Тротоари

Градот Скопје денеска /27.06.2011 година/ го почна обемниот проект за реконструкција на тротоарите и пешачките патеки по должината на неколку клучни улици и булевари во централното градско подрачје. Стартот на градежните работи за обнова на тротоарите на булеварот Гоце Делчев го означи градоначалникот на Град Скопје, Коце Трајановски.

- Оштетените тротоари кои што со години создаваа проблеми во движењето на пешаците и претставуваа грда слика за градот ќе се раскопаат, ќе се реконструира подлогата и ќе се покријат со бетонски префабрикувани плочи. По реконструкцијата на петте големи сообраќајници во центарот на градот со овој проект ги уредуваме и тротоарите и пешачките патеки по нивната должина со што се зголемува безбедноста на пешаците и на велосипедистите – рече градоначалникот Трајановски.

Денеска почна обновата на тротоарот од двете страни на булеварот Гоце Делчев, на потегот од мостот „Гоце Делчев“ до зградата на НУБ „Свети Климент Охридски“. Пешачката патека ќе се реконструира на површина од околу 4.000 квадратни метри. На терен ќе работат екипите на ИГМ „Вратница“. За обнова на овој потег Градот Скопје ќе потроши околу 5 (пет) милиони денари. Градежните работи треба да завршат до крајот на ова лето.

Тротоарот и пешачката патека на булеварот Партизански одреди, пред Соборниот храм, ќе се обнови на површина од околу 3.500 квадратни метри. На реконструкција на оваа делница ќе работи градежната компанија „Чингар инжинеринг“ од Скопје. Градот Скопје за обнова на оваа патека ќе вложи околу 5 милиони денари.

Тротоарите по должината на улицата Васил Главинов ќе се реконструираат од мостот „Гоце Делчев“ до улицата Димитрие Чуповски, а ќе се работи и на дел од пешачката зона на булеварот Илинден (од мостот „Гоце Делчев“ до зградата на Владата на Република Македонија). За обнова на овие две делници Градот Скопје ќе одвои околу 12 милиони денари, а на терен ќе работат градежниците на „Урбан инвест“ од Кавадарци.

Ќе следува реконструкцијата на пешачките површини од двете страни на улицата Васил Аџиларски, на дел од улицата 11.Октомври од страната на паркот „Жена-борец“ и на дел од тротоарот пред зградата на Собранието на Република Македонија. На овие три потега ќе се обнови пешачка површина од околу 4.000 квадратни метри. Реконструкцијата на пешачките зони на овие три делници Градот Скопје ќе го чини околу 12 милиони денари.

http://www.skopje.gov.mk/ShowAnnouncements.aspx?ItemID=4341&mid=482&tabId=1&tabindex=0