Плажи и бродови на Вардар

Јас мислам дека ваков проект не би се почнувал доколку водата не се среди..

Градска плажа со кафе, за кафеани не се знае

Одговорот на главната дилема, дали на Кејот ќе никнат и кафулиња и кафеани наспроти планираната плажа со урбана опрема и базени за деца, ќе се знае по изборот на изведувач за уредување

Замислата на градоначалникот Коце Трајановски левиот Кеј на Вардар, од мостот Гоце Делчев, па до Камени мост, да го претвори во градска плажа, пролетва ќе стане реалност. Ќе се наоѓа токму под театарот кој сега е во изградба. По изборот на идеен проект пред два месеца, неделава беше објавен и јавен повик, на кој се бара изведувач за уредување. Тендерот ќе трае до 22 април годинава.

Според објаснувањата од надлежните, не станува збор за конвенционална плажа, карактеристична за предземјотресно Скопје кога жителите се капеле во Вардар и кога водите биле чисти,туку, како што објаснија од Градот, плажата повеќе ќе биде урбана атракција.

Одговорот на главната дилема, дали на Кејот ќе никнат и кафулиња и кафеани наспроти планираната урбана опрема и мали базени за деца, ќе се знае по изборот на изведувач за уредување. Самите автори на проектот предвидуваат уживање покрај Вардар со кафе и пијалак, но од Градот рекоа дека сега не можат да одговорат на прашањата дали ќе издаваат локации за времени објекти, кои би биле поставувани покрај Вардар, а би вршеле угостителска функција.

- Сега-засега е изработено само идејното решение. Сите детали понатаму ќе бидат фазно разработени со проектните решенија и програмите на Град Скопје за работа во наредниот период - изјавија од одделението за односи со јавност.

По изборот на изведувач ќе се знае и сумата што ќе биде потрошена за замислата на Трајановски. Граѓаните се изненадени од оваа идеја, имајќи предвид дека Кејот со децении е запуштен. Скептични се дека уредувањето на еден дел ќе придонесе за заживување на левиот брег на Вардар.

- Реката Вардар е толку загадена што миризбата е неподнослива. Навистина не знам кој би уживал покрај вода од која лете се шири реа - коментира Никола С. од Скопје.

Првонаградениот проект, кој победи на конкурсот за идејно решение, овој дел од Кејот го замислува покриен со песок. Треба да биде уреден со дрвени платформи за лежалки, столови и маси. Покрај урбаната опрема, предвидени се неколку мали базени, а целата плажа ќе биде покриена со тенди во модерна форма.

- Плажата е замислена да биде место за релаксација на цело семејство. Додека децата уживаат во базени, нивните родители да уживаат во пиење кафе - објаснија авторите Бекир Адеми и Бетим Зекири при презентирањето на идејниот проект.

Првичната замисла за уредување на Кејот на Вардар беше проект на студентите на Архитектонскиот факултет, кој го нарача претходниот градоначалник Трифун Костовски. Беше замислено плажата да се протега од Камениот мост до МАНУ, каде што беа предвидени кафулиња и рампи за симнување кон Кејот. На сегашниот простор беа предложени тениски и други игралишта, кои би се протегале до хотелот „Александар палас“.

Јорданка Ивановска