Хиподром и Ченто

Се продава градежно земјиште на влезот од Скопје

Хиподром ќе добие нова населба

На површина од околу 28 илјади квадрати ќе се градат девет згради, а на 2300 метри квадратни комерцијално-деловен објект

Во Хиподром, на самиот влез во Скопје, од левата страна на автопатот, ќе никне нов станбено-деловен комплекс. На површина од околу 28 илјади квадрати ќе се градат девет згради, а на 2300 метри квадратни комерцијално-деловен објект. Од Министерството за транспорт и врски информираат дека станува збор за градежно земјиште во сопственост на државата кое ќе се продава на тендер.

Според Детелниот урбанистички план станбените објекти ќе се градат на девет локации со површини од 2.000 до 5.000 метри квадратни. Почетната цена за квадрат на ова земјиште е 3.500 денари за квадрат, а заинтересираните компании може да се пријават за една или повеќе локации. Почетната цена за земјиштето за комерцијалните и деловните објекти е 5.400 денари.

Пријавите за учество на јавното наддавање може да се достават најдоцна до 21 јануари, а јавното наддавање ќе се одржи на 28 јануари. Текстот на јавните објави може да се прочита на интернетската страница на Министерството за транспорт и врски њњњ.мтц.гов.мк, а јавните повици се објавени и во печатените медиуми.
- Со реализирање на предвидените проекти, односно со изградба на станбените згради и деловно-комерцијалниот објект на оваа локација, освен што ќе се овозможи заживување на овој дел од Скопје, ќе се овозможи и дополнителен простор за домување со конкуретни цени што дополнително ќе доведе до стимулирање на конкуренцијата во областа на недвижностите, изјави портпаролот на Министерството, Драган Симоновски.

За учество во јавното наддавање потребно е да се поднесе пријава во писмена форма со доказ за платен депозит, кој изнесува 10 отсто од почетната цена на јавното наддавање за утврдената површина на градежната парцела.