Облакодери во Скопје (општо)

Скопскиот градоначалник Трифун Костовски не дава согласност за изградба на три стокатници спроти хотелот "Холидеј ин" во центарот на градот. Тој вели дека Градот дал негативно мислење на нацрт-верзијата на деталниот урбанистички план "Голем ринг", со кој се предвидува на просторот спроти хотелот "Холидеј ин" да се изградат три стокатници, која беше усвоена од Советот на Општина Центар во јуни годинава. Според него, има повеќе причини поради кои не може да се согласи со идејата во овој дел од градот да никнат облакодери, откако Владата на почетокот на годината најави дека спроти "Холидеј ин" ќе прави скопски Менхетн, односно дека ќе гради три 50-катници.
"Не се согласувам со стокатниците, бидејќи многу нешта недостигаат за да се реализира ваков проект. Немаме никаква инфраструктура, а со планот е предвидено под објекти да има околу милион квадратни метри простор. Таму ќе има дневна миграција од околу 80.000 до 100.000 луѓе, а предвидени се само 7.000 места за паркирање што не ги задоволува ни основните потреби. Со планот е предвидено да има два алтернативни излези, и ако се направи процена и на тие 7.000 возила, кои ќе бидат и трипати повеќе, за да влезе и да излезе секое возило ќе му требаат минимум по три часа", вели Костовски.
Според градоначалникот Костовски, спроти хотелот не може да се градат облакодери бидејќи Скопје нема изграден систем на подземна инсталација, односно нема ниту довод на вода ниту на топлинска и електрична енергија.
"Енергетскиот систем ни е многу слаб. Во Њујорк само половина час немаше струја и имаше над 30 неразјаснети убиства и уште двапати повеќе грабежи. Не дај боже подолго време во тие стокатници да нема струја. Не сакам ни да помислам што може да се случи. Факт е дека денес живееме во свет на една специфична војна - тероризам. Со што располагаме за да има обезбеденост на такви објекти. Кога успеаја Близначките во Њујорк да ги турнат, тероризмот веќе не гледа каде напаѓа, тој бара само жртви. Јас не сакам моето Скопје да ја има истата црна судбина на Њујорк", вели Костовски. Скопскиот градоначалник вели дека градоначалничката на Центар Виолета Аларова барала да се измени Генералниот урбанистички план на Скопје за да се вметнат во него измените предвидени со ДУП "Мал ринг" и дека Градот дал 15 причини поради кои не може да се согласи со вакви измени на планот.
"Најадете ми земја во која има стокатница, земја во која има 300-метарски згради. Па дури и Ајфеловата кула не е толку висока. Проблемите на Скопје се под земја, и ако дојде потенцијален инвеститор, проблемите ќе дојдат кај нас во Градот. Не сакам да ни се повтори прикаската со 'Џонсон контролс'. Рековме дека до први септември ќе се пушти гасот за 'Џонсон контролс'. Денес сме скоро ноември, а гасот никаде го нема. Ние не можеме да живееме со импровизации. Светот е многу прагматичен, и бара исполнување на обврските. Мора да бидеме многу реални и да признаеме што можеме, а што не можеме", вели Костовски.
(Е.А.)