Инфраструктура (општо)

Железничката пруга која треба да ги поврзе Бугарија, Македонија и Албанија се очекува да биде готова до 2012 година. Овој мегапроект, владата го ставила во приоритетите бидејќи недостига само неговата доизградба, поточно на дел од железничката пруга од Крива Паланка до македонско-бугарската граница. Оваа пруга е дел од Коридор 8, кој покрај овие три земји ќе ја поврзува Јужна Европа со Блискиот Исток. Од владата се надеваат дека наскоро ќе се знае и која фирма ќе го доврши градежниот проект.
Од Министерството за транспорт и врски информираат дека во месеците што претстојат јавното претпријатие „Македонски железници - инфраструктура“ од Скопје ќе распише тендер. Јавниот повик ќе биде за изработка на инвестициско-техничка документација за изградбата на делниците Куманово - Бељковце - Крива Паланка.
- Исто така, предвидено е изработка на студии и идеен проект за железничкиот дел од Коридор 8 на делницата од Кичево до Лин, односно до границата со Албанија - вели Драган Симоновски, портпарол на Министерството за транспорт и врски.
Со железничкото поврзување, сметаат од Министерството, ќе се зголеми економската соработка меѓу двете земји, особено во услови кога железничкиот транспорт во земјава се развива. Пругата кон Бугарија почна да се гради уште пред десетина години. Проектот го стопира Светска банка поради економската неоправданост. Но, идејата за доизградба повторно се актуализира откако Бугарија стана членка на ЕУ.
Од 89 километри на македонска страна, недовршени останаа уште 23. На бугарска страна останаа уште само 2 километри без железничка пруга.
Една од опциите е и добивање финансиски средства од европските фондови за доизградба на железничката линија кон Бугарија. Македонскиот министер за транспорт, Јанакиевски, и неговата колешка од Бугарија, Никофорова, пред скоро време се договорија заеднички да лобираат во ЕУ за да добијат дополнителни 240 милиони евра за доизградба на пругата.
Македонија прави напори да ја дозаврши пругата кон Бугарија, која на македонските компании им ја отвора вратата кон пристаништето во Бургас. Повеќедневната блокада на возовите кон соседна Грција пред неколку месеци им зададе удар на компаниите и шпедитерите, не само во Македонија, туку и во Србија и во Грција.

НАД ПЕДЕСЕТ КРАЖБИ ЗА ШЕСТ МЕСЕЦИ ВО СКОПЈЕ

Крадци на бакар ја соголеа железницата

Според МВР, само на подрачјето на Скопје во првите шест
 месеци од годинава биле регистрирани 55 тешки кражби

Крадци на бакар за половина година извршиле 55 тешки кражби од „Македонски железници“ само на подрачјето на Скопје и неколкупати ја загрозиле безбедноста на железничкиот сообраќај во државава. Полицијата го уапси скопјанецот Сашо Ц. (39), досега осудуван на казни затвор од вкупно 15 години, кој бил фатен на дело во средата додека крадел бакарни намотки поставени за сигнализација на пругата помеѓу железничките станици во скопското село Лисиче и во населбата Јане Сандански. Истрагата утврдила дека тој за неколку дена извршил три тешки кражби на бакарни намотки. Истражниот судија му одредил притвор од 30 дена.Според полицијата, крадецот во средата околу 16 часот со велосипед пристигнал на пругата кај месноста Бабајлија, каде што била поставена придушница. Потоа со француски клуч го отстранил капакот од придушницата и со клештите ги исекол доводите за бакарните намотки. Во моментот кога се обидел да ги демонтира, го забележале двајца вработени во ЈП „Македонски железници“, го фатиле и го однеле во полициската станица во Драчево.

Истрагата утврди дека осомничениот на идентичен начин од истата придушница украл уште три бакарни намотки. Од месноста Пужевина во атарот на селото Студеничани украл уште три бакарни намотки.Според МВР, украдените бакарни намотки ги продал во отпадот „Манчевски Петрол“, сопственост на Д.Ц., на улицата Драчевска, во скопската населба Драчево. Дел од бакарните намотки биле пронајдени во отпадот и биле вратени во „Македонски железници“. Со кражбите осомничениот ја загрозил безбедноста во сообраќајот со тоа што, при демонтирање на придушницата дошло до прикачување погрешен сигнал на контролната табла во железничката станица во Драчево. Пречката била регистрирана, а сообраќајот бил во прекин.Осомничениот од порано и' е познат на полицијата како сторител на тешки кражби. Му биле изрекувани казни затвор од вкупно 15 години.Според МВР, само на подрачјето на Скопје во првите шест месеци од годинава биле регистрирани 55 тешки кражби и кражби од железницата. Полицијата расветлила 20 кражби. Поради кражба на бакарни придушници во април годинава, локомотива од товарен воз излета од шините на пругата од железничките станици помеѓу Дуброво и Демир Капија. Во инцидентот, за среќа, немаше повредени, а не беше оштетена ниту пругата.

(Д.В.)