Нови регистарски таблички

И додека во Македонија новите таблички според стандардите на ЕУ чекаат подобар економски период, Србија најави дека наскоро српското МВР ќе почне со издавање на новите сообраќајни дозволи и регистарски таблички

Новите регистарски таблички за возилата ќе почекаат подобри времиња. Иако, уште пред две години беше најавен стартот на издавање на нови таблички, македонските возила се уште се со старите регистрации, кои не се според стандардите на ЕУ. Во МВР велат дека главен проблем за неиздавањето на новите регистарски таблички е економската криза.
- Главен проблем е економската криза, иако има и ред други проблеми кои се појавуваат. Тоа не е нешто што итно мора да се спроведе, затоа е оставено да почека. Кога ќе има новини околу табличките на автомобилите, ќе ја известиме јавноста - ни изјавија вчера од МВР.

На крајот на 2007 година МВР информираше дека бил усвоен новиот правилник, а проценките беа дека новите таблички ќе чинат околу 4 000 денари. Стартот на регистрациите изработени според ЕУ стандардите, кои според нацртот требаше да бидат долги 52, а широки 12 сантиметри беше најавен за јануари 2008 година. Распоредот на бројките и буквите според планот треба да остане ист. Две букви кои го означуваат градот во кој се издадени, три бројки и уште две букви. За новите таблички ќе се користи фонтот на букви и бројки што се употребува за изработка на германските регистарски таблички. Основата на табличката требаше да биде бела, но на горниот и долниот дел со флуоросцентна лента да биде поставено македонското знаме и ознаката МК. На левиот дел во сина лента треба да стои повторно ознаката МК, а веднаш до неа вертикално да биде испишано МАЦЕДОНИА. Со проектот е предвидено над ознаката МК, да биде оставено празно место каде во иднина би требало да стои симболот на ЕУ. Помеѓу ознаката на градот и трите бројки стои амблемот на општината, а пред вторите букви во круг ознаката МК. За возилата постари од 35 години, МВР предвидуваше посебни регистарски таблички. Разликата во нив е бојата на подлогата и буквата С до која ќе стои бројот 35. Требаше да бидат воведени и нови ознаки за 7 града во земјава.

И додека во Македонија се чекаат подобри времиња за новите таблички, Србија најави дека наскоро српското МВР ќе почне со издавање на новите сообраќајни дозволи и регистарски таблички. Освен тоа, Србија ќе започне со издавање и на новите возачки дозволи, кои во Македонија се издаваат повеќе од 2 години. Србија првично најави дека новите таблички ќе почнат да се издаваат од јули 2008 година, но заради технички проблеми беше одложено.

Новиот правилник во Србија предвидува постоечките таблички со знамето на СРЈ или СЦГ да се заменат во рок од една година, на редовното продолжување на регистрацијата на возилото. Табличките ќе бидат како оние кои беа зацртани со правилникот на македонското МВР - бели, со сина боја на левата страна на која ќе биде испишана меѓународната ознака СРБ. Со црно латинично писмо ќе биде испишан градот каде е регистрирано возилото, потоа црвен штит со бел крст и четирите полиња со буквата С , под кој со кирилица ќе биде испишана ознаката на градот. Досегашната комбинација од четири до шест броја ќе биде од три или четири цифри и комбинација од две букви на две позиции. Влегуваат сите српски букви, како и Њ, Џ и Ѕ. Новина е регистерската налепница, која ќе се лепи на ветробранското стакло. Регистарски ознаки ќе имаат 59 градови, што значи се воведуваат 18 нови ознаки.

(Б.З.)