Цветен пазар

Roza Petkova

Уште еден појас од канадските тополи во населбата Капиштец ќе се сече деновиве, но не за да се пробие трасата на Јужен булевар, туку за да се направи место за преселба на „Цветен пазар“. Во просторот со зеленило кај последната станица на автобусот со број 23 ќе се изградат платформа за културни и туристички настани и 16 куќарки за цвеќе, во согласност со одлуката што ја донесоа градските советници. Со програмата за привремени објекти на Советот на Град Скопје, на површина од еден хектар се предвидува да останат сите сегашни содржини, односно да се уреди простор за градските автобуси со број 7 и за автобусите со број 23 на приватните превозници, да остане простор и за такси-возила, а да се прошири и паркиралиштето на „Градски паркинг“. „Цветен пазар“ ќе се смести на платформа која, според замислата на градските власти, ќе може да се користи и за туристички и за културни настани. На неа ќе се изградат монтажни куќарки со површина до 16 квадратни метри, кои, освен за продажба на цвеќе, ќе може да се користат и за продажба на сувенири. Се предвидува да се прошири и површината на постојното паркиралиште на „Градски паркинг“, кое се наоѓа спроти поранешната зграда на „Нова Македонија“. Тоа ќе се продолжи низ улицата Мито Хаџивасилев-Јасмин, односно во зеленилото со два реда паркирање. На локацијата ќе се уреди паркиралиштето за автобуси, на кое ќе може да се сместат најмногу два единечни автобуси, а ќе се остави простор за кружно влегување и излегување на уште толку автобуси. Ќе се направи и посебно привремено паркиралиште за лесни возила кое ќе се користи за потребите на пазарот, како и паркинг-простор за постојната такси-станица, кој би собирал девет возила. За организација на движењето на пешаците, Градот ќе постави и пристапни рампи за инвалидизираните лица, кои досега ги немаше. - Во делот за „Цветен пазар“, просторот ќе го уредуваат Градот и „Паркови и зеленило“. Проектот може да почне да се реализира и во текот на годинава, а попрецизно јавноста ќе биде информирана наскоро - велат од градското одделение за односи со јавноста. Терминалот на автобусот со број 23 е грда слика со години иако се наоѓа во центарот на градот. Асфалтот на паркиралиштето одамна не се познава, останати се само издробени парчиња, камења, песок и огромни дупки, кои при секој дожд се полнат со вода. Никој од локалните власти не се нафаќа да го смени асфалтот на паркинг-просторот, со оправдување дека тој е од привремен карактер и се наоѓа на оваа локација до реализацијата на Јужниот булевар. Да биде состојбата уште полоша, деновиве екипи на фирмата „Беграмо“, која Општина Центар ја ангажира за да ја реконструира улицата Васил Ѓорѓов, фрлија неколку лопати асфалт само за да ги прикрпат најголемите отвори на паркиралиштето. И покрај тоа, вдлабнатините се уште постојат, а просторот има уште поочаен изглед, прошаран со нов и стар, распаднат асфалт. Кога јавното претпријатие „Градски паркинг“ на сметка на терминалот го прошири паркиралиштето спроти поранешната зграда на „Нова Македонија“, исто така, наместо целосно да го санира просторот, само ги закрпи најочигледните дупки и продолжи да им наплаќа на граѓаните по стандардната цена.