Со изградба на пруга по Коридорот 8 финалната цена на домашните производи ќе биде поконкурентна отколку што е во моментов

Никако да се изгради пруга по должината на Коридорот 8

Железничкото поврзување по Коридорот 8 е стратегиски неопходно за развој на економијата

Македонските стопанственици се принудени да плаќаат повисоки цени за транспорт на суровини од Бугарија и од Албанија бидејќи земјава сѐ уште нема железничка врска со овие две земји. Иако изградбата на железничката пруга по должината на Коридорот 8 била планирана уште за време на Отоманската Империја, реализацијата на овој инфраструктурен проект со години се одложува, главно поради недостиг од политичка волја и од финансии.

Според последните информации на „МЖ инфраструктура“, железничката пруга по Коридорот 8 ќе биде завршена во 2022 година, ако секоја година Владата дава приоритет на овие инвестициски активности.

Стопанството бара алтернатива

На неопходноста од железничка поврзаност со соседните Албанија и Бугарија укажуваат големите македонски извозници.

- Ние со години увезуваме руда од Албанија, но тоа се врши исклучиво со камионски транспорт, притоа поминувајќи низ четири планински превои (Плетвар, Ѓавато, Буково и Ќафасан), што го прави камионскиот превоз и скап и неатрактивен, не само за нас туку и за транспортните компании. Железничка линија би значела побрз, подобар и поевтин транспорт - вели Константинос Даскалакис, главен извршен директор на „Фени индустри“.

Во „Фени индустри“ посочуваат дека засега најатрактивни услуги има солунското пристаниште кон кое и ние имаме најдобра патна инфраструктура. Според него, за да станат атрактивни и другите пристаништа, во нашата околина е потребна подобра инфраструктура.

- Колку е поголем изборот на пристаништа, на видови транспорт (камионски, железнички) тоа значи поголема конкуренција и подобра понуда, што директно влијае на трошоците. Гледано уште постратегиски, развиена инфраструктура и пристап кон повеќе пристаништа е еден од најбитните елементи за привлекување нови инвестиции - истакнува Даскалакис.

Дека железничкото поврзување по Коридорот 8 е стратегиски неопходно за развој на економијата потврдуваат и од „Макстил“.

- Најголемиот дел суровини што ги увезуваме за нашите потреби се од Бугарија. Бидејќи нема директна железничка врска, принудени сме суровините да патуваат низ Србија, поради што имаме дополнителен трошок, кој значајно би се намалил кога би постоела. Со железничко поврзување со Драч во Албанија и со Варна или со Бургас во Бугарија македонското стопанство добива алтернатива на солунското пристаниште. Нема да бидеме заложници на ситуацијата во Грција и штрајковите во пристаништето, на цариниците или други државни институции што го блокираат железничкиот транспорт. Во согласност со нашите анализи, со изградба на Коридорот 8 финалната цена на нашиот производ доставен до купувачите ќе биде поконкурентна отколку што е во моментов. Сигурен сум дека истата бенефиција ќе ја осетат и другите стопанственици што користат железнички транспорт - објаснува Јане Адамчески, одговорен за одделот транспорт во „Макстил“.

Коридорот 8 готов за 10 години?

Надлежните велат дека е планирано пругата по должината на Коридорот 8 да биде завршена за 10 години.

- Активностите се одвиваат според замислената динамика, иако сѐ уште не знаеме како ќе се одрази кратењето на буџетот. Моментално сме пред распишување тендер за избор на најповолен изведувач на работите на западниот дел, од Кичево до границата со Албанија (63 км). Во 2016 година планираме да почне изградбата, но финансиски средства сѐ уште не се обезбедени. Во источниот дел, од Куманово до границата со Бугарија (89 км) е избрана фирма за делот Куманово - Бељаковци (30 км) и овој дел може да почне да се гради во средината на 2013-та и да се заврши за две години. Се бара финансиска конструкција за довршување на проектите Бељаковци - бугарска граница, при што треба да се направи и анализа во каква состојба се почнатите мостови и тунели. Претпоставка е дека овие активности треба да завршат до крајот на 2015 година, за во 2016 година да почне изградбата - велат во „МЖ инфраструктура“.

До Деве Баир за 60 минути

Придобивките од изградбата на железничкиот Коридор 8 ќе бидат поголеми од негативни влијанија стои во студијата за оцена на влијанието врз животната средина за источната делница на железницата од Коридорот 8, со која Македонија инфраструктурно ќе се поврзе со Бугарија.
Работите за изградба на источната делница беа почнати во 1994 година и се одвиваа до 2004 година, кога беа прекинати поради недостиг од средства. Поради стопираните работи потребно е нивно обновување, како и изградба на преостанатата железничка структура. На делницата од Крива Паланка до Деве Баир е потребна изградба на целата рута. Брзината на возовите е проектирана на 100 км/час, а на пократки делници и до 130 км на час.
Новата транспортна врска ќе го намали патувањето од Скопје до Софија за еден час, а наместо 50 минути за релацијата Куманово - Крива Паланка ќе се минува за 35 минути, додека превозот од Скопје до Деве Баир ќе биде 60 минути. Овој проект ќе овозможи и кратење на железничката врска Македонија - Црно Море за 200 км, а до Истанбул за 150 км. Воедно, ќе се добие и капацитетот за минување до 10 товарни воза во секоја насока, што е еднакво на 400 камиони.