Реконструкција на А1 / Е75

ГОДИНАВА НЕМА ПАРИ ЗА АСФАЛТирање на автопатот СкопЈе - Велес

Мостовите обновени, дупките во асфалтот останаа

Гледано од технички аспект асфалтирањето сега ќе биде многу поевтино и побезбедно решение бидејќи делницата е затворена за сообраќај

Граѓаните ќе возат по дупки и крпеници по пуштањето на делницата Скопје - Велес бидејќи нема пари за асфалтирање на автопатот по едногодишната реконструкција на 29 моста, која треба да заврши на крајот од октомври. НАТО одобри 35 милиони евра за обновување на мостовите, а за асфалтирање на автопатот Фондот за регионални и магистрални патишта побарал 12,8 милиони евра од државниот буџет, но Владата не ги одобри парите поради прекраткиот рок. Фондот дури сега побарал пари од Владата бидејќи цела година се обидувал да издејствува кај НАТО асфалтирањето да падне на товар на алијансата.

- Асфалтирањето на патот е ставено како приоритет за во наредната година. Очекувавме парите да дојдат од НАТО, но тие немаат предвидено пари за рехабилитација во оваа фаза. Со меморандумот е предвидена рехабилитација на патиштата по завршувањето на втората фаза, која опфаќа реконструкција на мостовите на патот Демир Капија - Гевгелија во 2009 година, но само ако останат пари од проектот. Се обидовме да го добиеме тоа сега, но не успеавме - изјави Наташа Валкановска, директорка на Фондот за патишта.

Во Фондот тврдат дека неасфалтирањето на патот нема да ја загрози безбедноста на сообраќајот, на која според нив, многу повеќе влијаат недисциплинираните возачи. Валкановска е децидна дека санацијата на мостовите ќе заврши до крајот на октомври годинава, до кога трае одобрението од Министерството за транспорт за изменет режим на сообраќај. Делницата е затворена од 23 октомври лани.

Експертите сметаат дека државата мора да одвои пари за асфалтирање на делницата Скопје - Велес пред таа да се пушти во употреба.

- Гледано од технички аспект тоа ќе биде многу поевтино и побезбедно решение бидејќи делницата е затворена за сообраќај. Точно е дека асфалтирањето не беше предвидено во проектот на НАТО - вели Горан Марковски, професор на Градежниот факултет, кој е вклучен во овој проект.

Според него, има оштетувања и на спротивната делница од Велес кон Скопје, но тие мостови не биле приоритетни за овој проект бидејќи се подоцна градени и нивната носивост е поголема. Целта на донацијата од НАТО е да се зголеми носивоста на мостовите на делницата Скопје - Велес.

- Еден мост на другата делница ќе биде реконструиран в година, а оштетувањата на другите мостови се минорни бидејќи тие се проектирани според нови прописи - тврди Марковски.

Од Фондот соопштуваат дека во моментот се работи на девет моста, а за 20 е извршен технички прием. Реконструкцијата ја врши турската фирма „Џесаш“. Приоритет добија мостовите од Катланово до Велес бидејќи се најоштетени.

Подготвен е повикот и за втората фаза, во која ќе се санираат 21 мост на патот Демир Капија - Гевгелија.

- На тој дел нема да се затвора сообраќајот бидејќи нема алтернативен пат - велат во Фондот.

Два милиона евра помалку од патарина

Државниот буџет е покус за над два милиона евра за периодот јануари-август годинава поради неработењето на двете патарини кај Сопот и Отовица, кои се затворени поради реконструкцијата на мостовите. Во минатата година, до крајот на август од овие две наплатни станици беа собрани повеќе од два милиона евра.

Од Фондот за патишта соопштуваат дека вкупната наплата на патарина е подобрена за над 15 проценти поради зголемената фреквенција на возила и дисциплината кај вработените на наплатните рампи. Во минатата година до крајот на август, без двете патарини, биле собрани 5,9 милиони евра, а за истиот период годинава 6,8 милиони евра. Низ земјава, за овој период и лани и годинава поминале над 8,1 милиони возила.

Александра Филиповска