Градот Скопје добива нова туристичка атракција. Идејата за изградба на жичара, која постои уште од осумдесетите години, веќе е реализирана и овој проект станува видлива реалност.

За тоа како се одвива реализацијата за изградба на скопската жичара и до каде е целиот проект, говори министерот за транспорт и врски, Миле Јанакиески.

- Веќе е во финална фаза изградбата на делот од средно Водно до Милениумскиот крст, а следната фаза ќе биде од црквата Св. Јован до средно Водно преку Институтот за белодробни заболувања. Сегашната фаза очекувам да се заврши најдоцна до април, до крајот на оваа година треба да пристигне машинскиот дел, а потоа некаде околу јануари, февруари треба да стигнат и преостанатите делови. Сепак во зависност и од временските услови, очекувам жичарата во април да биде функционална, истакна Јанакиески.

Прашан за теренските проблеми при изградбата, министерот истакна дека иако станува збор за стрмен терен, сите проблеми биле брзо решени.

- Компанијата „Допелмаер“ е светски позната компанија за изградба на жичарници и ги надмина сите проблеми. Најтешкиот дел е завршен, останува само монтажата на машинскиот дел и кабините кои ќе служат за превоз на патниците, посочи министерот за транспорт и врски.

Јанакиески нагласи дека значително ќе се скрати времето кое на посетителите им е потребно за да се искачат до крстот.

- Земајќи во предвид дека целата траса е некаде околу 12 минути, од средно Водно до Милениумскиот крст ќе се стигнува за околу 5,6 минути што е многу кратко време ако се земе во предвид дека сега пеш до врвот на Водно се стигнува за околу еден час, објасни ресорниот министер.

Тој ги потенцираше придобивките од проектот, додавајќи дека по неговата целосна реализација комплексот околу Милениумскиот крст ќе заживее.

- Пред се ќе им се овозможи на постарите лица да можат полесно да го видат врвот на Водно, очекуваме голем број на туристи да го посетат ова место каде што ќе ја користат жичарата да го погледнат Водно. Разговараме со фондацијата Милениумски крст, каде во соработка со Градот Скопје и општината Центар целосно ќе се направи ново партерно уредување околу крстот, а во функција ќе биде ставен и ресторан. Со тоа целокупниот комплекс ќе заживее, нагласи Јанакиески.

Гледано од градежен аспект, за тоа кои се придобивките од изградбата на жичарата, ни објасни претседателот на Градежната комора, Сеад Кочан.

- Изградбата на жичарата е проект кој директно ги враќа инвестираните пари. Се исплаќа неговата изградба затоа што се врзува со угостителството, туризмот...и воедно отвора сфери за инвестирање и работа. Постојат можности да има работа за градежништвото во изградба на инфраструктурите за сервисирање и одржување на уредите, посочи Кочан.

Претседателот на Туристичко-угостителската комора, Феркан Бербери истакна дека со добро осмислена стратегија, изградбата на жичарата ќе го поттикне развојот на туризмот.

- Проектот ќе има голема придобивка, како за граѓаните така и за останатите посетители на Скопје. Сметаме дека жичарата ќе биде поттикнувач на економскиот и на туристичкиот развој. Се надеваме дека со добро осмислена содржина жичарницата ќе го задржи својот интерес, нагласи Бербери.

Тој посочи дека е од голема важност да се одржи постојниот интерес и континуитет на развој како туристичка атракција додавајќи дека ќе излезат со идеи и предлози на промоција и поддршка на жичарата.

Министерот за транспорт и врски истакна дека по пуштањето на жичарата ќе биде воведен посебен сообраќаен режим.

- Дискутираме со Јавното сообраќајно претпријатие и со Градот Скопје да се воведе посебен режим на сообраќај, исто така да се воведат дополнителни автобуси кои ќе се користат како организиран превоз за граѓаните. До месец април ќе имаме стратегија како да се реши сообраќајот, бидејќи особено во првите месеци интересот очекуваме да биде голем, додаде Јанакиески.