Бензински пумпи

Жителите на Аеродром против новата бензинска

Миле А. Ристески	Коментари (0)

Утрината наместена, вечерва урната оградата која го обележува просторот на булевар „Србија“ во скопски Аеродром каде треба да се гради нова бензинска пумпа. На помалку од 50-тина метри од првите згради.

Жителите вечерва ја урнале сами оградата, револтирани од фактот дека се уништува паркот и детското игралиште, но и уплашени за сопствената безбедност и здравје.

„Не дозволуваме да се гради бензинска пумпа. Како прво, близината не го дозволува тоа, ниту пак дозволуваме децата да се трујат од отрови, од разни опасности други. Ова е, буквално бомба пред нос ни ставаат“, вели жителка на Аеродром.

За одлуката да се гради бензиска жителите од булевар Србија разбрале пред три месеци. Веднаш напишале петиција до општината, но и повеле судска постапка пред судот.

„Револтот кај граѓаните се створи затоа што почитувајќи ги институциите на системот, кај сите сме се обратиле и доаѓаме пред свршен чин. Фактички да нема кој да те заштити. Луѓето се спремни, се ова што ќе се изгради да се сруши. Јас не сум видел до сега толку голем број на интелектуалци со таков бес ова да ги направат“, рече жител на Аеродром.

Граѓаните апелираат до надлежните да дојдат и состојбата да ја снимат на терен за да се уверат дека е нелогично да се гради бензиска непосредно до нивните живеалишта.

И утре во попладневните часови ќе се соберат на протест пред оградата која вечерва ја урнаа.

Сега проблемот со реализација на инвестицијата е поврзан со процесот на урбанизација на земјиштето, бидејќи нема детални урбанистички планови за некои населени места или, пак, неопходни се измени во плановите, што е тешка процедура и се развлекува со години, вели директорот Куку

Инвестицијата на нафтената компанија Лукоил во Македонија не се реализира со планираното темпо иако веќе се надминати проблемите при купување на земјиште. Сега проблемот со реализација на инвестицијата е поврзан со процесот на урбанизација на земјиштето, бидејќи нема детални урбанистички планови за некои населени места или, пак, неопходни се измени во плановите, што е тешка процедура и се развлекува со години, вели во интервјуто за ВЕЧЕР, директорот на Лукоил - Македонија, Андреј Куку. Тој нагласува дека компанијата нема проблеми со купувањето на земјишните парцели од приватни лица, меѓутоа, негативно е тоа што практично сите тие се неурбанизирани. Досега во земјава компанијата успеа да изгради осум пумпи, иако со договорот за вложување требаше да има околу 20.

Дали повеќе проблеми имате кога купувате земјиште од државата или од приватни лица?
- Ако земјишните парцели се урбанизирани, односно има маркица за градба на бензинска пумпа, тогаш за нас нема никаква разлика од кого ќе ја купиме земјата. Ако, пак, не се урбанизирани, многу поедноставно ни е да работиме со приватни лица.

Првиот човек на Лукоил, Вагит Алекперов, неодамна на средбата со македонски државни претставници во Санкт Петербург им најави дека руската компанија планира да го шири својот бизнис на Балканот, вклучувајќи ја и Македонија. За какви нови инвестиции станува збор?
- Главно, станува збор за ширење на мрежата на бензински станици. Нашата компанија купи активи во Хрватска и во Црна Гора, а својата дејност Лукоил ја почна и во Босна и Херцеговина. Во Македонија веќе се изградени осум бензински станици, а многу скоро ќе почне изградбата на нови објекти и во Велес и на булеварот Србија во Скопје. Што се однесува до Македонија, малопродажна мрежа на Лукоил ќе се развива и во периодот од 2009 до 2011 година.

Дали тоа значи дека во земјава се надминати сите административни пречки за водење бизнис, поради кои многу слабо се реализираше досегашната инвестиција на Лукоил во земјава?
- За волја на вистината, би сакал да напоменам дека во последните две до три години Владата заврши голема работа што се однесува до подобрувањето на инвестициската и вкупната бизнис клима. Се привршува процесот на денационализација на земјата и оформувањето на катастарот на недвижности, почната е трансформација на државното земјиште кое се наоѓа на користење кај правните и физичките лица. Но, заедно со сето ова, процесот на урбанизација на земјишните парцели останува и понатаму долг и со мноштво административни бариери.

