Облакодери во Скопје (општо)

Градот е немоќен при урбанизацијата на централното подрачје

Центар не ја прифаќа забелешката оти на Скопје не му се потребни стокатници

Случајот со „Голем ринг“ и стокатниците е доказ дека при процедурата на носење на плановите не се усогласени и испочитувани желбите и идеите, но, пред се', и стручните мислења

ДЕСПИНА ТРАЈКОВСКА

Наместо да се едни од главните фактори во урбанизацијата на централното градско подрачје, градските власти се најдоа во ситуација на неми набљудувачи во кроење на новиот ликот на центарот на Скопје. И тоа токму во период кога Општина Центар во нови урбанистички рамки го стави „Мал ринг“, а наскоро ќе одлучува и по конечната урбанизација на „Голем ринг“. Негативните забелешки што Градот ги даде во однос на ДУП за „Мал ринг“, речиси воопшто не се земени предвид од страна на општинарите. Општина Центар не ја прифаќа забелешката оти на Скопје не му се потребни стокатници. Оваа е само една од 15-те забелешки на градските власти кои се немоќни да го спречат самоволието на општинарите, зашто законската регулатива не ја задолжува Општината да го земе предвид мислењето од Градот.

Архитектот Мирослав Грчев посочува дека токму ваквите законски рамки предизвикуваат општинарите да ги ѕидаат самоволно своите општини. Сепак, смета Грчев, со заедничка желба, пред се' за доброто на граѓаните и на Градот, општините имаат морална обврска за почитување и усогласување на желбите на Градот Скопје, но и на повисоките инстанции.

„Случајот со ’Голем ринг‘ е доказ дека при процедурата на носење на плановите не се усогласени и испочитувани желбите и идеите, но, пред се', и стручните мислења. Не може Општината да донесе план за кој од Градот има куп забелешки и притоа ниту една да не се земе предвид“, смета Грчев, според кого релацијата Град Скопје - Центар, кога станува збор за урбанизацијата, е отидена во погрешна насока. „Водени од дневнополитички цели, Општина Центар си го крои ликот на плоштадот и околината по своја мера и по терк на своите политички истомисленици, во случајов Владата. Кристално е јасно дека урбанистичките планови се скроени за да претставуваат основа за реализација на владините проекти, како што се стокатниците, обновата на театарот, профитирање на семејството Здравеви и слично“, посочува Грчев и вели оти има сознанија дека Општина Центар е единствената од сите десет општини која не го есапи Градот, а наедно и не се раководи по ГУП.

Од Градското одделение за информирање вчера не беа во можност да информираат за соработката на градските власти и останатите општини кога станува збор за урбанизацијата, особено за нивната релација со Општина Центар.