Коридор 8

Порталб: Изградбата на пругата кон Албанија се одолговлекува со години

Од 2017 година постои проект за изградба на железничката линија од Кичево до граничниот премин со Албанија, Ќафасан, но изградбата на оваа пруга останува неостварено ветување. Железничкото поврзување ќе овозможи економски придобивки за двете земји, бидејќи Албанија добива можност да се поврзе со железничка линија со Бугарија, додека Северна Македонија ќе има можност да се поврзе со пристаништето Драч, што ќе го олесни транспортот на стоки, пишува Порталб.мк.

Изградбата на железничката пруга што ќе ја поврзе Северна Македонија со Албанија се одолговлекува со години. Проектот за изградба на ова пруга беше финализиран во ноември 2017 година, а освен изјавите на официјалните лица дека изградбата на оваа пруга ќе биде нивен приоритет, на теренот пак, нема конкретни работи.

Со цел да се зголеми економската и инфраструктурната соработка, железничката делница Северна Македонија – Албанија се смета за стратешка инвестиција со регионално влијание. Европската унија со сума од 7,7 милиони евра го финансираше составувањето на проектот кој предвидува изградба на железничка инфраструктура во должина од 63 километри.

Железничката делница што треба да се гради од Кичево преку Струга до граничниот премин со Албанија, Ќафасан, предвидено е да чини над 500 милиони евра. Во делот од Кичево до Струга, покрај пругата, треба да се изградат 49 мостови и 13 тунели. По должината на делницата треба да има две главни и две помали станици.

Случувања од 2017 година
09 февруари 2018 година – На состанокот одржан во Скопје, директорите на двете железнички претпријатија Ирфан Асани и Ани Дурмиши изјавија дека изградбата на Коридорот 8 по железничката линија Кичево-Лин е приоритет на Владата на Албанија и на Македонија. На оваа средба беше заклучено дека до 2023 година ќе биде ставена во функција железничката линија Македонија-Албанија.

22 ноември 2018 година – За време на официјалната посета во Скопје, претседателот на Албанија Илир Мета се сретна со премиерот на Македонија, Зоран Заев. Претседателот Мета и премиерот Заев ги споделија истите ставови во однос на потребата и важноста од зголемување на економската и инфраструктурната соработка со конкретни проекти како што е оној на „Коридорот 8“. Тие ја оценија изградбата на железничката делница меѓу двете земји како стратешки важна инвестиција за целиот регион.

16 октомври 2020 година – На средбата меѓу заменик министерот за инфраструктура и енергетика, Артан Шкрели и неговиот колега во Северна Македонија, Беким Реџепи, беше потенцирана големата потреба за изградба на оваа пруга и нејзината стратешка важност. Истиот став го изразија и директорите на двете железнички претпријатија Фестим Халили и Ани Дурмиши.

„За нас изградбата на железничката делница во правец на Албанија е приоритет, затоа верувам дека сега е вистинското време да имаме заеднички договор бидејќи од нас бараат и финансиските институции кои ја финансираат изградбата на преостанатиот дел од коридорот“ изјави Фестим Халили, поранешен директор на ЈП за железничка инфраструктура Железници на РСМ.

Што ја спречи изградбата на оваа пруга?
Пред извесно време, во изјава за телевизија Алсат, сега веќе поранешниот директор на железничката компанија Фестим Халили, објави дека изградбата на пругата меѓу Северна Македонија и Албанија три години е заложник на споровите во рамките на владината коалиција СДСМ и ДУИ.

Друга причина зошто железничката делница РСМ-Албанија остана во ќорсокак е погрешниот избор на рутата каде треба да помине трасата на оваа пруга.

Проектот од 2017 година предвидуваше дел од пругата да поминува покрај Охридското Езеро, на што остро се спротивстави УНЕСКО. УНЕСКО предупреди дека Охридското езеро може да се најде на списокот на загрозено светско природно наследства доколку на неговиот брег се гради железничка инфраструктура. УНЕСКО, со цел да се избегне оштетувањето на Охридското езеро од железничката инфраструктура, предложи железничката рута да помине низ алтернативен тунел од Струга до албанскиот град Прењас, под планината Јабланица.

