Градоначалникот на Град Скопје, Коце Трајановски и премиерот Никола Груевски денеска /21.09.2010 година/ официјално го предадоа во употреба булевар Илинден, важен сообраќаен коридор којшто во изминативе седум месеци се прошируваше на потегот од крстосницата со булеварот Свети Климент Охридски до крстосницата со булеварот 8.Септември. Реконструирана и проширена е вкупна должина од 2.140 метри и површина од 28.000 квадратни метри. Вкупната вредност на проектот за проширување на улицата  Илинденска изнесува околу 201 милион денари или околу 3,3 милиони евра.

- Ми претставува огромно задоволство што токму денеска, кога се празнува Света Богородица - Заштитничката на Скопје, ја имам честа да го означам крајот на еден од најголемите капитални проекти направени во нашиот град во последниве 12 години во централното градско подрачје и на моите сограѓани официјално да им го предадам на користење булеварот Илинден. Познатата улица Илинденска, којашто со години претставуваше тесно грло во центарот на градот остана во минатото. Од денеска, скопјани имаат можност да возат по модерен булевар, со по две коловозни ленти во секоја насока, нови дрвореди, средишно зеленило, обновени тротоари и велосипедски патеки и комплетно ново осветлување. Илинденска прерасна во булевар и отвори нов сообраќаен коридор што ќе овозможи поголем проток на возила кон населбите Карпош и Ѓорче Петров и, во обратна насока, кон центарот на градот. Со тоа, овозможивме возилата помалку да се задржуваат на сообраќајницата и придонесовме за помало загадување на воздухот – рече градоначалникот Трајановски.

Тој истакна дека во центарот на градот не е проширен булевар во последниве 12 години и оти проширувањето на улицата Илинденска во булевар е капитален проект за Градот Скопје.

-  Во неговата реализација вложивме многу труд и енергија. Во текот на изградбата се соочивме со многу проблеми коишто ги решававме посветено и успешно. Продукт на нашата заложба е оваа модерна и брза сообраќајница на којашто ќе функционира зелен бран за движење на возилата – нагласи градоначалникот Трајановски.

Во реконструираната и проширена делница на булеварот Илинден се вградени 22.700 тони асфалт. По должината на коловозот се поставени големи рабници со вкупна должина од 6.000 метри, а од страната на тротоарите се поставени мали рабници со вкупна должина од 4.500 метри.

Асфалтирани се тротоари и велосипедски патеки со површина од 7.200 квадратни метри, а со бекатон-плочки се покриени тротоари со површина од 3.100 квадрати. Асфалтирани се 590 квадратни метри пешачки острови.

На изградба на булеварот Илинден, просечно дневно, работеа околу 150 работници од изведувачот „Гранит“ и од подизведувачите.

Во подготвителните работи за проширување на булеварот Илинден изградена е атмосферска канализација во должина од 2.313 метри и променлив профил којшто изнесува од 400 до 1.000 милиметри. Обезбедено е двострано одводнување на булеварот. По целата должина на проширената делница се поставени 60 шахти и 105 сливници за атмосферската вода.

Булеварот Илинден го осветлуваат 120 столба на коишто се поставени 170 светилки од типот ONIX 2 со моќност од 150 до 250 W од фирмата Meinel Schroeder.

По должината на булеварот, на потегот од крстосницата со булеварот Свети Климент Охридски до крстосницата со булеварот 8.Септември се изведени 9 семафоризации. Поставени се 25 конзолни семафорски столбови, 35 обични семафорски столбови, 95 возачки лантерни и 76 пешачки лантерни.

Хоризонталната сообраќајна сигнализација е обележана со бела боја при што се потрошени околу три тони боја. Поставени се 200 сообраќајни знаци.

По должината на булеварот Илинден уредено е парковско зеленило со трева со површина од 13.525 квадратни метри. На потегот од крстосницата со булеварот Свети Климент Охридски до крстосницата кај фонтаната „Лотосов цвет“ се засадени 66, а на делот од фонтаната до булеварот 8.Септември - 78 дрвја. За наводнување на зеленилото изведена е хидрантска мрежа во должина од 1.494 метри.

Од објектот на Зоолошката градина до крстосницата со булеварот 8.Септември во средишниот дел од булеварот Илинден е изградена жардиниера со вкупна површина од 2.000 квадратни метри, за којашто се изведени дополнителни 720 метри хидрантска мрежа.

По целата должина на булеварот се наместени 20 клупи и 50 корпи за отпадоци.

За реализација на проектот за проширување на булеварот Илинден е извршена експропријација во вредност од 20 милиони денари. За експроприраното земјиште се доделени три еднособни и еден двособен стан. Целосно се урнати три објекти што се наоѓаа на трасата на булеварот, а делумно се урнати четири објекти.