Реконструкција на А1 / Е75

• Скопје, 15 декември (МИА) - Денеска свечено ќе бидат пуштени во употреба 20 мостови реконструирани во рамките на втората фаза од Проектот за санација и зајакнување на мостовите на Република Македонија ...ПОВЕЌЕ

Автопатот од Скопје до Велес ќе се асфaлтира со пари на НАТО

Буџетот од 35 милиони евра нема да се потроши за мостовите, остатокот ќе се пренамени за автопатот

ВЕРЧЕ ГЕОРГИЕВСКА

Коловозот на автопатот од Скопје до Велес, делница на која годинава се реконструираа 29 моста, ќе се асфалтира со пари од НАТО, дознаваме од неофицијални извори. Постојат огромни шанси дел од одобрените средства на НАТО во висина од 35 милиони евра, за санација на вкупно 50 моста во државава, почнувајќи од граничниот премин од Табановце до Гевгелија, да не се потрошат. Овие пари првично се предвидени само за мостовите. Но, со оглед на тоа дека целата сума нема да се потроши, остатокот ќе се пренамени за асфалтирање на критичните точки од автопатот.

Овој потег од автопатот, кој е во катастрофална состојба и е полн со дупки, Владата немаше пари да го асфалтира додека траеше реконструкцијата на мостовите, кога сообраќајот беше забранет. Процените беа дека за целосно нов коловоз се потребни околу 13 милиони евра.

Досега, за поправка на 29 од вкупно предвидените 50 моста, како што дознаваме, потрошени се околу 12 милиони евра, или една третина од одобрените 35 милиони евра. Се претпоставува дека за преостанатите 21 мост, кои треба да се санираат во текот на идната година, ќе се потрошат уште 10-12 милиони евра, така што остатокот ќе се искористи за обновување на коловозот. Но, според нашите сознанија, дури и да се потроши целата сума само за мостовите, кај НАТО сега постои расположение, откако ќе се поправат оштетените мостови, да се одобри дури и нов буџет само за автопатот. Кој дел е најкритичен за целосно нов асфалт, ќе каже Министерството за транспорт и врски, кое треба да изработи студија.

Асфалтирањето нема да се случи идната година, туку дури во 2009 година, кога се очекува да се поправат сите мостови од Табановце до Гевгелија што беа руинирани за време на косовската криза од тешките возила на НАТО што го користеа автопатот за транспорт меѓу Косово и грчкото пристаниште Солун.

Првите 29 моста, кои беа реконструирани за време на првата фаза, веќе се пуштени во употреба пред три недели, а оштетениот коловоз од Скопје до Велес само се пополни со крпеници. Втората фаза за реконструкција на 21 мост ќе почне од 1 февруари идната година, за кога е предвиден стартот на градежните зафати. Во тек е изборот на фирма што ќе ги поправа мостовите. Тендерот е при крај, собрани се понудите од фирмите и се очекува најдоцна до 22 декември да се избере изведувачот што ќе ги санира мостовите од Неготино до Демир Капија. Првите мостови ги реконструираше турската фирма „Џесаш“.

За време на градежните работи, на оваа делница од автопатот сообраќајот нема да се забрани, туку ќе се одвива во отежнати услови, бидејќи прво ќе се поправа едната половина, а потоа другата половина на мостовите. Овој потег не може да биде целосно затворен за сообраќај затоа што нема алтернативен пат.