Кога се очекува да започне изградбата на пругата?
Владата на Северна Македонија минатата есен одлучи да даде зелено светло на овој проект и го обврза Министерството за финансии да достави барање до меѓународните финансиски институции и до билатералните кредитори да ги обезбеди потребните средства за финансирање на изградбата на оваа пруга.

Нашата редакција се обрати до Министерството за финансии со прашањето: Дали ова Министерство започна да работи на обезбедувањето на потребните средства за изградба на оваа железничка линија и колку може да трае обезбедувањето на сумата од 500 милиони евра?

По електронски пат испративме прашање до Канцеларијата за односи со јавност на ова министерство, но не добивме никаква потврда или каков било одговор на нашето прашање. По неколку телефонски повици до канцеларијата за ПР, ни беше кажано дека одговорот го подготвуваат релевантните сектори, но досега немаме никаква информација. (Нашата редакција ќе ги ажурира податоците ако имаме одговор од оваа институција).

Од Кичево до граничниот премин Ќафасан, изградбата на пругата треба да започне од нула. Во моментов во овој регион се работи само на изградба на автопатот Кичево-Охрид. Властите проценуваат дека ќе бидат потребни најмалку четири години за да се изгради ваков инфраструктурен проект.

Кое е економското значење на овој проект?
Институтот „Фајнанс тинк“ проценува дека јавните инвестиции во транспортната инфраструктура од 2 до 3 отсто од БДП (бруто домашен производ) годишно, придонесуваат за поголема стапка на раст на БДП од 0,5 процентни поени годишно. Значи, се зема предвид ефектот врз економијата од изградбата на тие патишта, железници и друга транспортна инфраструктура, а потоа и ефектите што ги има добрата инфраструктура врз поврзаноста на деловниот сектор, што значи зголемување на продуктивниот и конкурентскиот капацитет на економијата.

„Конкретната важност на Коридорот 8 е во регионалното поврзување исток-запад, особено патното и железничкото поврзување со Албанија, кое е недоволно развиено од двете страни на границата. Инвестирањето во железничкиот коридор ќе обезбеди побрзо и поефикасно користење на придобивките од заедничката економска зона на Западен Балкан, без оглед на обликот на тоа подрачје. Дури и ако не одиме понатаму, членството во ЦЕФТА на обете земји може да се искористи и подобри само со подобра инфраструктура за поврзување, а во таа смисла придобивките за двете економии несомнено ќе бидат значителни за стапките на раст на БДП и подобрување на конкурентноста на бизнисот”, изјавуваат од „Фајнанс тинк“.

Што претставува Коридорот 8?
Пан-европскиот Коридор 8 е еден од 10-те паневропски транспортни коридори, којшто го поврзува Јадранското со Црното море. Овој коридор поминува низ Албанија, РСМ и Бугарија. Коридорот 8 има должина од 1.220 до 1.350 километри. Овој коридор има големо економско значење за сите земји каде поминува бидејќи овозможува лесен транспорт на стока.

Инаку, кога станува збор за овој проект, во најновиот извештај, УНЕСКО бара државните претпријатија да се координираат меѓусебно за важните инфраструктурни проекти што минуваат низ заштитеното подрачје во регионот на Охрид-Струга и да бараат опција преку една рута да поминат железницата, автопатот, гасоводот и електричната линија во правец на Албанија. Извештајот се однесува на тоа дали се исполнети условите Охрид и Охридското езеро да бидат вклучени во списокот на загрозено светско природно и културно наследство.

УНЕСКО оди понатаму со барањата во врска со пругата кон Албанија, чија рута е планирано да биде од Кичево преку Струга до Лин. УНЕСКО бара да им се достави сеопфатна компаративна студија со алтернативна траса за железничката пруга на Коридорот 8, вклучително и оние што не поминуваат долж Охридското езеро и особено не ја вклучуваат трасата избрана преку Радожда до Лин. Во исто време, УНЕСКО бара да им се достави ажурираната документација за железничкиот проект, како и детална мапа што ќе ги вклучува линиите по кои ќе поминува пругата, како и сите можни патишта во струшкиот регион.

https://meta.mk/portalb-izgradbata-na-prugata-kon-albanija-se-odolgovlekuva-so-godini

Абе КиселаВода градска населба е, па попладневниот и викенд возниот ред на ЈСП е на 40мин, ти сакаш меѓуградски.

