ТИРЗ Скопје - Бунарџик

По детални анализи за оперативните трошоци и бенефиции во Македонија, британската компанија „Џонсон Мети“ утврди дека Македонија не е само најдобра локација, туку и дека целосно се совпаѓа со идните потреби на компанијата, изјави за „Време“ Веле Самак, министер за странски инвестиции. - Во наредните две-три недели „Џонсон Мети“ треба да ги финализира деталите за тоа каков тип технологија ќе се воведува во новите погони во Бунарџик, одлука што зависи од пазарните потреби на компанијата. Овие потреби се базираат на плановите за изградба на фабрика во Бунарџик, што е предвидено за крајот на 2009 или почетокот на 2010 година - вели Самак. Тој додава дека во секој случај изворите што ја карактеризираат оваа одлука како двоумење од страна на „Џонсон Мети“ или како дополнителен ризик за инвестирање базирано на Спогодбата за стабилизација и асоцијација со ЕУ се неточни и имаат претенциозна цел да направат штета на владината програма да привлече странски инвестиции. Во јавноста се шпекулира дека „Џонсон Мети“ размислува дали да инвестира во земјава поради можноста за промена на царинските давачки за различни полупроизводи во размената со земји-членки на ЕУ. Меѓутоа, во Европската комисија вчера потврдија дека во иднина царинската политика меѓу Македонија и ЕУ ќе оди во насока на понатамошна либерализација и намалување на давачките. Самак вели дека британската компанија треба да потпише договор за закуп до крајот на годинава. Тој очекува во наредните 6 до 12 месеци износот на странски инвестиции во земјава да се удвои и повеќе странски фирми јавно да ги изразат намерите и проектите што почнуваат да ги работат во Македонија. „Џонсон Мети“ најави дека ќе вложи 75 милиони евра во изградба на фабрика за производство на катализатори во слободната економска зона Бунарџик. Во фабриката би требало да се вработат околу 300 луѓе.