Хотели, преноќишта и одморалишта (општо)

Финско село во Преспа

Брисел - Приватни компании од Финска почнале процедура за изградба на финско село во Дупени, на Преспанско Езеро, кое покрај објекти за сместување, ќе има и сауни и трговски центар.

Моментно компаниите чекаат документи за инфраструктурата, а изградбата ќе почне по три-пет години на земјиште кое е во сопственост на државата. Целта е пензионери од оваа земја да престојуваат шест месеци во Македонија, бидејќи климатските услови се многу поповолни од оние во Финска. (С.Ј.)

МАЛЕШЕВИЈАТА САКА ДА СТАНЕ СОВРЕМЕН ТУРИСТИЧКИ ЦЕНТАР

Се градат повеќе хотели, работи само еден

Хотелот „Македонија“ во центарот на Берово, кој повеќе години не работеше, го купи „К-15 продукција“ од Скопје, но најавеното реновирање се' уште не почнало

Природата не штедела кога на Малеш му дарувала убавини, но ние не знаеме да ги користиме, па и понатаму сме сиромашен крај од кој луѓето се иселуваат. Вака најчесто коментираат беровци кога станува збор за туризмот. Во последните години се направија напори за афирмација на убавините на Малешевијата, дојдоа и туристи, но само на еднодневни прошетки или најмногу на викенд-тури. Желбите и плановите овој привлечен планински регион да стане современ туристички центар се реализираат многу тешко и бавно. Во Берово во моментот работи само хотелот „Манастир“ со 50 легла, кој се наоѓа на излезот од градот кон Беровското Езеро. Честа на беровскиот туризам колку-толку ја спасуваат уште два-три мали комерцијални сместувачки капацитети и многуте вили и викендички што им стојат на располагање на туристите. Другите хотели или се затворени или се' уште се градат.

„МАЛЕШЕВО“ ЧЕКА ГАЗДА

Туристичкиот комплекс „Малешево“, сместен во најубавиот дел на Малеш, на брегот од Беровското Езеро, не работи и во него годинава првпат немаше организиран пречек на Новата година. По неколкуте неуспешни обиди за приватизација, тој и понатаму е во државна сопственост. Го чуваат за да не биде разграбан од поранешни вработени, кои се надеваат дека наскоро објектот ќе добие газда, а тие работа. На 200 метри оттаму се гради нов хотел на скопската туристичка агенција „Аурора“. Тој ќе биде од висока категорија, работите се во завршна фаза, но не се знае кога ќе биде отворен. Се' уште не е готов и хотелот во близина на граничниот премин Клепало. Хотелот „Македонија“ во центарот на Берово, пак, кој повеќе години не работеше, пред седум-осум месеци го купила „К-15 продукција“ од Скопје, но најавеното реновирање се' уште не почнало.

- Во рамките на нашите можности, максимално сме ангажирани на промоцијата на туризмот и на убавината на Малешевијата во земјата и во странство. Организираме повеќе манифестации, деновиве издадовме современ туристички водич во кој се влезени сите категоризирани сместувачки капацитети и другата туристичка понуда на Берово, а во фаза на формирање е и туристичко здружение. Очекуваме во текот на годинава да биде отворен луксузниот хотел на ТА „Аурора“, да се најде решение за „Малешево“ и да почне реконструкцијата на хотелот „Македонија“. И понатаму проблем ни е што се' уште не е отворен граничниот премин Клепало. Од наша страна одамна е се' завршено, но бугарската со години не го завршува патот до преминот - вели Јасминка Пашалиска-Андоновска, раководителка на беровската канцеларија за локален економски развој.

ХОЛАНЃАНИТЕ - НАЈЧЕСТИ ГОСТИ

Во „Манастир“, единствениот хотел што работи во Берово и кој на гостите им нуди разновидна понуда, се задоволни од посетеноста, но нагласуваат дека за да стане Малеш современ туристички центар според европски терк, треба уште многу да се работи.

- Ги имаме сите услови. Прекрасна природа, чиста животна средина, еколошки здрава храна... Неопходна е помош од државата и комплетна посветеност на локалната самоуправа на туризмот, бидејќи спасот за Малеш се само туризмот и сточарството. Нема турист што еднаш дошол, а да не посакал да се врати. Така е и со Холанѓаните, кои ни се најчести гости од странство. Од ова лето очекуваме и редовни туристички тури од Австралија. Но, за жал, туристите во Берово остануваат само на два-три дена. Потоа им станува здодевно. Нема забава. Тоа градот мора да го реши. Треба да се размислува и за изградба на скијачки патеки - истакнува Владо Мишовски, менаџер на хотелот „Манастир“.

Со слични проблеми се судира и соседната, помалата малешевска општина Пехчево. Во прекрасниот туристички реон Рамна Река, кој граничи со Беровското Езеро, туристичката понуда ја сочинуваат само еден мал мотел, два угостителски објекта и викендичките. Општината со странска помош неодамна ја уреди околината и ги направи достапни седумте водопади кај изворите на Брегалница. За друго нема пари.

Во малешевскиот туризам засега најмногу инвестираат иселените Малешевци, кај кои носталгијата е секогаш голема, а многумина и кога-тогаш сакаат да се вратат во родниот крај. Хотелот „Манастир“ е сопственост на Малешевец од Скопје, хотелот кај Клепало на Малешевец од Тетово, а „скопски беровец“ е сопственик и на скопската туристичка агенција „Аурора“, која го гради хотелот на Беровското Езеро. И многу вили, викендички угостителски објекти градат Малешевци иселени во Скопје, Штип, Струмица ...

Хилтон заминува на Косово, Владата неинформирана!