Во прилепската фабрика „Микросам“ за кратко време ќе започнат да се произведуваат делови за нов руски, комерцијален авион, кој што би требало да биде изработен до 2014 година...

Досегашниот менаџмент на фабриката објави дека руска фирма ќе ја купи производната технологија на „Микросам“ и со неа ќе ги произведе крилјата на новиот авион. Компанијата исто така е и во преговори да извезува ваква технологија и за други авиокомпании, меѓу кои „Боинг“ и „Ербас“.  

„Наша цел е да влеземе во авионската индустрија. Засега произведуваме автоматски машини за производство на крилата на авионот. Во иднина, наш предизвик ќе биде производство на роботи за креирање на труп на авионот“, изјави Самоил Самак, потпретседател на Управниот одбор на „Микросам“.

Во новата зделка склучена од „Микросам“ се вклучени и испораки на машини за производство на резервоари за гас за индискиот пазар.

Според изјавата на директорот за продажба на„Микросам“,Димитар Богдановски, во почетокот на идниот месец, за Германија ќе бидат натоварени 24 камиони со машини за производство на плинските боци, кај нивниот тамошен партнер во овој проект и потоа тие ќе патуваат за крајниот потрошувач, Индија. 

„Наскоро ќе склучиме вакви договори за Русија, Бразил, Кина и Јужна Америка“, рече Богдановски.

Менаџментот не сакаше да открие колку чини инвестицијата во новата производна линија, но наведе дека во неа вложиле неколку милиони евра. Според нив, цената на оваа технологија на пазарот чини од 6 до 20 милиони евра.

Тие најавуваат дека до крајот на годината ќе биде изградена нова хала за производство и монтажа и за таа цел дополнително ќе бидат вработени 20 нови инженери и работници. Во моментов, во „Микросам“ работат 80 работници.

Врати се на прва страна.