Булевар Словенија

Булеварот „Словенија“ не го растовари сообраќајот по „Цветан Димов“

Булеварот „Словенија“

И по еден месец од предавањето во употреба на булеварот „Словенија“ не се чувствува растоварување на сообраќајот по улицата „Цветан Димов“, туку секојдневно во утринските и попладневните часови сообраќајниот метеж остана непроменет. Од семафорите на почетокот на оваа сообраќајница се' до семафорот на крстосницата со „Џон Кенеди“ се создаваат редици од возила. Граѓаните кои секојдневно поминуваат по оваа улица сметаат дека булеварот „Словенија“ не го донесе очекуваното сообраќајно растоварување на „Цветан Димов“. Од Секторот на сообраќај во Градот тврдат дека не е така, бидејќи секаде во светот во утринските и попладневните шпицеви е метеж. Ниедна патна мрежа во тие интервали на денот не може да ги задоволи сообраќајните потреби. Напротив, велат од Градот, по булеварот „Словенија“ сега има поголем обем на сообраќај. Иако не е направено конкретно снимање, тоа јасно го покажува фреквенцијата на возила на крстосницата кај Момин Поток, помеѓу улиците „Скупи“ и „8 Септември“. Таму има огромен обем на сообраќај, што го навлече токму булеварот „Словенија“. Само автоматски бројачи на возила можат точно да покажат колкав проток на возила има по новиот булевар, објаснуваат од Градот.

„Бидејќи има потреба, во фаза сме на распишување тендер за набавка на еден автоматски бројач на возила. Истовремено, тој е и радар, а ја регистрира и категоријата на возила. Но, на ’Цветан Димов‘ се случува нешто друго. Минатата недела имавме поплаки од граѓани токму за оваа улица. Проблем е односот на возачите, кои непрописно се паркираат и излегуваат со голема брзина од споредните улички, иако сообраќајницата има по две ленти во двете насоки“, објасни Јован Христовски, раководител на Секторот за сообраќај во Градот. (Сн.К.)