Телеком арена (арена Филип II Македонски)

Градски стадион се подготвува за изградба на источна и западна трибина

Тендерот е во тек. Стадионот треба да го добие конечниот лик пролетта 2011 година

Деспина Трајковска

Илуминација слична на минхенската арена „Алијанс“, капацитет од 33.000 гледачи, нова атлетска патека и повеќе од 22.000 квадратни метри поттрибински простор каде што ќе бидат сместени разни содржини. Ваков изглед ќе добие Градскиот стадион до пролетта 2011 година, најави вчера Ивица Коневски, директор на Јавното претпријатие за стопанисување со станбен и деловен простор, кој информираше дека веќе е распишан тендер за најавените содржини на стадионот, на кој пак интензивно се гради северната трибина.

Од ЈПССДП очекуваат идната година во март да го потпишат договорот со најповолниот понудувач на тендерот, кој ќе биде обврзан да го реализира проектот во рок од 24 месеци. Директорот на станбеното претпријатие засега не може да процени колку ќе чини целосната реконструкција на стадионот, според Коневски, тоа ќе зависи од понудите на тендерот.

„Цената ќе биде пресудна на тендерот. Битно е тоа што имаме обезбедено дел од средствата, а пари ќе се планираат и во државниот буџет за наредните две години“, изјави Коневски.

Инаку, на меѓународниот тендер се бара фирма што ќе изврши реконструкција на јужната трибина, ќе ја изгради новата атлетска патека, ќе ги изведе илуминацијата на стадионот и ентериерното уредување на северната трибина. Предвидено е Градскиот стадион да има капацитет до 33.000 гледачи, од кои на источната и на западната трибина на три нивоа ќе бидат распоредени по 5.996 седишта, на три нивоа на јужната трибина се предвидени 11.477 седишта, а пак по изградбата на северната трибина таа ќе има капацитет од 10.030 седишта, од кои 474 ВИП-места распоредени на пет нивоа. Стадионот ќе располага и со поттрибински простор од 22.148 квадратни метри кои ќе се издаваат како деловни објекти. Во нив е предвидено да има спа-центар, сала за фитнес, игротека, мултимедијален салон, сала за танци, продавница за сувенири, сместувачки капацитети...

Инаку, на Градски екипите на „Бетон“ од пред една и пол година веќе ја градат северната трибина. Според рокот, таа треба да биде готова до јули идната година. Нејзината изградба чини околу 14,5 милиони денари.

Од ЈПССДП уверуваат дека, како и досега, Градски стадион ќе биде функционален и за време на изградбата и реконструкцијата на другите трибини и содржини.

Конечниот изглед на стадионот, кој ќе може да прими околу 33.000 гледачи (од кои 474 ВИП места), ќе биде готов во март 2011 година

Градскиот стадион во Скопје кога целосно ќе биде завршен во 2011 година, навечер ќе свети како Алијанс Арена во Минхен. Тендерот за осветлувањето на стадионот, како и за изградбата на источната и западната трибина е распишан и заинтересираните компании можат да се пријавуваат најдоцна до 22 идниот месец. Ивица Коневски, директор на Јавното станбено претпријатие кое стопанисува со Градскиот стадион вели дека договорот со идниот изведувач ќе се склучи во март 2009 година, а единствен критериум за избор е цената, која ќе ја понуди тој, за изведба на планираните зафати.
- Избраната компанија ќе треба да направи и реконструкција на столчињата, санитарните јазли и покривот на постојната јужна трибина, да го направи ентериерот на северната трибина која е во фаза на градба, како и да го обнови и дренира теренот за играње и да изгради нова атлетска патека - вели Коневски.

Изградбата на овие активности се планира да траат 24 месеци и за нивна реализација Владата ќе обезбедува пари од буџетите за 2009, 2010 и 2011 година.
Конечниот изглед на стадионот, кој ќе може да прими околу 33.000 гледачи (од кои 474 ВИП места), ќе биде готов во март 2011 година. Под трибините ќе има вкупно 22.148 квадратни метри деловен простор. Под источната трибина ќе има сали за фитнес, боречки вештини и за танц, како и центар за масажа. Спа центар, салон за убавина, игротека и компјутерски центар се предвидува под западната трибина. Северната трибина, пак, чие пуштање во употреба е планирано за март идната година, ќе прерасне во главна трибина. Во поттрибинскиот простор ќе има шопинг центар, сместувачки капацитети и музеј на славни македонски спортисти и сала за трофеи. Во рамките на стадионот ќе се гради и пристапна патека, но таа е обврска на Градот Скопје и Општина Центар.