Готова пред-физибилити студијата за пругата Скопје-Кичево и најдолгиот тунел на Балканот

Ангажираните консултанти минатиот месец до Министерството за транспорт и врски го доставија целиот сет од пред-физибилити студијата за пругата Скопје-Кичево на Коридорот 8 во финална верзија која е одобрена од сите инволвирани страни. Станува збор за првиот документ од низата што ќе следат во функција на зголемување на брзината и подобрување на безбедноста на оваа железничка делница во согласност со стандардите на ЕУ. Документот е подготвен со средства од Инвестициската рамка за Западен Балкан (ВБИФ) на ЕУ.

„Пред-физибилити студијата дава осврт на состојбата на пругата во овој момент, земајќи ги во анализа сите објекти што се наоѓаат по трасата, од мостови, тунели, згради, уреди за сигнализација и други објекти. Исто така, дава опции за идно подобрување на целата инфраструктура“, информираат за „Мета.мк“ од Министерството за транспорт и врски.

Пругата од скопската населба Ѓорче Петров до Кичево е со должина од 102,6 километри и е изградена во 60-тите години на минатиот век, а пуштена е во употреба во периодот 1968-1969 година. На овој импозантен проект од времето на Југославија се наоѓа и најдолгиот тунел на Балканскиот Полуостров – тунелот „Буковиќ“ долг над 7 километри (7.062 метри) и највисокиот железнички вијадукт во земјава – Србиновски мост, и двата лоцирани на пругата меѓу Гостивар и Кичево.

По изготвувањето на пред-физибилити студијата, треба да следи изработка на детална студија за изводливост на проектот за реконструкција на пругата Скопје-Кичево, со анализа на трошоци и придобивки, како и студија за влијание на проектот врз животната средина. Дополнителни средства ќе бидат потребни и за подготовка на идејниот и основниот проект.

Последен пат оваа железничка линија беше реконструирана неколку години по воениот конфликт во 2001 година во земјава, кога беше оспособена за одвивање сообраќај. Официјално, максималната брзина на движење на возовите е 100 километри на час меѓу Скопје и Гостивар, како и 80 километри на час во делот меѓу Гостивар и Кичево. Сепак, поради недоволните средства за одржување и природните непогоди, брзините на движење на одредени нејзини делови се помали.

Покрај обновата на самата пруга, недостасуваат и современи сигнални уреди, како и електрификација на едноколосечната пруга, како би можело во иднина да се оствари железничкото поврзување меѓу Македонија и Албанија преку нејзино продолжување во правец кон албанскиот град Лин.

Пругата Скопје-Кичево денеска е со потпросечна искористеност на нејзините капацитети, со функционирање на само еден пар патнички возови дневно меѓу двата града. Податоците за возните километри пак во товарниот сообраќај за третиот квартал од 2020 година, покажуваат дека само 1 отсто од нив се реализирале на пругата Ѓорче Петров-Кичево, се наведува во Кварталниот извештај на ЈП за железничка инфраструктура Железници на РСМ.

https://meta.mk/gotova-pred-fizibiliti-studijata-za-prugata-skopje-kichevo-i-najdolgiot-tunel-na-balkanot/

Очигледно си го видел теренот и сфаќаш дека треба тунел, ама дали си видел дека моменталниот каков и да е пат поминува низ самиот рудник „Саса“, а од другата страна „Тораница“, односно низ самите јаловински езера.

Инаку, зафатов би чинел гарант минимум милијарда евра, што нели првин треба да се види оправданоста на се, дури и да живееш во Норвешка и парите да ти доаѓаат сами.

Да ги викнат господа господа Стефан и Неофит на помош? 76 години се гради пругава, а згора на тоа во 2020 ја прават едноколосечна со vmax од 80 (или 100?) km/h. Па на Марс ќе испратат туристи пред пругава да бидне.

