Нови регистарски таблички

МВР ќе ги одложи новите регистарски таблички

Место од 1 јануари 2008 година, издавањето на табличките најверојатно ќе доцни неколку месеци

Даниела Трпчевска

Издавањето на новите регистарски таблички за возилата во земјава, кое предизвика низа реакции во јавноста, најверојатно ќе се одложи за неколку месеци. Иако со Правилникот за регистарски таблички, кој беше објавен во „Службен весник„ на 14 ноември годинава, се предвидува табличките да се заменуваат од 1 јануари 2008 година, во МВР се скептични дека дотогаш ќе успеат да ги направат сите неопходни подготовки. Тие и понатаму остануваат на ставот дека табличките мора да се променат, со цел во нив да бидат содржани неопходните заштитни знаци, кои, како што тврдат, ги содржат повеќето земји во светот. Натписот МК и вертикално испишаното име на државата на латиница MACEDONIA се дел од двата софистицирани сигурносни знаци кои ќе бидат составен дел од новата регистарска табличка во земјава.

Процените се дека во земјава има околу 300 илјади регистрирани возила. Она што најмногу ги засега сопствениците на возилата е тоа што промената на регистарските таблички ќе го оптовари и онака сиромашниот домашен буџет, особено поради најавите дека промената на новите таблички би чинела околу четири илјади денари. Од МВР, пак, велат дека во оваа фаза никој не знае колку би чинеле новите таблички, со оглед на тоа дека се' уште не е распишан ниту тендерот за нивна набавка.

„Идната недела треба да биде распишан тендерот, а целата постапка околу изборот на понудите најверојатно ќе трае неколку месеци. Колку ќе чинат новите таблички и кога ќе почне нивната замена зависи, пред се', од исходот на тендерот“, вели помошник-министер за информирање во МВР, Иво Котевски.

Според него, дури откако ќе заврши тендерската процедура ќе се знае дали сите таблички ќе се менуваат одеднаш или пак етапно.


На регистарските таблички на земјите од ЕУ, како што може да се види од сликите, е напишан само кодот на државата. Според она што го тврдат од МВР, зборот MACEDONIA е холограм и нема да биде видлив за голо око

Според министерката за внатрешни работи, Гордана Јанкулоска, обврската за промена на регистарските таблички произлегува од Законот за безбедност на сообраќајот на патиштата, кој беше усвоен од страна на Собранието во мај годинава. Според членот 345 од овој Закон, регистарските таблички треба да имаат соодветен квалитет и заштита, како и софистицирани сигурносни ,односно заштитни знаци, а тоа се холограм во повеќе бои и ОВД хромирана лента. Други ознаки не е дозволено да се истакнуваат.

Правилникот предвидува регистарските таблички да имаат рефлектирачки својства и вградени заштитни знаци „МК“ и знамето на Република Македонија отпечатени на рефлектирачката фолија во сребрена боја. Најмногу реакции предизвика одлуката на табличките повторно да биде впишана ознаката МК, која поради проблеми со јужниот сосед, еднаш веќе беше извадена од регистрациите. Вториот проблем што се посочува е впишувањето на целото име на државата на латиница – MACEDONIA, што предизвика и најмногу реакции. Но, од МВР тврдат дека станува збор за заштитен знак, впишан на холограм, кој не е видлив со голо око.

„Станува збор за еден од многуте заштитни знаци кои ќе ги содржат табличките за да се спречи нивна злоупотреба и фалсификување. Написот нема да биде видлив со голо око, а ќе биде поставена на ОВД хромирана лента долга 12 милиметри, а широка 5 милиметри. Табличките ќе содржат и ОВД холограм, во повеќе бои во форма на круг со пречник од 29 милиметри со впишана национална ознака МК“, велат во МВР.

Ваквата одлука на МВР предизвика низа реакции во јавноста. Многумина ова го протолкуваа како уште еден погрешен потег, но и нова провокација со Грција, во момент кога се разгорува спорот со името. „Со ова само се изложуваме на ризик македонските возила да не бидат пропуштени да влезат во Грција“, коментираат граѓаните.

Министерката за внатрешни работи, Гордана Јанкулоска, не очекува реакции од Грција поради ваквата одлука. „Не мислам дека името на нашата држава е провокација. Немаме дилеми дека Македонија има право да го носи уставното име“, е ставот на министерката што го пренесоа медиумите.

Но, дел од партиите во парламентот, во ваквата одлука гледаат погрешен потег. „Ние можеме да толкуваме како сакаме, но за Грција дефинитивно ќе биде провокација“, беше коментарот на Горѓи Оровчанец, претседател на Нова алтернатива. И ЛДП и СДСМ го изнесоа својот став дека нема потреба од ваква одлука во овој момент.