Градбите ќе бидат скалести за да имаат поразигран изглед, но и за да се разбие монотонијата, односно да се избегне ефектот на Кинески ѕид, и да се затвори погледот кон кејот, велат од општината

Макетата на комплексот што ќе се гради на потегот од хотелот „Александар палас“, па сé до ресторанот „Имес“

Елитни спортски објекти, модерни згради за станбено домување, спортски терени, деловни објекти, базени и пешачки мост на Вардар, се само дел од содржините на комплексот што ќе го гради израелска компанија, на потегот од хотелот „Александар палас“, па сé до ресторанот „Имес“, во општината Карпош.
Градбите ќе бидат скалести за да имаат поразигран изглед, како и за да се разбие монотонијата, односно да се избегне ефектот на Кинески ѕид, и да се затвори погледот кон кејот, велат од општината. Локацијата што се протега на површина од 30 хектари се наоѓа на кејот на Вардар. Иницијатори за изградба на овој комплекс, чија изградба ќе е израелска инвестиција, се сопствениците на земјиштето покрај кејот, кои поседуваат 75 отсто од теренот. Тие и самите си побарале инвеститор, чие име сé уште не и го откриваат на јавноста. Преостанатиот дел од локацијата е државно земјиште.

Единствената должност на општината е да направи детален урбанистички план за таа локација.

- Наша обврска е годинава да го направиме ДУП, преостанатите процедури ќе си ги избркаат сопствениците на земјата. Процедурата на некој начин е веќе почната. Изготвена е ажурирана подлога, но ни требаат уште мислења од градот, од Министерството за животна средина и просторно планирање, Министерството за транспорт и врски. Кога инвеститорот ќе го достави идејниот проект, точно ќе се знаеме колку ќе чини оваа инвестиција - вели Виолета Цветковска, портпаролка на општината Карпош.
Проектот за елитниот комплекс е промовиран на интернационалниот општински саем „Некспо 2011“, што на 10 и на 11 овој месец се одржа во Сараево. Општината Карпош, единствената од земјава што учествуваше на саемот, се претстави со повеќе проекти, како интерактивно цеде за туристичките локалитети, адресар на мали и на средни претпријатија, туристичка мапа на општината.

Градоначалникот Стевчо Јакимовски ја потпиша и конвенција на Европската Унија, т.н. „20.20.20.“, со што си зема обврска до 2020 година да се намали емисијата на јаглероден диоксид за 20 отсто и да се супституираат постојаните извори на енергија со обновливи. Со ова општината Карпош влезе во групата зелени градови на ЕУ.

На саемот се претставија околу 100 општини од целиот свет, со околу 1.000 гости-посетители од Кина, Турција, Америка, Италија.

- Ваквото претставување е од големо значење за промовирање на општината Карпош надвор од рамките на нашата земја, особено поради фактот дека имаме капацитети. На средбите се разменуваат и искуства со други локални самоуправи, затоа што на оваа манифестација не се претставуваат само општини, туку и главни градови - изјави Јакимовски.

И градот имаше свој штанд на „Некспо 2011“, на кој се претстави со туристичко-промотивен материјал за Скопје.