Сo измените во Генералниот урбанистички план во градот треба да никнат 12 нови бензиски пумпи. Пумпите ќе бидат распоредени на повеќе локации во градот.

Изградбата на бензинската пумпа на Лукоил во центарот на Куманово е запрена поради низа неправилности за отпочнување на градба.

Кумановската полиција поднесе кривична и прекршочна пријава за изведувачот Арс-инжињеринг за оштетување јавни инсталации и отпочнување на градба без одобрена шема на градилиште со што, велат, се создава сообраќаен хаос во градот.

- Ние работиме на давање на согласноста, ќе се обидеме точно да прецизираме стриктни правила по кои можат да се изведуваат одредени градежни работи и само по тие правила ќе може градителот Арс да продолжи со работа, а до тогаш градежните работи ќе мируваат. Треба сообраќајно да се регулура приодот до градилиштето како и други поединости за да не се создава метеж во сообраќајот, изјави Марјан Павличек командир за безбедност на сообраќај при СВР Куманово.

Од локалната самоупрва информираат дека сите релевантни институции имаат издадено согласност за добивање одобрение за градба.

- Нашиот сектор единствено што во овој момент требаше да направи е да ја проследи законската процедура и сите релевантни институции се произнесоа позитивно така што ние не можеме ниту смееме согласно Законот да ја стопираме оваа процедура. Има посебни управни постапки кои ја преиспитуваат работата на кој било орган така што, ние не сме во можност тоа да го направиме, рече Лидија Ланг началник на секторот за урбанизам при Општина Куманово.

Уште пред да започне изграбата на безниската пумпа, реагираа и граѓаните на Куманово, кои се противат на тоа ваков објект да се гради во населено место, во близина на Зелениот градски пазар и ОУ „Бајрам Шабани“.