Булевар Илинден

Забраната за сообраќај на “Илинденска” не важи без полиција

Поради реконструкцијата, еден од најпрометните булевари во Градот е затворен за сообраќај од раскрсницата со “Ленинова” па се до Зоолошката градина, но тоа за возачите, додека ја нема полицијата, практично не значи ништо.

Овие кадри се снимени денеска попладне, и на нив може да се види дека оваа сообраќајница функционира исто како на неа да не се гради ништо.

Возачи во рели стил поминуваат покрај тешката градежна механизација и ја доведуваат во прашање сопствената и безбедноста на пешаците.

Не помага ниту патната сигнализација која Градската управа ја поставувуа во неколку наврати, а несовесните возачи ја уништуваат.

Градот апелира до возачите, да ги почитуваат сообраќајните правила. 

Булеварот “Илинденска” се гради со засилено темпо. Улицата е целосно завршена на потегот од Фонтана до раскрсницата со Рувелтова, а градежните работи се во полн ек од “Ленинова” па се до раскрсницата пред Владата.

Паралелно се работи и пред поранешната американска амбасада, каде се дислоцира пријавницата, со која амбасадата со години узурпираше една коловозна лента.

“Илинденска” по завршувањето на градежните работи ќе прерасне во модерно булеварско решение, со 4 коловозни ленти, по две во секој правец, нови семафори, штедливо улично осветлување и нови пешачки и велосипедски патеки.

Вкупната вредност на проектот изнесува околу 2 милиони евра, а средствата се целосно обезбедени од Буџетот на Град Скопје.

Доколку се оди според планот, од Градот очекуваат градежните работи во првата фаза да финишираат пред крајот на есента.