезува и тоа што ни треба и тоа што не ни треба, и тоа што го немаме и тоа што го имаме, а увозните компании прават најголеми профити

Ако анализата на извозот ги покажува силните страни на една економија, увозот дефинитивно ги покажува слабите точки на економијата. Македонија е речиси целосно увозно зависна земја, што значи дека е принудена да увезува најголем дел од производите кои и се потребни за производство, но и за широка потрошувачка, бидејќи не ги произведува сама. Но, во Македонија се увезува буквално се и сешто. И тоа што ни треба и тоа што не ни треба, и тоа што го немаме и тоа што го имаме или можеме да го обезбедиме преку домашно производство.

Најтипичен пример е прехранбената индустрија. Македонија, која важи за земјоделска земја со многу големи потенцијали за домашно производстсво на храна, не покрива ниту половина од сопствените потреби за храна. И покрај стотиците милиони поделени државни субвенции на земјоделците, наместо да се зголемува домашното производство на храна, од година во година увозот се повеќе расте и минатата 2010 година достигна рекордни 600 милиони долари. Тие што веќе работат во македонската прехранбена индустрија велат дека буквално се е поскапо да се произведе дома отколку да се увезе од околните пазари. Затоа сме преплавени со странска стока буквално од секаде.

Од година во година расте и вредноста на вкупниот увоз во Македонија. Минатата година во Македонија се увезени производи во вредност од 5,5 милијарди долари. Земјава со години увезува повеќе отколку што извезува. Во 2010 година увозот беше за 2,14 милијарди долари поголем од извозот. Во првите пет месеци од годинава увозот достигна две милијарди евра, а трговскиот дефицит е 1,1 милијарди евра, односно 30% поголем отколку во истиот период лани.

Колку за споредба, во 2000 година Македонија увезе производи и услуги во вредност од две милијарди долари, а трговскиот дефицит беше само 770 милиони долари. Тоа значи дека вредноста на увозот за овие десет години се зголеми за 178%, а трговскиот дефицит порасна за цели 160%.

Анализата на 100-те најголеми увозници, која во целост ќе биде објавена во најновиот број на магазинот “Капитал“, покажува дека тие лани оствариле увоз во вредност од 2.650 милијарди долари, што е половина од вредноста на вкупниот годишен увоз на целата земја.

На листата со 100 најголеми увозни компании во Македонија се наоѓаат и многу од големите извозни компании. На пример, на листата со 100 најголеми извозни компании најбројни се компаниите од металопреработувачката индустрија. Дури 11 компании од металургијата, кои истовремено се извозници, се наоѓаат и на листата со најголеми извозници. Тоа е сосема логично ако се знае дека најголем дел од суровините за производство овие извозни компании мора да ги увезуваат од странство затоа што Македонија нема челична руда. Вкупниот увоз на овие 11 металопреработувачки компании лани изнесуваше 405 милиони долари, при што најголем увозник е Арчелор Митал, чиј годишен увоз надминува 100 милиони долари. Следуваат Фени индустри и ИГМ трејд.

Најмногу девизи Македонија како држава дефинитивно троши за плаќање на увозот на нафта и нафтени деривати. На ниво на држава лани се потрошени 744 милиони долари за увоз на нафта и нафтени деривати, а над 85% од овој увоз го прави рафинеријата Окта, која е најголем увозник во Македонија. Рафинеријата Окта истовремено е и најголема компанија во Македонија според вкупните приходи во работењето, кои надминуваат 514 милиони евра. На второ место на листата со најголеми увозници се искачи Џонсон Мети, хемиската компанија, која пред две години изгради фабрика во слободната економска зона Бунарџик. Увозот на Џонсон Мети, кој лани имаше вкупни приходи од 132 милиони евра, надминува 250 милиони долари, а извозот се уште е помал од увозот.На третото место на листата со најголеми увозници е металопреработувачката фабрика Арчелор Митал, чиј увоз надминува 100 милиони долари.Во првите 10 најголеми увозни компании во Македонија дури три се од нафтената индустрија, кои годишно увезуваат нафтени деривати во вредност од над 780 милиони долари.

И ДРЖАВАТА НА ЛИСТА СО НАЈГОЛЕМИТЕ УВОЗНИЦИ

На листата со 100 најголеми увозници во Македонија се наоѓаат министерствата за здравство и за внатрешни работи и општина Центар, кои лани увезле производи во вредност од 56,5 милиони долари. Министерството за здравство со увоз од 30 милиони долари се наоѓа на 15-то место на листата со најголеми увозници. Најголем дел од увозот на ова министерство се должи на опрема за јавното здравство. Министерството за внатрешни работи лани увезло производи во вредност од околу 16 милиони долари и е на 32 место на листата со 100 најголеми увозници.

Најголемиот увоз на ова министерство отпаѓа на уреди за следење и репродукција на звукот. Општината Центар се наоѓа на 62 место со увоз од 9,5 милиони долари во 2010 година. Општината Центар за прв пат се јавува во групата најголеми увозници годинава, поради увезените споменици и скулптури од странство како дел од проектот “Скопје 2014“.

http://www.kapital.com.mk/mk/dneven_vesnik.aspx/72139/koi_se_najgolemite_100_uvoznici_vo_makedonija_.aspx?iId=2305