Булевар Митрополит Теодосиј Гологанов

Градот Скопје успешно го заврши проектот за проширување и реконструкција на втората делница од булеварот Митрополит Теодосиј Гологанов, кој што во изминативе шест месеци се прошируваше на потегот од крстосницата со улицата Франклин Рузвелт до крстосницата со улицата Братфордска и булеварот 8.Септември, во вкупна должина од 1 100 метри. Градоначалникот на Град Скопје, Коце Трајановски и Претседателот на Владата на Република Македонија, Никола Груевски, денеска  /28.10.2012 година/ и официјално го отворија за сообраќај вториот дел од оваа значајна сообраќајна артерија.

- Ми претставува особено задоволство што во рекордно време го завршивме проширувањето и на овој дел од булеварот Митрополит Теодосиј Гологанов, една од најзначајните сообраќајни врски во Скопје. Со проширувањето, оваа сообраќајница доби 4 коловозни ленти и вкупна ширина на коловозот од 16 метри. Во текот на реконструкцијата на улицата се заменети рабниците, а се направи и заштита на подземните инсталации (водоводна инсталација Ф 400 во должина од 400 метри и гасовод Ф 400 во должина од 420 метри). Од двете страни на новата сообраќајница се формирани тротоари со ширина од по 3,5 метри. Тротоарите се покриени со бекатон-плочки на површина од 6 500 квадратни метри. Проширувањето на коловозот на булеварот Митрополит Теодосиј Гологанов беше искористено за да се изгради атмосферска канализација во должина од 1 500 метри, со профил од 200 и 400 милиметри која е приклучена во постојниот колектор. Реконструирана е и постојната фекална канализација под коловозот во должина од 20 метри. Градежните работи за реконструкција и проширување на вториот дел од булеварот Митрополит Теодосиј Гологанов ги изведе градежната фирма „Транс Мет ДОО“. Градот Скопје во овој обемен зафат вложи околу 47 милиони денари - рече денеска градоначалникот Трајановски.

Тој потсети дека Градот Скопје минатата година го прошири првиот дел од булеварот Митрополит Теодосиј Гологанов, на потегот од улицата Франклин Рузвелт до улицата Костурски херои (еден крак) и кон улицата Свети Кирил и Методиј до свртувањето надесно кон улицата Народен фронт (втор крак). Сообраќајницата доби 4 сообраќајни ленти, а во делот меѓу улиците Митрополит Теодосиј Гологанов, Костурски херои и Свети Кирил и Методиј (кај Католичката црква) е формиран турбо кружен тек, којшто претставува прв објект од ваков тип во Скопје.

- Сакам да и се заблагодарам на Владата на Република Македонија за поддршката при реализацијата на овој обемен проект што е од исклучително значење за растоварување на сообраќајот на градот - нагласи градоначалникот Трајановски.

Премиерот Груевски во своето обраќање истакна дека успешното завршување на овој проект е реализација на уште едно ветување дадено пред граѓаните на Скопје.

- Во последниве децении бројот на жители во Скопје постојано се зголемуваше, а инфраструктурата остануваше иста. Но, градоначалникот Коце Трајановски и неговиот тим покажаа дека се подготвени да се справат и со најсложените инфраструктурни проекти и да ги решат наталожените проблеми во корист на граѓаните на Скопје - рече денеска премиерот Груевски.