Се надвишуваат столбовите од жичницата на Водно

По целата траса ќе има 30 кабини со вкупен капацитет од 1.200 патници на час

Интензивирани се градежните зафати за изградба на жичарницата на Водно. Моментално се работи на темелите за столбовите. Од Министерството за транспорт и врски велат дека во Скопје веќе е транспортирана дел од опремата која треба да биде поставена на жичарницата. Столбовите веќе се пристигнати и веднаш по завршувањето на подготвителните работи ќе почне нивното монтирање. Паралелно со тоа ќе тече и транспортирањето на преносните кабини.

Според проектот, жичарницата до Милениумскиот крст на Водно ќе има 30 кабини. Во секоја од нив ќе можат да се превезуваат по осуммина патници, а вкупниот капацитет на жичарницата ќе биде 1.200 патници на час. Носител на проектот за жичарницата е Министерството за транспорт и врски, а инвестицијата ќе изнесува 6,7 милиони евра. Работите ги изведува австриската компанија „Допелмаер“, која Министерството ја избра на тендер.

Изградбата ќе тече фазно, делница по делница, а најпрвин ќе се реализира делот од Средно Водно до Милениумскиот крст, делница долга околу 2.000 метри. Потоа ќе следува втората фаза, од Средно Водно до црквата „Свети Јован“ во Капиштец.

За почеток на изградбата на жичарницата на 500 метри над рампата на Средно Водно, во близина на некогашното одморалиште на Црвениот крст, беа исечени јасени, јавори и сливи, а веднаш потоа беа исечени и бројни повеќегодишни нискостеблести грмушкести растенија. За целата траса на жичарницата од Средно Водно до Милениумскиот крст се исечени два хектара шума. (Сн.К.)

За Нова година на Милениумскиот крст со жичница

Од Средно Водно до Милениумскиот крст ќе одат 28 кабини во бело–портокалова боја со капацитет од осум патници и брзина од шест метри во секунда, како и две ВИП-кабини со црна боја за четири патници

Роза Петкова

Со 40 камиони ќе се носи опремата потребна за изградба на првата траса од жичницата од Средно Водно до Милениумскиот крст. Во Министерството за транспорт и за врски, кои се носители на проектот, велат дека дел од опремата веќе пристигнала, а останатата ќе се комплетира во наредниот месец. Оттаму не очекуваат изградбата на првата траса да се одложи и да доцни, туку уверуваат дека работите ќе се завршат навреме. Досега се градежните работи за темелите на столбовите на жичницата. - Градежните делови од темелите за сите столбови се спремни, ископани се дупките за поставување на челичната конструкција на линиските столбови и во моментов се чека испораката на опремата. Претходната недела седум од вкупно предвидените 40 камиони, со целокупната опрема потребна за изградба на жичницата од Средно Водно до Милениумскиот крст, се веќе доставени на локацијата. Сукцесивно, овој месец и првата половина на септември ќе пристигне целокупната опрема по што следи нејзина монтажа. Во согласност со динамиката нема да има никакви одложувања, односно жичницата ќе биде завршена до крајот на годинава - велат одговорните во Министерството. Потоа ќе следи електромашинската фаза на работите кога линиските столбови ќе се поставуваат со хеликоптер, а кабините со дигалки. Предвидено е првата секција да има десет столбови. Во Министерството велат дека дизајнот на сите кабини ќе биде ист, односно ќе имаат бела боја со портокалова линија, македонско знаме и натпис „милениумски крст“, како кабината која беше промовирана на поставувањето камен-темелник. Предвидено е две кабини да бидат за познати лица. Поголема раздвиженост на Водно и колона од камиони што одат во правец од Средно Водно кон крстот деновиве забележале и скопјани, кои се качувале на планината. Веќе извесно време на планината е видлива и патеката по која ќе минува жичницата, што беше направена со сечење на неколку хектари шума. Трасата е кружна и има три секции, а нивната вкупна должина е околу 3.500 метри. Тоа ќе биде еднојажна кабинска жичница, која што во една гондола ќе има капацитет да превезе осум патници, а за еден час ќе качува по 1.200 патници. Неа ја гради австриската фирма „Допелмаер“, која што го доби тендерот за 6,7 милиони евра.