ОУ „11 Октомври“ ќе има две спортски сали

Родителите чии деца учат во „11 Октомври“ велат дека изградбата на нова сала не е неопходно ниту потребно, туку само ќе се уништи зеленилото околу училиштето

Основното училиште „11 Октомври“ во општина Центар ќе добие уште една фискултурна сала, подарок од Агенцијата за млади и спорт, иако училиштето веќе има голема и убава сала што ја користат учениците.

Дел од граѓаните и родителите сметаат дека изградбата на салата се џабе потрошени пари и дека тие треба да се употребат за посуштински работи кои ќе им помогнат на учениците како осовременување на училниците и едукативниот материјал.

Родителите чии деца посетуваат наставата во училиштето велат дека изградбата на нова сала не е неопходно, ниту потребно, туку само ќе се уништи зеленилото околу училиштето.

- Училиштето има убава фискултурна сала што ја користат децата, а воедно училиштето и ја издава. На местото на кое сега ќе се гради новата фискултурна сала има игралиште, каде што децата кога е убаво времето имаат физичко на воздух и во зеленило. Од новата сала се очекува само профит, од издавање, таа ништо нема да придонесе за учениците. Не сум против да се гради фискултурна сала, но зошто токму во „11 Октомври“. Има основни училишта во центарот на градот во кои воопшто нема фискултурна сала, вели еден родител, кој инсистираше да остане анонимен.

Јовица Ацковски, портпарол во Општина Центар вели дека фискултурната сала е подарок од Агенцијата за млади и спорт. Тој додава дека салата во ОУ „11 Октомври“ е дел од владиниот проект за изградба на 35 спортски сали преку Агенцијата за спорт и млади и ќе има капацитет од 500 седишта и модерна спортска опрема.

Од кабинетот на градоначалникот Тодоровиќ, објаснуваат дека „11 Октомври“ е изградено пред 55 години и тогаш биле предвидени две спортски сали.

- Салата ќе биде од големо значење за општината, во која има најголема концентрација на млади луѓе. Во општината има седум основни училишта, а во две од нив, „Гоце Делчев“ и „Кирил и Методиј“, нема спортски сали. Општина Центар во координација со Министерството за образование ги завршува подготвителните работи за оваа година да почне изградбата на спортска сала и во училиштето „Кирил и Методиј“. Проблемот со училиштето „Гоце Делчев“ е во малата дворна површина, но Општина Центар оваа година ќе изготви проект со димензии онакви какви што ќе може да послужат за изградба и на толку мал простор - изјави градоначалникот на Центар, Владимир Тодоровиќ.

Диме Спасов, директорот на Агенцијата за млади и спорт вели дека постојната фискултурна сала во училиштето е мала, неефикасна, во лоша состојба, а новата ќе биде наменета за екипни спортови.

- Учениците ќе имаат можност во новата сала да тренираат и да се натпреваруваат во екипни спортови. Се разбира дека училиштето по часовте ќе може салата да ја издава и парите да ги користи за тековно одржување. За тоа каде ќе се градат салите се договараме со општината, не гледам ништо лошо што камен-темелникот се постави токму во ова училиште, изјави Спасов.

Нова сала на стари темели во Куманово

ФАКУЛТЕТ ЗА ФИЗИЧКА КУЛТУРА ВО СКОПЈЕ

Конечно доби спортска сала

Со децении овој Факултет работел и постоел без да има сопствена спортска сала. Верувам дека оваа спортска сала ќе им помогне на многу млади студенти и на идни спортски работници да ги развијат своите таленти и во иднина да се вклучат во професионалниот спорт во Република Македонија, рече премиерот Груевски

Премиерот Никола Груевски заедно со директорот на Агенцијата за млади и спорт, Диме Спасов, свечено ја пушти во употреба спортската сала на Факултетот за физичка култура при Универзитетот Св. Кирил и Методиј" во Скопје. Пуштањето на оваа 25-та спортска сала е дел од владиниот проект 35 спортски сали и 50 фудбалски игралишта" што се спроведува преку Агенцијата за спорт и млади.
- Со децении овој Факултет работел и постоел без да има сопствена спортска сала. Верувам дека оваа спортска сала ќе им помогне на многу млади студенти и на идни спортски работници да ги развијат своите таленти и во иднина да се вклучат во професионалниот спорт во Република Македонија, рече премиерот Груевски.

Тој истакна дека во рамки на владиниот проект, меѓу другото, ќе се градат и 145 училишни спортски сали и над 100 тениски терени на целата територија на Македонија, со што по долги години се менува состојбата и се зголемуваат инвестициите во спортот.

Новата спортска сала на Факултетот за физичка култура има капацитет од 500 седишта, а опремена е со најмодерна спортска опрема и оспособена е да се користи за повеќе видови спорт.
Директорот на Агенцијата за млади и спорт Диме Спасов во оваа прилика пред присутните студенти, професори и гости изрази очекување дека ќе се развива универзитетскиот спорт во Република Македонија и ќе се продолжи со уште посилно темпо со поддршка на Владата и на премиерот Никола Груевски.
- Уверен сум дека најголема радост спортската сала ќе пробуди кај студентите кои со нетрпение очекуваат да почнат да спортуваат во неа и ми претставува и огромно задоволство поради тоа што студентите конечно добија вистински услови за изведување на настава какви што има и другите европски, светски факултети за спорт. Овде во спортската сала "Македонски херој" студентите ќе можат да вежбаат и да тренираат кошарка, ракомет, одбојка, мал фудбал, тенис, гимнастика, пинг-понг и други спортови, рече Спасов.