Клучка Континентал

ПРИ КРАЈ ИЗГРАДБАТА НА НОВАТА КЛУЧКА

Сообраќајниот метеж кај хотелот „Континентал“ е намален со пуштањето на дел од новата клучка во употреба. Сообраќајот се одвива во двата правца кон центарот и кон излезот на градот. Во тек е изведбата на втората фаза од проектот за клучката, која опфаќа изведба на кружен тек. Како што информираат од Градот, во моментов се вршат подготвителните работи, односно преместување и замена на подземната инсталација.- Катастарските мерења извршени порано покажаа дека под трасата по која треба да биде кружниот тек има само две-три инсталации. Но, со започнување на подготвителните работи беше утврдено дека има околу осум подземни инсталации. Затоа подготвителните работи ќе одземат повеќе време - вели Љупчо Пандиловски, од одделението за односи со јавноста во Градот.Со проектот за клучката кај хотелот „Континентал“ се предвидува да се постави хидроизолација на постојниот пешачки подземен премин што води од хотелот до бараките во кои е сместена администрацијата на Општина Гази Баба. Во тек е повторното гребење на асфалтот и поставување нов на булеварот Александар Македонски во должина од 500 метри, од зградата на студентскиот дом „Стив Наумов“ до клучката и 500 метри од клучката во насока на Бит-пазар.Градските власти велат дека паралелно се работи на хортикултурното уредување на клучката. Засадена е трева, се уредуваат пешачките острови и тротоарите, а делот што е пуштен во употреба е комплетно осветлен. Се уредува средишниот дел на булеварот Александар Македонски со жардиниери.

Изведбата на вкупниот проект за клучката чини 2,5 милиона евра, а изведувач на работите е градежната фирма „Пелагонија“.По завршување на кружниот тек, ќе почне и со проширувањето на улицата Беласица пред Скопското сајмиште. Проширувањето ќе биде за по една лента во двата правца, што значи дека овој дел од улицата ќе биде булеварско решение. По добивањето на согласност од Министерството за внатрешни работи за привремен сообраќаен режим, ќе почне да се проширува улицата Гоце Делчев за една сообраќајна лента, само од страната на зградата на Македонската радио-телевизија.Според градските власти, со ова во голема мера ќе биде подобрена сообраќајната инфраструктура на влезот и на излезот од Скопје.