Меркатор маркети

Кризата ќе ги поремети словенечките инвестиции

Бизнис делегација од водечките словенечки компании во Скопје како дел од официјалната посета на претседателот на Словенија Данило Тирк.

Глобалната криза ќе ги поремети, но нема да ги запре инвестициските планови на фирмите од Словенија. Енергетиката, трговијата, осигурителниот бизнис остануваат најатрактивни сектори.

„Нас не интересираат двата тендери за Чебрен и Галиште и за Бошков Мост. Голем проблем во Македонија е увозот на енергија и мислам дека хидроцентралите на овие реки би ја намалиле зависноста на земјата од увоз на струја“, изјави Јанез Шкрабец, РИКО - Словенија.

„Работиме во пет земји - Словенија, Хрватска, Србија, Босна и Црна Гора. Оваа година ќе отвориме прв хипер маркет во Бугарија, а во рок од следните две години имаме план да влеземе на пазарите во Македонија, Косово и Албанија“, рече Жига Дебељаг, „Меркатор“ - Словенија.

„Тука и ние имаме интерес, особено за Бошков Мост и ако дојде следната фаза за тендер, односно ако се повтори тендерот, тогаш сигурно ќе имаме интерес“, вели Томаш Орешич, ЕФТ - Словенија.

Една од водечките словенечки инвестиции е во банкарството - „НБЛ Тутунска банка“ која се вбројува во големата банкарска тројка. Првиот човек на групацијата вели дека иако европските банки се соочуваат со забавено кредитирање, пари за стопанството ќе има.

„Можеме да очекуваме дека базичната камата ќе се намалува, но маржата ќе оди нагоре, сепак вкупната камата ќе биде пониска во споредба со последните месеци“, изјави Драшко Веселинович, претседател на управата на НЛБ.

„Сега се земаат помалку кредити, луѓето помалку се задолжуваат, сите чекаат што ќе случи со економската криза“, додаде Веселинович.

Словенија е еден од позначајните трговски и инвестициски партнери на Македонија. Досега во земјава словенечките инвестиции се проценуваат на околу 200 милиони евра.