Хипериум

„Хипериум“ воведува нови стандарди на пазарот на недвижен имот

Деловниот центар нуди комплетно уредени простори, чија квадратура е според потребите на закупците

Сања Наумовска

„Комплексот ’Хипериум‘ ќе биде прв бизнис-парк во Македонија, кој компаниите нема да мора воопшто да го напуштаат за да завршат каква било работа поврзана со нивниот бизнис“, вели Ѓорѓи Војновиќ, генерален менаџер на „Хипо Алпе Адрија лизинг“. Во „Хипериум“ има место за нотари, адвокатски компании, банкарски канцеларии, осигурителни и ИТ-компании и други бизниси на кои им е потребен опремен деловен простор во кој ќе можат во тивка и мирна атмосфера да работат, и тоа на само 1,5 километар од центарот на градот.

Концептот, дизајнот и технологијата кои се вградени во објектот се врвни и пренесени од сите други згради кои „Хипо“ ги има во светот, но изградбата на „Хипериум“ е доверена исклучиво на македонски градежни компании, кои објектот ќе треба да го завршат до крајот на годината. Во него се имплементирани највисоките технички и безбедносни стандарди, заштита од пожари и видеонадзор. Целиот објект изведен со стаклена фасада ја штеди енергијата, има современи системи за греење и ладење и автоматско исклучување на светилките по работното време.


Ѓорѓи Војновиќ

Изградбата на „Хипериум“, вели Војновиќ, се реализира по истражувањето на пазарот на недвижен имот во Македонија, на кој очигледно му недостасуваше еден ваков објект што ќе понуди повисоки стандарди, кои се еквивалент на потребите на домашни и странски компании што работат овде. Заинтересираноста е голема и засега се потпишани неколку писма за интерес со претставништва на странски фирми.

„Убедени сме дека ова е најмодерниот бизнис-центар во нашата држава. Инвестицијата е исплатлива и се надеваме дека ќе биде пример за другите инвеститори на пазарот за недвижен имот. Нивото на развојот на овој сегмент во Македонија е сличен на оној пред десетина години во Србија, Хрватска и други земји во регионот, па се наметна реалната потреба од изградба на еден ваков објект“, нагласува Војновиќ.

„Хипериум“ на пазарот за најмување нуди површина од 13.000 квадратни метри. Но, Војновиќ засега не ја открива цената што ќе треба да ја плаќаат компаниите. Тие ќе добијат комплетно уредени простори, чија квадратура може да биде определена според потребите на закупците. На петтиот кат е сместена повеќенаменска канцеларија опремена со видео и аудиоопрема за презентации што ќе се најмува на час или на ден. Непосредно до неа има и клуб за состаноци, како и луксузен потпокрив со тераса.

Канцелариите ќе имаат празни мрежни канали доколку на фирмите им е потребно доопремување, со што, вели Војновиќ, се внимава и на визуелниот ефект и убавината на деловниот простор. Објектот има паркинг за 200 возила наменет за вработените, како и посебен паркинг за посетители, со што еден од најголемите проблеми со кои се соочуваат деловните центри е успешно решен. Според очекувањата на „Хипо“, инвестицијата во деловниот објект ќе се врати за 7-10 години работа.

Особено интересен е фактот што во павилјонот, кој е засебен дел од објектот и ќе има свој влез и работно време, ќе се организираат различни изложби и други културни настани. Модерно уредениот простор во соработка со Општина Карпош ќе им биде ставен на располагање и на млади уметници од општината, кои тука ќе добијат шанса за промоција на своите дела. На влезот од зградата, во дворот ќе тече река, а во приземјето ќе има фонтана.