Мост на цивилизациите во Македонија (Мост Око)

Конкурс распишан за да пропадне

Познавачите сметаат дека Општина Центар не смеела да им дозволи на уметниците сами да одберат за која личност ќе направат скулптура на конкурсот за 29 идејни решенија за скулптури на историски личности за мостот „Око“

Конкурсот за поставување 29 скулптури на мостот „Око“ е осуден на пропаст, сметаат познавачите. Тие велат дека е нелогично нарачателот да бара идејни решенија за скулптури на историски личности, а да не наведе на кои личности мисли.

Во конкурсот што го распиша Општина Центар учесниците имаат слобода во определувањето на личностите што ќе ги претстават со скулптурите. Како единствен услов и важен критериум е наведено дека треба да се доловат историски личности чие постоење и дејствување оставило белег на овие простори, за кои постојат археолошки наоди во Археолошкиот музеј.

- Кога се распишува конкурс за личности од историјата, мислам дека е неупатено да им се даде слобода на уметниците во изборот на историските личности, бидејќи може да се случи многу уметници да се определат за мал број, односно за исти историски личности. Тоа е сериозен недостаток. Конкурсната комисија морала да ги наведе историските личности што треба да бидат претставени со идејните решенија. Нарачателот мора да знае што сака. Вака излегува дека всушност не знае што сака или оној што го подготвувал не знаел како тоа правилно да го направи. Или, пак, конкурсот е направен за да не успее - вели архитектот Вангел Божиновски.

Професорот на Архитектонскиот факултет, Мирослав Грчев, вели дека идејата да се поставуваат скулптури на историски личности на современ мост е бесмислена.

- Самата идеја да се поставуваат скулптури на современ мост е сосема неразумна, бидејќи мостовите денес се градат на сосема друг начин. Ваквиот начин на изразување некаква општествена идеја е надминат со векови. Оној што денес посега по таков скулптурален или архитектонски јазик, кој веќе ниеден архитект или уметник не го зборува, тој очигледно не знае ништо. Станува збор за сосема неоправдано трошење огромни количини на јавни пари - вели Грчев. Според него, ваквото узурпирање на јавниот изглед на градот, на јавниот простор и на јавните пари не е прашање на архитектонско, ликовно или естетичко проценување, туку е прашање на корупција на државната супстанца во земјата.

- Практично, тоа се симптоми на внатрешно распаѓање на државата. Токму тие, државните органи и локалната самоуправа, кои треба да се јавен сервис и домаќински да работат со јавните пари, фактички ги крадат од народот и од нивната вистинска намена, а воедно ги упропастуваат и уништуваат во идеи за кои воопшто не се образовани, подготвени и надлежни. Оваа идеја е бесмислена и ќе заврши со ужасна грдосија - вели Грчев.

Еден од авторите на проектот за „Око“, Борислав Јосифов, кој е и директор на проектантската куќа „Инпума“, вчера не сакаше многу да коментира дали со слободното изразување на скулпторите нема да се наруши модерниот архитектонски концепт на мостот. Тој само истакна дека тоа било направено во негова согласност.

- И нарачателот на проектот, како и изведувачот, се консултираа со мене за тоа. Повеќе не би имал што да кажам - вели Јосифов.

Од Општина Центар сметаат дека комисијата што ќе ги прегледува трудовите нема да дозволи да се наруши естетската вредност на мостот.

- Една од задачите на стручното жири е да обезбеди исполнување на проектните задачи и да ги обезбеди зададените естетски вредности со проектот на мостот - велат од Општината.

За 29 скулптури Општина Центар планира да потрошат околу 600 илјади евра, односно по 20 илјади евра за скулптура.

Мостот „Око“ се наоѓа непосредно до Камениот мост и досега беше многу критикуван како непотребен и нефункционален објект. Се гради исклучиво за потребите на зградата во која ќе бидат сместени Уставниот суд, Архивот и Археолошкиот музеј. Таа се гради на самиот Кеј од левата страна на Вардар, на проблематична близина до реката.

Мостот ќе има форма на око, со стаклен под во одредени делови. Од двете страни ќе има мермерна ограда, покрај која ќе се постават клупи, а во центарот е предвидена фонтана. На оградата прво беше замислено да има фигури на воини, но сега е дефинирано дека ќе има распоредено по 14 скулптури од двете страни, високи по два метра. Во средината, кај фонтаната, ќе има и централна скулптура што ќе биде висока три метри. Изградбата на мостот, вреден околу 1,5 милион евра, се очекува да заврши до средината на 2011 година.

Скопјани ги револтира и тоа што иако темелите свечено ги удри премиерот Никола Груевски лани во септември, изградбата се уште не е почната. Кејот напразно со месеци е прекинат со тараби и купишта песок и не може да се користи за рекреација.

Според општинските власти, изградбата е во тек, односно се вр-шат подготвителните работи.

http://dnevnik.com.mk/?ItemID=6298170E2074E94FB7130618705BEC3B