Градска инфраструктура (општо)

ЈАВНИТЕ ПРЕТПРИЈАТИЈА СЕ ВРАЌААТ ВО ЖИВОТ

„Водовод“со ќар од милион евра

За разлика од 2006 година, кога речиси сите јавни претпријатија беа во загуба, во 2007 четири претпријатија остварија добивка

По повеќегодишни загуби и нерентабилно работење, дел од градските јавни претпријатија лани остварија позитивни финансиски резултати. Минатата година четири од шесте претпријатија ја завршија со добивка, додека на листата со загубари се само Јавното сообраќајно претпријатие „Скопје“ со минус од 1,4 милион евра и „Улици и патишта“ со загуба од околу 260 илјади евра.

Претпријатијата „Градски паркинг“, „Комунална хигиена“ и „Паркови и зеленило“ година може да се пофалат со минимална добивка за 2007, но затоа „Водовод и канализација“, кој во 2006 година беше во длабока була, за лани бележи бруто-приход од околу 76 милиони денари, односно 1,2 милион евра. Вкупните приходи во 2007 година се резултат главно на покачувањето на цената на водата. Расходите се за 31 отсто повисоки во однос на 2006 година, како резултат на извршените вредносни усогласувања на тужените предмети - се вели во завршната сметка на „Водовод“.Во извештајот се појаснува дека во 2006 година загубата на претпријатието изнесувала 173 милиони денари или околу 2,8 милиона евра. Тогаш директор на „Водовод“ беше сегашниот министер за транспорт и врски, Миле Јанакиески. Најмала добивка има „Градски паркинг“, кој за разлика од другите, претставува профитабилно претпријатие. Иако лани цените за паркирање беа зголемени, објаснувањето за малата добивка се инвестициите во опремувањето на паркиралишта, набавката на три нови пајак-возила и вработувањето на 40 лица.

„Паркови и зеленило“ лани остварило добивка од 77 илјади евра, а „Комунална хигиена“ е во плус од 262 илјади евра.Загубата на ЈСП во 2007 година е намалена во однос на 2006 година и тоа за 9,8 отсто. Минусот од 1,4 милион евра ќе биде покриен со субвенции од градскиот буџет. Од Градот цела година апелираат до државните власти и тие да се вклучат во субвенционирањето на јавниот градски превоз, со цел претпријатието да работи рентабилно, но и да се овозможи намалување на цената на билетите. Лани ЈСП оствари негативен финансиски резултат поради неекономската цена на превозот, дополнителната загуба во летниот период и поради намалување на бројот на патници за 47, 5 отсто - се вели во извештајот на ЈСП.Загубите во „Улици и патишта“ се поради постојаниот пораст на цените на битуменот, нафтата, горивото, неповолната состојба на механизацијата и слабата конкуретност при учеството на јавни конкурси.Инаку, 2006 година сите јавни претпријатија, освен „Паркови и зеленило“, ја завршија со загуби, а вкупниот збир на минусот изнесуваше шест милиони евра.

Јорданка Ивановска

Dnevnik

Градот годинава ќе инвестира 6,2 милиона евра во сообраќајници

Ќе се изготвуваат и проекти за санација на 12 моста на Вардар, од кои два се пешачки

Сања Наумовска

Изградба на раскрсница-детелина, без семафори на Бит-пазар, проширување на клучката кај Тутунски комбинат, проширување на булеварите „Гоце Делчев“ и „Илинденска“, се само дел од проектите што ги најави Градот Скопје за реализација во текот на годинава. Градските власти планираат капитални инвестиции во патната инфраструктура, булевари и мостови, но и завршување на реконструкцијата на Зоолошката градина, коритото на Вардар, унифицирање на пешачки надвозници и средување на фасади.

Заедно со веќе почнатите објекти, клучката кај „Континентал“, проширувањето на булеварите „Србија“ и „Македонска војска“, годинава за олеснување на сообраќајот Градот ќе потроши околу 6,2 милиона евра. Парите веќе се предвидени во градската каса, а моментно течат тендерите за избор на изведувачи. Клучката кај „Континентал“ треба да биде готова во јуни, а нејзиното функционирање е поврзано со проширувањето кај Тутунскиот комбинат заради обезбедување нормален проток на сообраќајот. Во функција на клучката ќе се прошири и булеварот „Гоце Делчев“, на потегот од Скопски саем до Универзитетот, односно до зградата на Македонската телевизија. Годинава треба да заврши и проширувањето на „Илинденска“ на потегот од фонтаната „Лотос“ до булеварот „8 Септември“.

Пари од градската каса годинава ќе се потрошат и на уредување средишно зеленило на седум булевари низ градот. На „Александар Македонски“ ќе има жардиниери во должина од 2 километра, на „Партизанска“ - 2,6 километри, а на „Кузман Јосифовски Питу“ - 750 метри. На булеварот „Гоце Делчев“ и на „Октомвриска револуција“ ќе има 1,2 километра ново зеленило, на „Крсте Мисирков“ - 1,6 километри, а на „Кочо Рацин“ - 720 метри. Во Зоолошката градина ќе се заврши изведбата на водоводот, живеалиштата на тигарот и мајмуните, а до крајот на годинава ќе има и кафетерија, играчница за деца и многу други содржини.

„Во 2009 година е планирана втората фаза од проширувањето на булеварот ’Србија‘, од ’Првомајска‘ до ’Јане Сандански‘, третата фаза од ’Илинденска‘ од ’8 Септември‘ со мост преку Вардар, проширување на ’Теодосиј Гологанов‘ од студентскиот дом ’Гоце Делчев‘ кон Центар и проширување на ’Првомајска‘ кон Драчево“, вели Алјоша Шопар, раководител на Секторот за урбанизам.

Тој најави и изготвување проекти за санација на 12 моста на Вардар, од кои два се пешачки. Градот во целост ќе го реализира и проектот за уредување на коритото на Вардар, што го изработија студенти на Архитектонскиот факултет, а ќе се изградат и шест идентични, типизирани натпатници во општините Ѓорче Петров, Карпош, Гази Баба и Чаир. Планирана е и санација на фасадите на Детскиот културен центар „Карпош“ и салонот „19,19“ во КИЦ.