Булевар Словенија

Новиот булевар ќе овозможи големо сообраќајно растоварување за околу 150 илјади жители од општините Бутел, Чаир и Шуто Оризари, но ќе биде и пократка врска со Карпош и Гази Баба

Изградбата на новата сообраќајница чини 190 милиони денари

СНЕЖАНА КАЛАБАКОВА

Со поставување на последниот слој асфалт деновиве привршуваат градежните зафати на булеварот „Словенија“. Во тек се подготовките за светлечката сигнализација, мостот и повеќе од половината од средишното булеварско зеленило се завршени. Според сообраќајните експерти, во последниве пет години оваа сообраќајница е една од најважните што биле изградени во главниот град, бидејќи се прогнозира дека ќе овозможи 30 до 40-процентно сообраќајно растоварување. За Скопје таа ќе претставува уште една обиколница и мал прстен заедно со булеварите „Босна и Херцеговина“, „Хрватска“, „Војводина“ и „Србија“. Булеварот „Словенија“ ќе овозможи сообраќајно растоварување и на таканаречената Јадранска магистрала на патот кон Косово. Булеварот ќе претставува излез и влез и за потешките товарни возила, кои нема да влегуваат преку централното градско подрачје. Ќе овозможи големо сообраќајно растоварување за околу 150 илјади жители од општините Бутел, Чаир и Шуто Оризари, но ќе биде и пократка врска со Карпош и Гази Баба. Ќе ја растовари од возила и улицата „Цветан Димов“ во Чаир, која се' уште претставува единствениот вентил и тесно грло за излез и влез на трите општини кон и од Бит-пазар и централното градско подрачје, поради што се користи обиколниот пат преку Топаана, а се очекува да биде „олеснета“ и најфреквентната крстосница кај Судската палата. Изградбата на булеварот „Словенија“ чини 190 милиони денари.

„Идејата е во догледно време булеварот ’Словенија‘ да продолжи до спојот со ’Илинденска‘, но за тоа треба да се доизградат уште две третини. Во првата фаза, откако ќе профункционира сообраќајот на овој булевар проценивме дека ќе имаме проблеми кај семафорите на спојот на оваа сообраќајница со т.н. Јадранска магистрала. Ќе биде доста оптоварен овој регионален пат, па затоа сметавме дека ќе биде потребно да се изгради надвозник на две нивоа. За тоа веќе се работи на идејното решение. Ќе обезбедиме средства од буџетот за 2008 година, а очекуваме и финансиска помош од централната власт“, вели Јован Христовски, раководител на Секторот за сообраќај во Градот.

Надлежните од општината Чаир и Бутел велат дека булеварот „Словенија“ ќе претставува големо сообраќајно растоварување од тешките товарни возила кои поминуваат по улиците „Втора македонска бригада“, „Македонско-косовска бригада“ и по булеварот „Босна и Херцеговина“. За Општина Бутел оваа сообраќајница ќе значи и подобра комуникација со Визбегово, каде што се развива индустриската зона. Сообраќајницата е од големо економско, но и културно значење, бидејќи со дозиградба на еден крак ќе се овозможи и сообраќајна врска со Римскиот аквадукт, голем споменик на културата.