Петнаесет компании доставија понуди на тендерот за изведување градежни работи за изградба автопатска делница Демир Капија – Смоквица, дел од Коридорот 10, соопшти Министерството за финансии.

Понуди до крајниот рок, кој истече денеска напладне, доставија грчките компании „Joint Venture JIP AVAX - Athena“ и „Actor“, шпанските „Acciona-PST“ и „Joint Venture OHL-Trace-OHL ZS -INVALL”, италијанските „Imresa Pizzaroti I.C.G.P.A“ и „Toto S.P.A. Construzioni Generali “, „Condotte - Kolin“, „Todini Construzioni Generali SPA“, австриските „Strabac A.G“- , „Joint Venture Porr-Terna“, „„Alpine BAU GMBH“, турските „MAPA Insaat ve ticaret A.S“ и „Cengiz - TAV - MAKSOL“, како и „Hochtief Solutions AG“ од Германија и „CWE-CRI“  од Кина.

По завршувањето на оценувањето на понудите, ќе се потпише договор за градежни работи, што се очекува да се случи во првиот квартал на 2012 година, а изградбата ќе трае 4 години.

Постапката за избор на изведувач на градежните работи за изградба на делницата Демир Капија – Смоквица на Коридорот 10 почна на 31 август годинава.

Според пропишаните критериуми на огласот, објавен од Европската комисија на 31 август годинава, понудувачите мора да обезбедат гаранција од три милиони евра, а нивниот вкупен просечен годишен обрт за градежни работи во текот на последните  три години да изнесува најмалку 150 милиони евра. Треба да исполнат и критериуми кои се однесуваат на искуството во реализацијата на слични проекти, односно да имаат завршено изградба на најмалку еден автопат со вредност на договорот од 250 милиони евра, или пак да имаат активен договор за проект во истата вредност, чиј степен на реализација е најмалку 60 проценти. Исто така, треба да имаат искуство во изградба на тунели и мостови и да ги поседуваат сите соодветни професионални дозволи.

За реализација на проектот се обезбедени 45 милиони евра од претпристапните фондови на Европската унија (ИПА), 130 милиони евра од Европската инвестициска банка, 90 милиони евра од Европската банка за обнова и развој,  како и шест милиони евра од македонската Агенција за државни патишта.

Новата автопатска делница Демир Капија – Смоквица, како дел од Пан-европскиот Коридор 10 треба да се реализира како целосно автопатско решение. Предвидено е овој автопат да содржи 2+2 коловозни ленти со широчина од 3,50 метри за секој правец, физички одвоени со средна лента од  три метри, со предвидена дозволена брзина од 110 километри на час постојано по целата лента. На трасата е предвиденo да има шест двоколовозни моста, два  тунела, две клучки, едната кај населеното место Миравци, а другата кај Смоквица, пет натпатници, вклучувајки ги и тие на клучките, седум потпатника и секундарна патна мрежа од 15 километри, локални и пристапни патишта.

http://www.plusinfo.mk/vest/25492/15-ponudi-na-tenderot-za-avtopatot-Demir-Kapija---Smokvica