Археолозите ќе копаат на локалитети во Тетовско

Продолжуваат археолошките истражувања на локалитетите Градиште кај Стенче, Ќелија над Теарце и Тумба кај Брвеница

Гојко Ефтоски


ТЕТОВО - Оваа година археолозите ќе копаат во Тетовско во потрага по недооткриени објекти и артефакти што ќе помогнат во препознавањето на минатото. Со финансиска поддршка на Министерството за култура ќе продолжат истражувањата на локалитетите Градиште кај Стенче, Ќелија над Теарце и Тумба кај Брвеница.

Среќко Јовановски, директор на Музејот за тетовскиот крај, вели дека Градиште е истражувано четири пати. „Откриени се базилика и крстилници. На десниот брег на Вардар под селото Стенче се кријат и други вредности“, вели Јовановски. Дека станува збор за локалитет што постоел пред неколку илјади години, потврдуваат пронајдените предмети.

Почетни ископувања има и во месноста Ќелија над селото Теарце. Таму постои црква посветена на Богородица, а секоја година, на патрониот празник, се одржуваат црковно-народни собири. Јовановски најавува дека Тетовскиот музеј со екипа на Институтот за археологија, предводена од д-р Виктор Вилчиќ, ќе продолжи да истражува. Овој локалитет бил верско училиште каде што посетителите препишувале книги. Жители на Теарце тврдат дека на просторот до црквата „Св. Ѓорѓија“ биле пронаоѓани чудни предмети, а и сега можел да се најде камен во вид на крст. Што ќе биде откриено на Ќелија, допрва ќе се види.

Голем предизвик за истражувачите е и Тумба во близина на селото Брвеница. Оваа месност се наоѓа на левиот брег на Вардар, на сливот на реката Темишница. Директорот на Музејот на тетовскиот крај вели дека внимателно ќе се истражува, бидејќи и површински биле пронаоѓани, пред се', керамички предмети.

Ќе се работи и на Калето каде што се пронајдени објекти од османлискиот период. Потоа на комплексот Арабати-баба Теќе, каде што се планира доизградба на оградниот ѕид во автентичен изглед. Преку Националниот конзерваторски центар се очекуваат зафати и на неколку постари верски и други објекти, како што се црквите „Св. Архангел Михаил“ во Непроштено, „Св. Никола“ во Челопек, „Св. Петка“ во Сириќино, Старата џамија во Теарце. Нема да бидат запоставени ниту археолошките локалитети Црница и Два Бреста кај Лешок. Во план е да се реализира и проектот за конзервација на куќата на улицата „К. Ј. Питу“ бр. 130 во Тетово.

ОТКРИЕН ВОЕН ЛОГОР ОД 13 ВЕК КАЈ БИТОЛСКИ БАИР

Киклопските ѕидини над Св. Еразмо нова туристичка атракција

Археолошкиот локалитет Киклопски ѕидини – Енгелана, кој се наоѓа веднаш над црквата Св. Еразмо на влезот во Охрид, открива значајни научни сознанија за периодот на владеење на македонските кралеви и има потенцијал да прерасне во нова туристичка дестинација. Пренесува Охридњуз.

„Таму е најдено значајно археолошко богатство и податоци за времето на Филип Втори и подоцнежните македонски кралеви, од периодот на третиот и вториот век пред нашата ера. Се работи за еден археолошки монумент што ако целосно го истражиме, конзервираме, реставрираме и презентираме, ќе имаме една прекрасна туристичка дестинација и многу научни резултати“ - вели Паско Кузман директор на Управата за заштита на културното наследство.

5 000 години е стара фигурината ископана во Кочанско

Откриена праисториска населба на локалитетот „Голема трпеза“

Сузана Тасева	Коментари (2)

Праисториска населба е откриена на локалитетот Голема трпеза кај Ново Коњарево, село во Струмица оддалечена околу 200 метри од македонско-бугарската граница.

Според археолозите станува збор за култура стара околу 7 илјади години.

Пронајдените елементи сведочат за животот во доцниот Неолит, по течението на реката Струмица.

„Меѓу другото пронајдовме и неколку садови, потоа женски фигуринки, нешто од алатките, ношчиња пред се, кремени, глачени сеќирки и некој други работи кој што се специфични за доцниот Неолит во долината на реката Струмица“, рече Зоран Рујак, археолог.

За прв пат струмичките археолози работат на овој локалитет иако од порано имале сознанија за неговото значење. Големата трпеза е втор локалитет што се истражува од праисториската епоха, прв таков бил истражуван во 1985-та година во селото Ангелци.

Откриената култура на овие две места во Македонија е карактеристична и за околината на градовите Петрич, Сандански и Благоевград во Република Бугарија. Покрај ресорното министерство овој проект го подржаа и локалните власти на општините Струмица, Василево и Ново Село.

Лозјата лежат врз античка населба

Лозјата во кавадаречката месност Белград лежат врз античка населба. Се чека да почне копањето на лозовите насади, кои се стари над 50 години, за да почнат активности за испитување на теренот, информира Музејот на Кавадарци.

Пред десетина години бил истражен мал дел од античките гробови на овој археолошки локалитет, кога се вршеле длабински орања заради подигање млади лозја во овој дел од Тиквешијата. Биле пронајдени повеќе од 30 антички плочи на кои биле испишани и македонски имиња.

Директорот на Музејот, Петре Камчевски, вели дека трактористите, надевајќи се дека ќе најдат злато, напречно ги орале површините и гробовите.

Според Камчевски, се претпоставува дека под лозјата се крие античка населба со голема површина од 1 век пред новата ера, а добар дел од археолошкиот материјал пронајден на овој дел во минатото е однесен во музеи во странство.

Уште во 1916 година тогашниот директор на археолошкиот музеј во Софија, Богдан Филов, доаѓал во Кавадарци и, како што и самиот запишал, богат археолошки материјал изнел од овде.

Месноста Белград е една од најпознатите лозарско-винарски региони во земјава каде што се произведува најквалитетното трпезно грозје. Во овој дел е пронајдено огромно корито, тешко околу 20 тони, изделкано во камен, кое во минатото се користело за газење на набраното грозје. Пронајдената винска чаша во еден од античките гробови ги потврдува литературните записи дека античките македонски војници имале желба во гробот, заедно со нив, да биде ставена и нивната омилена чаша за вино.