Денеска нема да има уривање на „Илинденска“

Општина Карпош се надева дека ќе се најде компромисно решение во некој разумен рок

Деспина Трајковска


Градежната механизација на Општина Карпош денеска нема да ја почне „чистката“ на привремените објекти на „Илинденска“, на потегот од Зоолошката градина до раскрсницата со „8 Септември“ и иако нивните сопственици сами не го сторија тоа во определениот рок, а во интерес на проширувањето на улицата за уште две ленти. Градоначалникот Стевчо Јакимовски тврди дека општинските багери нема да забрмчат уште извесен период во кој се надева дека засегнатите жители, Општината и Градот Скопје ќе изнајдат компромис. Како и градските власти и Јакимовски смета дека реализацијата на проектот за проширувањето на „Илинденска“ е неопходна, па од тие причини во ниту еден случај нема да се изземе од обврската наскоро да го оспособи теренот за градба.

„И покрај се', уривањето денеска сигурно нема да почне, а жителите ниту во иднина нема да ги оставиме на улица. Убеден сум дека ќе најдеме заеднички јазик. Тие ќе го добијат обесштетувањето како што налагаат сите закони, но во ниту еден случај нема да можеме да се пазариме надвор од дозволените законски норми. Станува збор за акција која е неопходна за проект од јавен интерес и имаме обврска да го расчистиме теренот“, изјави вчера Јакимовски, според кого на потегот има и дивоградби наспроти тврдењата на жителите што велат дека сите објекти се легални.

Речиси идентичен став имаат и од Градот Скопје, од каде што се надеваат дека проблемот ќе се реши како во случајот кога се градеше делот од обиколницата, булеварот „Словенија“ и сличните ситуации со проектот за булевар „Србија“.

„Немаме ништо против одложувањето на акцијата на Општина Карпош, но доколку таа биде во толерантен рок. Што се однесува до реакциите и барањата на жителите, единствено можеме да повториме дека ние сме подготвени да им излеземе во пресрет во рамки на законот. Доколку сметаат дека утврдената цена за обесштетување на земјиштето е ниска, можат да поведат постапка пред судските органи. Во случај жалбата да им биде прифатена, Градот Скопје ќе мора да ги обесштети“, рекоа вчера од Градот.

Сопствениците на петнаесетината објекти, најголем дел од нив индивидуални куќи, уште во понеделник кога добија решенија за отстранување на градбите во рок од три дена, категорично најавија дека нема да го сторат тоа. Одбиваат да го исполнат бараното, оти според нив утврдената цена за обесштетување од 5.280 денари за квадратен метар земја е прениска. Истовремено, бараат да бидат обесштетени и за објектите, иако според надлежните најголем дел од нив се дивоградби и од привремен карактер.

http://utrinski.com.mk/?ItemID=E7D4D23253B84E449C6794483AD36604

- да се копа тунел е SF во ова време на беспарица во државата и градот.
- има ли некој идеја колку милиарди ќе чини еден таков слободно за нас може да се нарече грандиозен проект.
- дали е во моментот тоа би требало да биде приоритет за градот а се друго да застане.
- четири ленти доволно ќе го растеретат тој правец.
- и таа фарса со граѓаните; ке немале зеленило, ќе имале мали третоари, ќе немале каде да паркираат - па луѓе тоа е живот во центар и метропола.

Референдум против проширување на „Илинденска“

Либерално-демократската партија ќе иницира собирање потписи на граѓаните на Општина Центар за одржување референдум против проширувањето на улицата „Илинденска“.

Оваа партија вчера на прес-конференција го изрази своето незадоволство во врска со одлуката на градските советници за проширувањето на оваа сообраќајница.

„Оваа одлука беше поддржана од советниците на коалицијата на ВМРО-ДПМНЕ и дел од советниците на СДСМ. Единствено советничката група на ЛДП и независниот советник беа против“, изјавија од ЛДП.

Од оваа партија додаваат дека проширувањето на „Илинденска“ не беше предвидено во изборната програма на градоначалникот Коце Трајановски, ниту на ВМРО-ДПМНЕ и СДСМ. Истовремено, оценуваат дека проширувањето на „Илинденска“ е спротивно со важечките Генерален и Детален урбанистички план. (Сн. К.)

Цела Илинденска со четири ленти