Министерство за надворешни работи

МНР ќе се смести на Кеј

Ако с’ биде во ред со изборот на најповолен изведувач, се очекува градежните работи да почнат до крајот на годинава

До крајот на годинава се очекува почетокот на градежните работи за нова зграда на Министерството за надворешни работи, на слободниот простор до Македонската опера и балет, информираа надлежните од Службата за општи и заеднички работи при Владата. Како што е наведено во објавата на меѓународниот тендер, распишан во март годинава, предвидено е зградата да биде со висина од 29 метри, односно седум ката со потпокрив. Површината за градба е 1.436 квадратни метри, а во објектот е предвидено да бидат сместени од 400 до 500 вработени. Планирана површина на работниот простор е од 11.000 до 13.000 квадратни метри.

Дека градежните активности ќе почнат набрзо говори и фактот што на завчерашната седница на Советот на Град Скопје, на барање на оваа служба на Владата беше усвоен Заклучок за ослободување од комунални давачки со образложение дека се работи за објект од јавен интерес.

- Градот Скопје оценува дека изградбата на објектот во целина треба да биде на товар на инвеститорот, со сите трошоци што произлегуваат од тоа. Инвеститорот ќе биде обврзан на сопствен трошок да го изврши уредувањето на градежното земјиште и изградбата на потребната инфраструктура - се вели во заклучокот.

Во тек е втората фаза од меѓународниот тендер, во која од седум пријавени економски оператори ќе се избере еден изведувач, кој ќе понуди најповолна цена за изградбата, информираше директорот на Службата за општи и заеднички работи Васил Доневски. Тој не можеше да ја каже вкупната цена на чинење на објектот, бидејќи средствата ќе бидат поделени и ќе се издвојуваат во 2010 и во 2011 година од државниот буџет.

- Почеток на градежните работи се планира за годинава, но само доколку се' се одвива според планираниот тек и се избере најповолниот изведувач - изјави Доневски.

Портпаролот на МНР, Петар Чулев, изјави дека сегашниот простор на МНР во зградата до Собранието е тесен за сите вработени, па поради тоа со години се принудени да користат и кат од Заводот за статистика. Со изградбата на новата зграда, освен просторниот капацитет ќе биде решен и проблемот со паркирањето.

не би требало. ристиќеива е заштитена со закон. освен ако се најде некој лудак и дозволи. ќе треба после да го убијам.

друга работа..има скопје доста место за ширење