Поништен тендерот за изградба на пругата Бељаковце-Крива Паланка, ќе се распишува нов

Владата се одлучи да го поништи тендерот за избор на изведувач за изградба на втората фаза од проектот за железничко поврзување меѓу Северна Македонија и Бугарија. За изградба на пругата долга 34 километри меѓу Бељаковце и Крива Паланка од Коридорот 8 ќе се распишува трет по ред тендер за пронаоѓање на најповолен понудувач, но овој пат ќе се бара градежна компанија што ќе ја заврши целата траса од Куманово до Крива Паланка, односно во пакет ќе се тендерира првата и втората фаза од проектот.

„Владата на Република Северна Македонија на Седницата одржана нa 4.10.2020 година, ја зема во предвид ново настаната состојба што се појави во реализација на изградбата на пругата на Коридор 8, фаза 1 Куманово-Бељаковце поради еднострано раскинување на Договорот со изведувачот. Заради огромното значење на изградба на Коридор 8, како и потребата од ефикасност во изградбата на пругата, се одлучи да се поништи тековната постапка за избор на Изведувач за изградба на фаза 2, Бељаковце-Крива Паланка и повторно да се реобјави јавниот повик со тоа во јавниот повик се прецизира изградба на Фаза 1 и Фаза 2, односно планирана изградба на двете фази од еден ист изведувач“, велат за „Мета.мк“ од Министерството за транспорт и врски.

Инаку, изградбата на пругата меѓу Бељаковце и Крива Паланка претставува втор по големина инфраструктурен проект во моментов во земјава, со проектирана вредност од 147 милиони евра. До крајот на годинава, требаше да се избере изведувач за втората фаза од изградбата на пругата кон Бугарија и градежните работи да отпочнат на терен. Првиот тендер за избор на изведувач беше распишан кон крајот на мај 2016 година, но истиот пропадна. Кон средината на 2018 година, беше распишан вториот по ред тендер за пругата Бељаковце-Крива Паланка, постапката стигна до втората фаза во која влегоа осум компании со своите понуди, но владата се одлучи да го поништи меѓународниот тендер.

Од Министерството за транспорт и врски велат дека во моментов надзорниот орган интензивно работи на правење на пресек во колкав обем е реализиран договорот за изградба на делницата Куманово-Бељаковце. Откако ова ќе се прецизира, ќе се дефинираат новите количини на работи кои преостануваат да се сработат. Потоа, ќе следи подготовка на тендерската документација, која треба да се координира во соработка со Европската банка за обнова и развој (ЕБОР). По одобрување од ЕБОР, веднаш ќе се објави јавниот повик за двете фази што ќе треба да се градат во пакет од Куманово до Крива Паланка.

Европската комисија (ЕК) пак во најновиот Извештај за напредокот на нашата земја на патот кон ЕУ упати критики за доцнењето на изведбата на железничкиот Коридор 8, за кој самата ЕУ обезбеди неповратни средства за земјава за реализација на втората и на третата фаза од проектот во висина од околу 130 милиони евра.

„Изградбата на железничкиот Коридор 8 кон Бугарија се соочува со значителни доцнења со завршени само 28 отсто. Ова ќе има сериозни последици за отворање на последниот дел од коридорот „Ориент/Источен-Медитеран“. Потребен е сериозен напор за да се забрза напредокот во сите фази на овој коридор“, се нотира во Извештајот на ЕК.

https://meta.mk/ponishten-tenderot-za-izgradba-na-prugata-beljakovcze-kriva-palanka-kje-se-raspishuva-nov/

Ќе има ли пруга од Кичево до Албанија? – Владата даде зелено светло, МЖ-инфраструктура бара пари



https://tv21.tv/mk/ke-ima-li-pruga-od-kichevo-do-albanija-vladata-dade-zeleno-svetlo-mzh-infrastruktura-bara-pari/

Да, да, ја направија до Бељаковце, сега ќе ја прават и до Албанија. Кај и да е, до 2100-та ќе ја изградат.

Пругата наречена надеж



https://irl.mk/prugata-narechena-nadezh/