Од ниедна, одеднаш две подземни улици

Градската сообраќајница не се совпаѓа со трасата на подземната улица што треба да се гради од „Холидеј ин“ до објектот на плоштадот

Деспина Трајковска


Колку длабоко под земја, со колкава ширина и како ќе се изведе најавената подземна сообраќајница особено во делот под кејот кај ГТЦ каде што е предвидена уште една таква траса, се само дел од техничките карактеристики кои допрва ќе се утврдуваат во понатамошните фази неопходни до теренската реализација на проектот. Според портпаролот на Град Скопје, Неделчо Крстевски, ниту Вардар ниту, пак, густата населеност во околината, како ни подземните води не би го довеле во прашање проектот. Сите тие елементи биле земени предвид кога е работена студијата. Кога била трасирана подземната, предвид била земена и подземната улица што треба да се гради од „Холидеј ин“ до новиот објект на некогашна Народна банка, како единствен сообраќаен линк. Оваа улица е обврска на инвеститорот на зградата, но и по речиси двегодишни најави, таа се' уште не е почната да се гради.

„Нема зошто таа улица да го доведе во прашање нашиот проект. Градската подземна сообраќајница не се совпаѓа со трасата на посочената улица, ниту, пак, Градот или Владата ќе инвестираат во неа“, дополни Крстевски.

Со идејното решение и останатите фази до конечниот изведбен проект за новата сообраќајница ќе се утврди и дали и колку раскопувања ќе бидат неопходни во непосредната околината, додека дури по изборот на изведувач ќе се знае колку години центарот на градот ќе биде претворен во градилиште.

Засега единствено е сигурно дека подземната улица, која заеднички планираат да ја изградат Владата и градските власти, ќе биде долга 1,7 километар. Сообраќајницата ќе има по една лента во двете насоки, ќе почне да понира од комплекс банки и ќе излегува во непосредна близина на мостот „Гоце Делчев“, а на неа ќе се излегува, односно влегува преку кружни текови.

Токму оваа подземна улица била посочена како најпогодна за растоварување на сообраќајот во центарот, како дел од студијата што ја нарача Град Скопје од шпанската консултантска куќа „Идом“. Градските власти објаснуваат дека Шпанците понудиле 10 можни решенија за решавање на хроничниот проблем во главниот град, но трасата комплекс банки - мост „Гоце Делчев“ ја препорачале како најсоодветна за реализација, гледано од аспект на безбедноста и функционалноста.

„Сите детали за подземната улица ќе се дефинираат веројатно до почетокот на наредната година, до кога треба да се изработи конечен изведбен проект. Имајќи предвид дека станува збор за сложен проект, досега воопшто не изведуван кај нас, а со оглед на локацијата каде што треба да се реализира, ќе биде потребно релативно долго време да се завршат сите неопходни активности“, изјави вчера Неделчо Крстевски, портпарол на скопскиот градоначалник.

Инаку, нужната сообраќајна врска, која со години е дел од ГУП-от како една од опциите за решавање на метежот по скопските улици, според процените на Градот и Владата ќе чини околу 30 милиони евра. Сепак, оваа сума засега е само проекција направена врз основа на шпанската студија, што значи дека таа во иднина веројатно ќе се коригира. Централната власт е подготвена да учествува со две третини од средствата потребни за реализација на проектот, па од тие причини се потпиша меморандум за соработка помеѓу Владата и Градот.

Најпоразителен за мене е фактот дека властите (централни/локални) продолжуваат со своето нетранспарентно туркање на проекти без никакви консултации и објаснување на широката јавност. Значи наместо ние на Билд да си вадиме очи помеѓу себе, задача на Коце и Миле е да објаснат, зошто се одлучиле на ова импровизирано решение, спортивно на ГУП? За жал ова не е прв пат и толку ни е прејденов во навика да никој ова не го искоментира. И Трифун не даде никогаш објаснување за кружниот тек и надвозникот кај Континентал (спротивен на ГУП),имавме бледи неаргументитрани промени на ДУП со СК2014 и со верските објекти на плоштадот, и сега како капак еден од главните инфраструктутрни проекти ни се менува пред нос, му се напумпува вредноста (случајно или не пред избори), се импровизира со неговата траса и големина и јавноста си ќути. Па мора да ги натераме надлежните да дадат објаснување ЗОШТО? Зошто се промени планот спротивно на ГУП, кои се резултатите од шпанските консултанти, зошто побогу проектот чини 30 милиони евра за 2 ленти диг-едн-кавр тунел од 1700 метри? Зошто приватниот инвеститор е амнестиран од обврската?