Во Штип почна изградбата на фабрика за автобуски шасии

Во индустриската зона „Запад“ компанијата „Актива“ гради хала во која ќе се произведуваат шасии за потребите на белгиската компанија „Ван Хоол“

Иван Бојаџиски

Штип – Во индустриската зона „Запад“ кај Штип, која е наменета за домашни инвеститори, денеска почна изградбата на новата фабрика на штипска „Актива“ во која ќе се произведуваат автобуски шасии за потребите на белгиската компанија „Ван Хоол“ која има своја фабрика за автобуси во индустриската зона „Бунарџик“ кај Скопје.

„Фабриката ја градиме на 70.000 квадратни метри сопствено земјиште со можност за нејзино проширување за дополнителни 50.000 квадрати. На оваа локација, всушност, ќе изградиме две фабрики, секоја со по 16.000 квадрати деловен простор. Во првата фабрика ќе се произведуваат автобуски шасии за потребите на белгиската фирма, додека во втората ќе се остварува производство на челични конструкции што е срцето на нашата производна програма во сите изминати 15 години“, рече Иле Николов, директор на „Актива“.

Со поставувањето на камен-темелникот, всушност, започна изградбата на првата од двете хали во кои ќе се произведуваат автобуските шасии. Халата ќе биде со големина од 8.000 квадратни метри и е планирано да биде изградена до крајот на септември за кога е најавено да започне производството на шасиите, а втората хала ќе се гради во наредната година. Според Николов, вкупната инвестиција на првата хала изнесува три милиони евра, од кои еден милион се сопствени средства на „Актива“, а два милиона евра се кредит од Комерцијална банка.

Пред многубројните присутни вчера се обрати и Филип ван Хоол, сопственик и генерален менаџер на белгиската фирма.

„Со луѓето од ’Актива‘ првпат се сретнавме во 2011 година. Нашата соработка започна со изградбата на фабриката ’Илинден‘, а особено се интензивира со изградбата на нашата фабрика за автобуси во ’Бунарџик‘ кога штипската фирма во рекордно време од нецела година ја изгради нашата фабрика од 36.000 квадратни метри. Тогаш веќе бевме сосема свесни дека Македонија во ’Актива‘ има компанија од светски формат која сите преземени обврски ги извршува и пред договорените рокови“, рече Филип ван Хоол.

Тој потенцираше дека неговата семејна компанија сега произведува автобуси само за американскиот пазар, но изрази сигурност дека во блиска иднина ќе произведува и за европскиот пазар каде што перспективите за соработка со „Актива“ стануваат многу поголеми.

Штипската фирма, која годинава слави 15-годишен јубилеј, според техничкиот директор Аргир Лазовски, низ сите години на својата надградба успешно ги пребродила бројните тешкотии на кои наидувала. „Нашите вработени се нашиот најголем ресурс, а ние како раководен тим имавме визија како секогаш да бидеме барем еден чекор пред нашата конкуренција. ’Ван Хоол’ ни подаде рака и ние сега само ја прошируваме дејноста, што се' заедно ќе има значење и во сферата на етапно отворање нови работни места“, рече техничкиот директор Аргир Лазовски.

Иле Николов и' се заблагодари на локалната штипска власт, која, ставајќи се во улога на сервис на стопанството, во краток временски период го завршила својот дел од работата, со што „Актива“ добила можност брзо да стартува со изградбата на фабриката.

Инаку, „Актива“ во моментот вработува 220 лица, но со изградбата на првата хала за производство на автобуски шасии за „Ван Хоол“, планирано е вработување на нови 50 луѓе, а таа бројка ќе се зголемува со изградбата на другите капацитети од проектот.

извор