Интернет и телекомуникации

	ПРЕГЛЕД НА ВЕСНИЦИ

Словенечкиот телеком е заинтересиран да го купи мобилниот оператор, кој од неодамна нуди и фиксна телефонија "Космофон", информираа вчера од седиштето на компанијата во Љубљана. "Телеком Словенија" е веќе присутен во Македонија преку Интернет и фиксниот оператор "Он.нет".
Словенечкиот оператор очекува продажбата на "Космофон" да финишира во февруари или во март.
"Сега сме сконцентрирани на најавената продажба на вториот мобилен оператор во Македонија, но заинтересирани сме за влез и во останатите бивши југословенски држави", вели портпаролката на Словенечки телеком Даринка Павлич - Камиен, чија изјава вчера ја пренесе агенцијата "Ројтерс".
Словенечкиот телеком веќе е во преговори со банките за обезбедување 400 милиони евра синдикален заем, наменет за планираните преземања во регионот на поранешна Југославија.
Интерес за купување на "Космофон" пред еден месец најави и австриски "Мобилком", кој е веќе присутен на македонскиот пазар преку третиот мобилен "Вип оператор". Продажбата на "Космофон", пак, е неопходна за да се спречи враќањето на монополот на "Дојче телеком" на македонскиот пазар. Германската компанија е сопственик на Македонски телеком и на "Т-Мобиле Македонија", а со купувањето на 25 отсто од акциите на грчки ОТЕ, го презема и управувањето со македонскиот "Космофон".

Весна Дамчевска
Наталија Томовска

Норвешкиот мобилен оператор „Теленор“ ја известил македонската Влада дека е заинтересиран за купување на македонскиот оператор „Космофон“ кој е во сопственост на грчки ОТЕ. - Писмено не известија дека се заинтересирани да го купат „Космофон“. Секако, тоа е приватна компанија, но од нас ја добија информацијата за условите за работа во Македонија - изјави премиерот Никола Груевски по средбата со стопанствениците од Норвешка во Осло. Покрај „Теленор“ за продажбата на „Космофон“ досега интерес покажаа австрискиот мобилен оператор „Мобилком Австрија“, и „Телеком Словеније“. Борис Немчиќ, извршен и генерален директор на „Мобилком Австрија“, изјави дека се сериозно заинтересирани за купување на „Космофон“. Словенечкиот телеком, пак, пред два дена на својата веб-страна и официјално соопшти дека аплицирале за кредит за купување на мобилниот оператор „Космофон“ во Македонија. Денот, пак, кога ќе се продава овој мобилен оператор засега се држи во строга тајност. „Космофон“ во моментов има 650 претплатници, а неговата вредност неофицијално се проценува на повеќе од 300 милиони евра. Со продажбата ќе се спречи монополот на „Дојче телеком“, кој годинава откупи 25 проценти од управувачкиот пакет-акции на ОТЕ. Комисијата за заштита на конкуренцијата, за да го спречи монополскиот однос на „Дојче телеком“, кој ги контролира двата мобилни оператори „Космофон“ и „Ти-мобајл“, одлучи дека еден од тие оператори треба да биде продаден. Доминантните акционери одлучија да се продаде „Космофон“ за да се спречи монополот во државава.

Во Осло заинтересирани за индустриските зони

Норвешките инвеститори и понатаму се заинтересирани да управуваат со индустриско-технолошките зони во Македонија, изјави премиерот Никола Груевски по средбата со инвеститорите во Норвешка.
- Практично, тоа значи да се дадат зоните под концесија на 99 години. Ние имавме еден тендер за концесионерство, но тој не успеа, пред се бидејќи зоните ги нудевме на концесија од 40 години - вели Груевски.
Во Македонија се планирани шест индустриско-технолошки зони. Со нивното давање под концесија, концесионерот сам би донел инвеститори кои би вложиле во Македонија. Во Норвешка постојат и државни инвестициски фондови и тие покажале интерес за одредени инвестиции во Македонија.

Во моментов Дојче Телеком не прави профит во Македонија од работењето на Космофон бидејќи мобилниот оператор егзистира како посебен правен субјект на пазарот на електронските комуникации, вели претседателот на Комисијата, Чедомир Краљевски

Космофон дефинитивно ќе оди на продажба. Комисијата за заштита на конкуренцијата (КЗК) со носењето на вакво решение само го потврди пишувањето на ВЕЧЕР дека Космофон ќе мора да ја промени сопственоста бидејќи се создава концентрација на капитал, а со тоа и на моќ на Дојче Телеком на македонскиот телекомуникациски пазар, што настана по договорот за купување на дел од грчки ОТЕ, кој е стопроцентен сопственик на Космофон. Освен дека од Комисијата го прифатиле предлогот на Дојче Телеком и на ОТЕ за продажба на Космофон за да не се створи концентрација на мобилниот пазар во земјава, од КЗК не обелоденија други детали. Оттаму се правдаат дека станува збор за ембарго ставено од Дојче Телеком да не се објавуваат осетливи податоци од решението, вклучително и за крајниот рок до кога Космофон ќе треба да се продаде и судбината на Германос.
- Решениете е доставено до Дојче Телеком и ОТЕ, но треба да поминат одреден број на денови за да го прочитаат, да видат што содржи и да одлучат кои делови од образложението на решението ќе бидат подготвени за објавување на веб-страницата на Комисијата. Ние сме должни да го објавиме само диспозитивот на решението, но во него ќе ги нема поединостите и деловите што се содржани во образложението - ни изјави претседателот на КЗК, Чедомир Краљевски.

Запрашан дали купопродажбата меѓу Дојче Телеком и ОТЕ е завршена работа, Краљевски рече дека најверојатно е така и дека е капитално завршена. Во моментов, рече тој, нема монопол на пазарот во Македонија, но изјави дека концентрацијата во земјава се уште не е спроведена во органите надлежни за тоа - Централниот регистар.
- Во моментов Дојче Телеком не прави профит во Македонија од работењето на Космофон бидејќи мобилниот оператор егзистира како посебен правен субјект на пазарот на електронските комуникации - рече Краљевски.

Доколку Дојче Телеком не го прифати решението, тогаш КЗК има можност да поведе прекршочна постапка и да го казни до 10 проценти од остварениот промет во претходната година. На КЗК на располагање му се и други механизми, како на пример, забрана за обавување на дејност во одреден временски период и враќање во состојбата во која се наоѓале пред донесувањето на решението.