Според оценката на Светската банка, Македонија, годинава напредуваше во спроведувањето реформи за водење бизнис. Дали Лукоил како странски инвеститор ги почувствува овие промени?
- Секако. Нашата компанија годинава почувствува подобрување на инвестициската клима и како пример би можел да наведам дека, во споредба со состојбата од 1 јануари оваа година, кога работеа само три бензински пумпи на Лукоил, денеска се веќе седум и две во изградба. До крајот на овој месец ќе ја пуштиме во употреба и бензинската во скопската населба Автокоманда.

Како влијаеше врз компанијата владината одлука и на малите бензински пумпи да им се дозволи да увезуваат нафтени деривати и течен гас. Имаат ли тие капацитет тоа да го прават со оглед на фактот дека досега деривати увезуваат само големите нафтени фирми ОКТА, Макпетрол, Лукоил и Нико петрол?
- Ваквото решение на Владата да им дозволи на малите бензински да увезуваат нафтени деривати во Македонија, а притоа да постои и соодветна контрола на квалитетот на внесеното гориво, битно не може да влијае врз дејноста на нашето претпријатие. Ние се снабдуваме со сопствени горива со висок квалитет, кои ги увезуваме од рафинериите на Лукоил во Бугарија и во Романија. Се на се, ние ги поздравуваме ваквите мерки бидејќи тие водат кон либерализација на пазарот, и тоа за нас е добра мерка.

Зошто се откажавте од купувањето на државното земјиште за бензинска пумпа во Неготино. Макпетрол беше дисквалификуван поради некомплетна документација и Лукоил можеше да го купи земјиштето за 4.000 денари за квадратен метар? Што се случи, зошто се солидаризиравте со Макпетрол?
- Ние се солидаризиравме со Макпетрол бидејќи сакавме да учествуваме во чесен натпревар и да не се вмешуваме или да не не врзуваат во судски спорови после таквото купување на земја. Имиџот на нашата компанија за нас е многу поскап.

Кои се новите локации што ги пикиравте за изградба на пумпи? Дали Вашата инвестиција се реализира бавно бидејќи чекате да купите атрактивни локации?
- Имаме одбрано многу локации и на голем број од нив се уште работиме, мислам пред се на процесот на урбанизација. За жал, за одделни локации, кои веќе се урбанизирани, досега не се завршени судски спорови кои се влечат со години во различни судски инстанци.

Во Министерството за транспорт и врски денеска се одржаа две јавни наддавања за отуѓување на градежно земјиште сопственост на Македонија наменето за изградба на бензински пумпи во општините Велес и Неготино.

Како што информираа од Министерството за транспорт и врски На јавното наддавање за за отуѓување на градежно земјиште сопственост на Република Македонија наменето за изградба на бензинска пумпа во општина „Велес“ со вкупна површина од 1.784 м², со почетна цена од 4.000 денари по метар квадратен, беа пријавени компаниите „Окта“ и „Лукоил“. За најповолен понудувач на јавното наддавање беше избрана компанијата „Лукоил“, која ја понудила највисоката цена од 13.500 денари по метар квадратен.

 “Лукоил“ е должен во рок од 15 дена по завршувањето на јавното наддавање да ги уплати средствата согласно постигнатата крајна цена од наддавањето и да достави банкарска гаранција во висина од 200 илјади евра, од реномирана банка со добра класификација и кредитен рејтинг, наплатлива безусловно на прв повик за навремено и квалитетно завршување на објектот предвиден за градба на градежното неизградено земјиште, кое е предмет на јавното наддавање, а која гаранција ќе трае до завршување на изградбата на објектот.

По извршената уплата во утврдениот рок Министерството за транспорт и врски склучува договор со најповолниот понудувач за отуѓување на градежното земјиште, со кој најповолниот понудувач се обврзува дека во рок од 6 месеци од склучување на договорот ќе обезбеди одобрение за градба на предвидениот објект со урбанистичкиот план, од надлежната општина, а истиот ќе го изгради во рок од 2 години од прибавеното одобрение.

Исто така на јавното наддавање за за отуѓување на градежно земјиште сопственост на Македонија наменето за изградба на бензинска пумпа во општина Неготино со вкупна површина од 1.912 м² и почетна цена на јавното наддавање изнесува 3.200 денари за метар квадратен, беа оријавени компаниите „Лукоил“ и „Макпетрол“. Компанијата „Макпетрол“ беше дисквалификувана заради некомплетно доставена документација до Министерството за транспорт и врски, по што претставниците на компанијата „Лукоил“ се солидаризираа со своите колеги и се откажаа од јавното наддавање. Министерството за транспорт и врски ќе распише нова објава за јавно наддавање за истата локација во општина Неготино.